"Эрдэнэс силвер ресурс" компанийн захирал асан Т.Мөнхбаярыг АТГ-аас мөрдөн шалгаж дуусаад, прокурорт шилжүүлээд байсан. Тэгвэл прокуророос яллах дүгнэлт үйлдэн, Т.Мөнхбаяр нарын зургаан хүнд холбогдох хэргийг шүүхэд шилжүүлжээ.
Эргэн сануулбал, Ерөнхийлөгч асан Х.Баттулгын үед тэтгэврийн зээлийг тэглэх шийдвэр гарч байсан. Энэ үед "Эрдэнэс силвер ресурс" компанийн эзэмшилд байдаг Салхитын мөнгө, алтны ордыг эргэлтэд оруулснаар олох орлогын төрд ноогдох өгөөжийг барьцаалах замаар "Эрдэнэс бонд" босгож, үүгээр тэтгэврийн зээл тэглэх шийдвэрийг санхүүжүүлж байв.
Х.Баттулга Ерөнхийлөгчөөс буухынхаа өмнө зарлиг гаргаж, Т.Мөнхбаярыг Хөдөлмөрийн баатар цол тэмдгээр шагнасан байдаг.
Харин АТГ-аас Т.Мөнхбаярыг авлига, албан тушаалын хэрэгт холбогдуулж, "Эрдэнэс силвер ресурс"-ийн захирлаар ажиллаж байхдаа бусдаас их хэмжээний авлига авч, ААН-үүдийн үйл ажиллагаанд саад учруулсан гэх хэргээр мөрдөн шалгасан байдаг.
