Хорин оны сонгуулиар хамгийн дуулиантай сонгогдсон гишүүн. Сонгууль болохоос өмнө баривчлагдсан. Хориотой, түгжээтэй байгаад л Сэлэнгээс сонгогдсон. Сонгогдчихоод багагүй хугацаанд хориотой байгаад суллагдсан.
Уг нь түүнийг сонгуулахгүй л гэж хорьсон болов уу. Гэвч сонгогдоод гараад ирснээрээ Сэлэнгийн ард түмний хайр хүндэтгэлийг татсан байсан бай. Түүнийг ердөө нэг сонгогдоход нь Сангийн сайдаар өөд татсан хүн бол М.Энхболд. Улмаар, ерөөсөө хоёр дахиа сонгогдоход нь Ерөнхий сайд болгоод л, Бүлгийн дарга С.Бямбацогт, Ж.Мөнхбат нараа давуулаад, мөн л М.Энхболд дарга Ерөнхий сайд болгосон.
Ердөө жил гаруйхан л Ерөнхий сайд хийж, манай Ерөнхий сайдуудын жишиг хугацаат ажлыг нэгэнтээ хийсэн. М.Энхболд даргынхаа хайрыг их татаж Ерөнхий сайд болж, тэргүүн тоглогч болсноороо л бусдынхаа дургүйг хүргэж, улмаар нөгөө газарт хорих хэмжээнд адлагдсан даа.
Гэвч Сэлэнгийн ард түмний хайр ивээлээр эдүгээ гурав дахиа УИХ-ын гишүүн хийгээд яваа нь үнэн юм. Энэ удаа гишүүн байх эл хугацаандаа Ж.Эрдэнэбат хаана “яваа” нь мэдэгдсэнгүй. Индэрт нэг олигтой үг хэлсэнгүй, эрх дарх үзэж явсан хүн байна даа, шаралхмаар юм, үнэн тод дуугараад, Ерөнхий сайд байсан хүн шиг бодлогын хэмжээнд ярьж, нам засгийн тухай шүүмжлэл, магтаалын алиныг нь ч дуугарсангүй. Нэг үгээр хэлбэл ус балгасан мэт дуугүй явж ирлээ.
Намынхандаа гомддог юм уу, дахиж бариад хийчихнэ гэж айдаг юм уу, энэ хүн үнэндээ байгаа нь мэдэгдэхгүй сүүлийн жилүүдийг тууллаа. Сэлэнгэдээ бол яваад байх шиг байдаг.
Гэхдээ өнөө хоёр гишүүнтэйгээ, Д.Өнөрболор, Ч.Ундрам хоёртойгоо тийм ч таатай биш харилцаатайгаар нийгэмд ойлгогдсон байдаг. Дотоод сэтгэл оюун нь л нэг тийм шархалмал болсон хүн шив дээ гэж УИХ-ын гишүүд нь хэлэлцэцгээх юм билээ.
Улс оронд нүүрсний их хулгай, шамшигдуулал, шударга бусын өчнөөн л олон явдал болж байна. Ж.Эрдэнэбат үнэндээ таг дуугүй. Ерөнхий сайд Л. Оюун-Эрдэнэ худал хулгайтай тэмцээд байна.
Ж.Эрдэнэбат өөрийн нь Ерөнхий сайд явсан үеэс л эл асуудлууд улбаатайг мэдэж байгаа. Өөрөө л буруутай, өөхшүүлж байгаагүй юм бол Л.Оюун-Эрдэнэтэйгээ нийлээд тэмцмээр юм. Тийм зөв өнцөг, идэвх нэр хүнд үгүй байна.
Ер нь мань хүнийг дахиж нэр дэвшүүлэхээргүй, нэг тийм унамал үйл ажиллагаатай гишүүн бол Ж. Эрдэнэбат болж. Нэг бол аймгийнхаа дарга, санхүүгийн дарга явсан үеэ санагалзаж бодсон шигээ Сэлэнгээрээ явдаг юм болов уу.
Тэр ажлуудаа хийнэ ч гэж боддог юм болов уу. Ерөнхий сайд байсан хүн уг нь том л баймаар. Танхимын нь сайд явсан Н.Номтойбаяр гэхэд тамиртайхан “үзэхээр” сонгуульд бэлдэж байгаа гэх.
Ж.Эрдэнэбат аа, их улс төрдөө тогло оо, эс чадвал гар аа гээд нийгэм “хэлж” байна шүү.
Б.БАЯР
