Өчигдөр УИХ-ын чуулганаар Засгийн газраас өргөн мэдүүлсэн Нийслэл Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах тухай хуулийн төсөл болон хамт өргөн мэдүүлсэн хуулийн төслүүдийн анхны хэлэлцүүлэг боллоо.
Энэ үеэр дээрх хуулийн төслийг дагалдуулан хамт өргөн мэдүүлсэн хуулийн төслүүдийн эхэнд МОНГОЛ УЛСЫН АВТОТЭЭВРИЙН БОЛОН ӨӨРӨӨ ЯВАГЧ ХЭРЭГСЛИЙН АЛБАН ТАТВАРЫН ТУХАЙ ХУУЛЬД ӨӨРЧЛӨЛТ ОРУУЛАХ ТУХАЙ-д Улаанбаатар хотод бүртгэлтэй автомашины татварыг 2024 оны 01 сарын 01-ны өдрөөс хоёр дахин нэмэгдүүлэхээр төсөлд тусгасныг та харж байна.
Товчхондоо Хотын дарга Х.Нямбаатар Засгийн газраар дамжуулан УИХ-аар батлуулахаар өргөн мэдүүлсэн “Нийслэл Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах тухай хууль”-ийн төслийг дагалдуулан ийнхүү Улаанбаатар хот дах тээврийн хэрэгслийг татварыг нэмэх хуулийг оруулж ирж, УИХ-ын чуулганы анхны хэлэлцүүлгээр дэмжжээ.
Ингэж нийслэлд бүртгэлтэй автомашины татварыг хоёр дахин нэмэгдүүлэх нь замын түгжрэлийг бууруулахад бодит хувь нэмэр оруулах, улмаар татвараас олсон орлогоор зам гүүр барих ажлыг өргөтгөх зорилготой гэдэг агуулгыг Хууль санаачлагч тал болох Засгийн газар /Нийслэлийн удирдлага/ оруулж ирж буй бололтой.
Гэхдээ нөгөө талаас иргэдийн амьжиргааны түвшин доогуур, ажилгүйдэл их байгаа энэ цаг үед автомашины татварыг нэмэх нь хэр оновчтой шийдэл вэ? Нөгөө талаас Улаанбаатар хотод бүртгэлтэй автомашины татварыг нэмснээр замын түгжрэл хэдэн хувиар буурах талаар ямар судалгаа тооцоо байгаагаа хууль санаачлагч нар олон нийтэд мэдээлэн, хэлэлцүүлэг өрнүүлэх нь зүйтэй болов уу?
Түүнээс биш, эрхэлсэн ажилгүй приустай иргэд “халтуур” хийх нэрээр автомашины хотын төвөөр холхиж түгжрэл үүсгэж байна гэж дүгнэх нь өрөөсгөл.
А.Галт
AMLALT.MN
