Хишгээгийн Нямбаатар завгүй байгаа. Угаасаа л завгүй байхаар ажил албанд томилогдсон хүн. “Орона”-гаа хэрхэх билээ, нүүрсний сонсголоо яадаг билээ, хөрөнгө оруулагчдын эрх ашгийг яажшуу хангадаг билээ, хэвлэл мэдээллээ яаж илүү зүгшрүүлэх билээ гээд үй түмэн ажлын дунд, үсээ үгтээж суугаа. Ойлгомжтой.

Дээр нь хууль ном, олон олон ажлын хэсгийн толгойлол, тойрог, Хэнтий, нутаг ус, ар гэр, амьдрал ахуй ер юу эс байх билээ, ёстой толгой өндийх завгүй байгаа. Гэхдээ ажиллахаас аргагүй, зүтгэхээс аргагүй.

Б.Ганхуяг бас “Далан зургуулаа нүүрсийн хулгайгаа ярья” гээд байдаг. Зовлон их ээ. Энэ их ажлын нь хажуугаар дайх үг бас байх. Эрүүгийн хуульд өөрчлөлт оруулахаар Х.Нямбаатар сайд УИХ-д өргөн барьж, төсөл. Ажил нь мөн л дөө. Арга байхгүй. Гэхдээн байна аа, энд асуудал байна аа. “Зарим гэмт хэргийг шинээр тусгах, хүрээлэн байгаа орчны эсрэг гэмт хэргийн улмаас үүсэх гэм хорыг бууруулах чиглэлээр холбогдох өөрчлөлтийг тусгах, хуулиар харьяалуулсан зарим гэмт хэргийн шинжийг Зөрчлийн хуульд заасан зөрчлийн шинжээс ялгаатай байдлаар хуульчлах, нийгмийн хор аюул үйлдэгдэж байгаа арга, хэлбэрээс хамаарч зарим гэмт хэрэг үйлдсэн хүн, хуулийн этгээдэд оногдуулах эрүүгийн хариуцлагыг оновчтой болгох”-оор тусгасан гэдэг заалт их “хортой” байна.

Энэ бол ерөөсөө л мэдээллийг хумих, айлган сүрдүүлэх, чөлөөт, олон ургалч зарчмын эсрэг агуулгыг шууд илэрхийлж байна. Товчхондоо “доромжлох” үйлдлийг гэмт хэрэгт тооцохоор, яллахаар хуульчлах гэж байгаа юм байна. Үзэл санаа, агуулга зөв өө.

Гэхдээ энэ бол угаас Иргэний тодорхой хуульд нэвт шингээд зохицуулагдчихсан эрх зүйн харилцаа. Гэтэл ингэж “эрүүжүүлэх” нь шүүмжлэлт, эрүүл дуу хоолой, үзэл бодлоо илэрхийлэх ардчиллын суурь үзэл санаатай зөрчилдөн нухчиж байна. Х.Нямбаатар сайд ширхэгтэй, сийрэгхэн дээ.

Намрын чуулганаар хэлэлцэх асуудлын дараалалд байхгүй ч, Г.Занданшатар хүсвэл, нэг л өдөр оруулаад хэлэлцчих энэ хуулийнхаа эдгээр агуулгыг танаж, өөрчилсөн нь, хасах нь ононо доо. Тэгээд энийгээ ил тод яриад. Эс тэгвэл нэг тийм нохой, дарсан, төөрөгдүүлсэн, нууж байгаад хийх гэж байгаа шиг сэжиг ужгийг төрүүлж байна.

Н.Учрал сайдыг яалаа, иймэрхүү агуулгын танагдалтай шинжийн хуулийн төсөл-гал бариулаад “алах” дөхсөн. Ингэж “алагдаж” мэдэхээ засаад Иргэний хуулийн зохицуулалтын дагуу иргэний хэргийн шүүхээр болон хэвлэл мэдээллийн өөрийн зохицуулалтын байгууллагаар шийдвэрлүүлэх арга зам нь өлзийтэй дээ, Х.Нямбаатар сайд аа.

Хэвлэлийнхэн, ер нь ард түмэн өөрт тань боломжийн таатай хандан, дэмжээд байгаа шиг харагдсаар байна. Сонгууль ч дөхчихөж. Илүү чухалтайгаа зууралд аа, сайд аа, нүүрсийн хулгай, нүүрсийн хулгай...

Х. Нямбаатар сайд асуудлаа эрэмбэлчихнэ дээ.

Б.БАЯР

Amlalt.mn