Далан насыг хэдийнэ зооглосон энэ эрд Ардын нам ач буянаа харамгүй өгсөн дөө. Дэд сайдаас сайд хүртэл хийв. Гурван удаа хууль тогтоох дээд байгууллагад нэр дэвшүүлж сонгууллаа. Баян-Өлгийн ард түмэн нь дэмжээд байдаг болохоор сонгогдоод байдаг биз.
Ухнаагийн Хүрэлсүх нэгэнтээ Барилгын сайдаар томилоод төв цэвэрлэх байгууламжийн асуудлыг Х.Баделхан хар толгойгоороо хариуцна гээд л дэвшүүлж байв.
Х.Баделхан эрх мэдэл, албан тушаалд өнө удаан, хишиг буян төгс байгаа шигээ Өлгийн ард түмэндээ хэр наалдацтай ажиллаж, ач буянаа өгөв гээд асуувал мань эрийн тухайн тийм өндөр сайхан үнэлгээ хэлэх болов уу?
Хамгийн наад зах нь “Жол” гэдэг компанийн нь эрх ашгийн асуудал байнга бичигддэг. Сүүлийн дөрвөн жилд дөчин тэрбумын тендер авчээ гэхээс эхлүүлээд цахим мэдээллийн орой зай, хэвлэлийн хуудсанд бишгүй гардаг. Тендер авч болно л доо. Бололгүй л яах вэ.
Гэхдээ УИХ-ын гишүүний өндөр сэнтий эзэгнэсэн Х.Баделханы мэдээлэлд дөт, эрх мэдлийн жолооны үзүүргүйгээр ийм том дүнтэй тендерүүд түүний хамааралтай, хүүтэйгээ эзэмшдэг компанид үргэлж олдоод байдаг нь хардах үндэслэл гарцаагүй мөн. Шалгах ч ёстой асуудал. Авч ажил гүйцэтгэсэн объектууд нь тэр л чигтээ Баян-Өлгий аймгийн нутаг дэвсгэр дээр юм билээ.
Баян-Өлгийд хийгдэх ажлыг Х.Баделханы “Жол" л гүйцэтгэж байх учиртай гэсэн шиг зэс дэс үзэгдэх. Баян-Өлгийнхөн нь ч Х.Баделханы минь компани л хийлгүй яах вэ гэж хардаг шигээр ойлгогдох эх сурвалжтай.
Уг нь Баян-Өлгийд Баделийн компанитай дүйцэхүйц ажил үйлээ хийгээд явдаг компаниуд байдаг л байх.
Гэхдээ л “Жол” ингээд түрээд ажиллаад байдаг нь Х.Баделханы л бад бах, хүч нөөлөг, орон нутаг дах засаглал гэж харагдахыг хэн ч зөвшөөрнө буй за.
Х.Баделхан гэдэг гишүүн одоо нэг ёс зүй, төр болоод хувийн эрх ашгийн огтлолцлуудаа ард түмнээр, олон нийтээр сорилжиж, тестэлж ойлгох цаг ирсэн байх аа.
Хууль тогтоогоод, ханцуй шамлаад давшлахгүй. Үг нь тодгүй, үйлс нь харагдахгүй. Манлайлал болоод зарчмыг мэдүүлэхгүй. Хүндэтгэл хийгээд үнэмлэхүй зөвшөөрөгдсөн байдлыг үзүүлэхгүй. Ердийн дундаж.
Ийм л тодорхойлолт Х.Баделханд хамаарч байна. Баян-Өлгийг эдүгээ сонгуулийн бүсчилсэн хуваарилалтаар нэг тойрог болгосон. Х.Баделхан дахиад л гараад ирэх юм бодож байгаа байх даа. Баян-Өлгийнхөн ухаантай хандах байлгүй дээ. Баян-Өлгий аймагт асуудал дүүрэн байгаа.
Монгол улсын үндсэн хэлээ хүртэл янз бүр мэдэж байгаа. Аялал жуулчлалын том бүс атал эко байдал, үйлчилгээ, байгалийн аюулгүй байдлыг анхаарахаас эхлээд асуудал дүүрэн. Шинэ менежмент хэрэгтэй байгаа. Газар нутгийн нэр өөрчилсөн Баян-Өлгийн дарга нарын асуудал шүүх дээр яваа байх аа. Ингэтлээ хууль ёсыг завхруулж болохгүй л дээ.
Х.Баделхан энэ аймгаас өдий төдий сонгогдчихоод, хууль тогтоох дээд байгууллагад ингэтлээ удаан суух атал тойрогт нь, аймагт нь ийм түвшинд хэл ам, асуудал үүсээд байгааг хэрхэн ойлгох ёстой вэ.
Х.Баделханыгаа байлгаад байх юм уу, яах юм, шинэ залуус сонгох уу гэдэгт Баян-Өлгийнхөн л хариулт өгнө дөө.
Б.ДОРНО
Amlalt.mn
