Хөвсгөлийн улс төрчид Б.Даш-Ёндон, С.Баяр, Ө.Энхтүвшин нар элбэж дэмжээд гаргаад ирсэн нөхөр л дөө. Эдгээр ах нарынхаа номыг ивээн тэтгэх, сонгуулийн сурталчилгаанд гүйх зэргээр “ажлын гараагаа” эхэлж, улмаар албан тушаалд ивэгдэх замаар л явж ирсэн хүн. Хууль зүйн яаманд багагүй удаж, С.Баяр, Ө.Энхтүвшин нарыг Ерөнхий сайд, бүлгийн дарга байх үеэс Улс бүртгэлийн дарга болоод л “крандуулж” ирсэн.
Арван хоёр онд Хөвсгөлд нэр дэвшээд ойчсон. Ойчиход нь, өөрийн нь хүрээний нэг нөхөр хүн зодсон нь нэрмээс болчих шиг болдог. Тэгээд арван зургаан оны МАН-ын их ялалтаар УИХ-д орж ирээд эдүгээ хоёр дахиа сууж байгаа. Хууль зүйн байнгын хороон дарга хийсэн, залгуулаад УИХ-ын дэд дарга болчхоод байгаа.
Т.Аюурсайхан ойчоод, энэ хүнд дэд дарга болох боломж ирсэн гэсэн үг. Хуулийн салбарын, нам төрийн чигийн л холбогдолтой зүйлүүд дээр ганц нэг дуугарахаас өөрөөр барагтай үг хэл болохгүй хүн юм.
Хуучинсаг, төрийн хар хүний л дүр төрхийг өөртөө бодон, тэр замдаа “тэтгэгдэж” явдаг бололтой. Иртэй, мөртэй үг хэл, Л.Мөнхбаатарын гэх үзэгдэл болохуйц үйлдэл, үг яриаг ер үзүүлэхгүй. Ердийн нэг тийм намбалаг маягийн хүн л яваад байх. Жишээлбэл, хуулиа сайн мэддэг, энэ агуулгаар илэрхийлэгдэх хүсэлтэй хүн гэдгээр ойлгогдох шинж төлөвтэй энэ хүний ярьчихаар, мэтгэчихээр зүйл нийгэмд тун их л харагдах юм. Мань эр дуугарахгүй ээ.
Дабль стандарт, нүүрсний хулгай, Боловсролын зээлийн сан гээд мундахгүй их сэдэв, шийдэл хүлээсэн асуудлууд байх. Л.Мөнхбаатар энэ бүхнийг эс дуулсан царайтай л намбайгаад байх. Аргач үгүй юм байх аа даа, эдгээр сэдвүүдэд ах нар нь, бойжуулсан улс төрийн эх баригчид нь энэ бүхэнд манлайлан оройлж байгаа болохоор хэлж ярьж чаддаггүй биз. Энэ учраас эдгээрийг ярьдаггүй юм байна гэж гэхэд, мөн сая хэлэлцээд баталж байгаа Сонгуулийн хууль, эмэгтэйчүүд, нийгмийн чигийн хуулиуд дээр УИХ-ын дэд дарга бас барагтай дуугарахгүй юм.
Хуралдаан зохион байгуулахаас яс төлөвлөн өгсөн удирдамжаар хааяа нэг Г.Занданшатарын суудалд сууж, хурал удирдахдаа л баахан сэтгэл хангалуун хүн үзэгдэх. Эрх мэдлийн, албан тушаалын өндрийн бахыг л мэдрээд байгаа болохоос, ард түмний өмнө хүлээсэн хариуцлага, төрийн түшээгийн ажлын мөн чанарынхаа үүднээс бах төрүүлэхээргүй л байгаа гишүүн.
Хүн танихдаа тааруу болоод байна гэж хүмүүс ярих. Энэ нь мөнөөх эрх мэдлийн бах ихдэж байгаагаас үүдэлтэй гэж нутгийнхан нь тайлбарлах. Зөвлөх О.Батчулуун нь анзаарч зөвлөчихөөр мэдрэмжлэг л гэх. Хэрэг дээрээ, Л.Мөнхбаатарын хамгийн их таньж байх ёстой асуудал нь хүн танихаа болихоос илүү, нийгмийн шударга ёсыг сахиулахыг л танин, таниулахад байгаа юм.
Нүүрсний дөчин их наядын хулгайн асуудлыг хянан шалгах Түр хороо одоо болтол сонсгол хийн хуралдаж чадаагүй чуулган завсарлах гэж байна. Л.Мөнхбаатар төрийн эрх барих дээд байгууллагын дэд даргын хувиар ч, өөрөө нүүрсэд хутгалдаагүйн хувьд ч, өөрийгөө хуульч гэж тоож явдгийн хувьд ч энэ асуудлыг бариад, гардаад явахад хамгийн дөт хүн баймаар. Гэтэл таг. Тагаар барахгүй нүүрсний хулгайн асуудлаар түүний хэлсэн дорвитой үгийн үнэр, түүх алга. Нэг иймэрхүү л бэлбэгэр хүн яваад байх.
Хууль тогтооход найман жил болж байна. Намын тухай хуульд санхүүжилтийг нь шилэн болгохыг яаравчлахаас эхлээд барьж аваад хийчих, оройлчих ажлууд шил шилээ даран хүлээгээстэй л үзэгдэх. Мань Л.Мөнхбаатар хааяа нэг мотоцикл тойрогтоо тараасан шигээ алхаад л. Хууль тогтоогчийн үйл, үг хэл тод байж, том бодлогыг төрүүлэх ёстой.
Лхагвын Мөнхбаатар хууль тогтоогч байж чадаж байна уу гэж асуувал, түмэн олон юу гэж хариулах бол! Хөвсгөлд дахин нэр дэвшвэл Хөвсгөлчүүд түүнийг дахин сонгохгүй татгалзах нь улс орны эрх ашигт нийцнэ.
Б.БАЯР
Amlalt.mn
