Сонгогчид та бид өөрсдийн сонгосон УИХ-ын гишүүдээс үүргээ биелүүлэхийг шаардах цаг болжээ

Ардчилсан, чөлөөт сонгуулиар иргэдийнхээ саналаар сонгогдож, Монгол Улсын Их Хурлын гишүүний тангараг өргөсөн хүн бол нийт иргэн, улсын ашиг сонирхлыг эрхэмлэн, төрийн хуулийг дээдлэн сахиж, гишүүний үүргээ чин шударгаар биелүүлэх учиртай.

УИХ-ын гишүүн тангараг өргөхдөө төрийн сүлдний өмнө “нийт иргэн, улсын ашиг сонирхлыг эрхэмлэн, төрийн хуулийг дээдлэн сахиж, гишүүний үүргээ чин шударгаар биелүүлэхээ” илэрхийлдэг. Энэ бол зөвхөн ёслолын үйлдэл бус, ард түмний төлөөлөгчийн хувьд хүлээсэн хариуцлагын илэрхийлэл юм.

Гэтэл УИХ-ын чуулганы хуралдаанд гишүүд оролцохгүй байх, улмаар хэлэлцэх асуудлууд хойшлох нөхцөл үүсэж байгаа нь парламентын хэвийн үйл ажиллагаа болон төлөөллийн ардчиллын хэрэгжилтийн талаар анхаарах асуудлыг бий болгож байна.

Ялангуяа улсын төсөв хэлэлцэх, өвөлжилтийн бэлтгэл хангах, орон гарсан албан тушаалд томилгоо хийх зэрэг төрийн тасралтгүй үйл ажиллагааг шаардсан асуудлууд хүлээгдэж буй энэ үед УИХ-ын гишүүдийн хуралдаанд оролцох үүрэг, хариуцлага бүр ч тодорхой тавигдана.

Улс төрийн нам, бүлэг хоорондын байр суурийн зөрүү, улс төрийн тохиролцоо, маргаан байж болно. Парламентын гишүүн өөрийн байр суурь, эсэргүүцэл, шаардлагаа илэрхийлэх эрхтэй. Гэхдээ улс төрийн аливаа маргаан, байр суурийн зөрчил нь парламентын хууль тогтоох үндсэн үйл ажиллагааг тасалдуулах хэмжээнд, улс орны эрх ашгийг хойш татах хэмжээнд хүрэх ёсгүй.

Учир нь УИХ-ын гишүүн бол зөвхөн намынхаа бус, сонгогчдынхоо болон нийт иргэдийн төлөөлөгч юм.

Тиймээс УИХ-ын гишүүд өөрсдийн тангараг, Үндсэн хууль болон холбогдох хууль тогтоомжоор хүлээсэн үүргээ хэрхэн биелүүлж байгаа, чуулганы хуралдаанд оролцож байгаа эсэх талаар олон нийт бодит мэдээлэлтэй байх нь чухал.

Төлөөллийн ардчилал гэдэг нь сонгуулиар мандат авах төдий бус, сонгогчдынхоо өмнө хүлээсэн үүргээ парламентын танхимд өдөр бүр хэрэгжүүлэхийг хэлнэ.

Эрхэм гишүүн ээ, Та хэний төлөөлөгч вэ?

Эрхэм гишүүд ээ.

Та бүхэн нам, бүлэг, аливаа улс төрийн тохиролцооны төлөөлөгч болохоосоо өмнө сонгогчдынхоо өгсөн мандатаар Монгол Улсын Их Хурлын гишүүнээр сонгогдсон ард түмний төлөөлөгч гэдгээ ямагт санах учиртай.

Улс төрийн байр суурь, намын шийдвэр, бүлгийн бодлого, эрх ашгиг, хувийн амбициас үл хамааран улс орны нийтлэг эрх ашиг, төрийн тасралтгүй үйл ажиллагаа, сонгогчдын өмнө хүлээсэн үүргээ нэн тэргүүнд тавьж, парламентынхаа танхимд сууж, хуралдаандаа оролцон, хэлэлцэж буй асуудал бүрд байр сууриа илэрхийлэх нь УИХ-ын гишүүний үүрэг юм.

Сонгогчид оо, УИХ-ын гишүүдэд үүрэг, хариуцлагыг нь сануулъя

Сонгогчид та бид өөрсдийн сонгосон УИХ-ын гишүүдээсээ үүргээ биелүүлэхийг шаардах эрхтэй.

Хэрэв таны сонгосон УИХ-ын гишүүн чуулганы хуралдаандаа оролцохгүй байгаа, эсхүл улс орны нийтлэг эрх ашгаас илүүтэй нам, бүлэг, улс төрийн явцуу ашиг сонирхлыг урьтал болгож байна гэж үзэж байгаа бол өөрийн сонгосон төлөөлөгчдөө байр сууриа илэрхийлж, хариуцлагаа хэрэгжүүлэхийг шаардаарай. Үүний тулд сонгогч та УИХ-ын чуулгандаа суухгүй байгаа өөрийн сонгосон УИХ-ын гишүүд рүү дараах мессежийг илгээж болно:

“Эрхэм гишүүн ээ... Та сонгогч бидний өгсөн саналаар Монгол Улсын Их Хурлын гишүүнээр сонгогдож, нийт иргэн, улсын ашиг сонирхлыг эрхэмлэн, гишүүний үүргээ чин шударгаар биелүүлэхээ төрийн сүлдний өмнө тангарагласан. Улс төрийн нам, бүлэг, аливаа тохиролцооноос үл хамааран сонгогчдынхоо болон улс орны эрх ашгийг нэн тэргүүнд тавьж, УИХ-ын чуулганы хуралдаандаа тогтмол оролцон, хэлэлцэж буй асуудал бүрд байр сууриа илэрхийлж, хүлээсэн үүрэг, хариуцлагаа хэрэгжүүлнэ үү. Бид Таныг нам, бүлгийн эрх ашгийг урьтал болгохын тулд биш, төрийн эрх барих дээд байгууллагад бидний төлөөлөл болж ажиллахын тулд сонгосон. Тиймээс өргөсөн тангарагтаа үнэнч байж, сонгогчдынхоо өмнө хүлээсэн үүргээ биелүүлэн, УИХ-ын чуулганы хуралдаандаа оролцохыг шаардаж байна.” гэсэн мессежийг УИХ-ын гишүүдийн гар утас руу нь болон фэйсбүүк, Х-ийн хаяг руу нь илгээхийг УРИАЛЖ байна.

Төгсгөлд нь хэлэхэд иргэд сонгогчдоос УИХ-ын гишүүдэд өгсөн мандат бол тэдэнд хандсан итгэл юм. Иргэд, сонгогчдын тэр итгэлийн хариу нь УИХ-ын гишүүний хариуцлага байх учиртай гэдгийг эрхэм гишүүдэд сануулья...

Amlalt.mn