УОК-оос цаг үеийн нөхцөл байдалтай холбогдуулан мэдээлэл хийлээ. Энэ үеэр Шадар сайд, УОК-ын дарга С.Амарсайхан мэдээлэл өглөө.
Тэрээр "Өнөөдөр зургаан бүлэг 21 аймагт ажиллаж байна. Төмөр зудтай 50 сум, цагаан зудтай 135 суманд Засгийн газрын нөөцөөс 14 мянган тонн өвс тэжээл хүргэсэн. 116 мянган айл өрхөд 1700 тонн хүнсний бүтээгдэхүүн, бусад тусламжийг хүргэж байна.
Зудын гамшигтай холбогдуулан өндөржүүлсэн бэлэн байдал зарлахад анх 52 мянган км зам гаргах шаардлагатай гэж байсан. Өнөөдрийн байдлаар 97 мянган км авто замыг нээгээд байна. Хамгийн сүүлд л гэхэд цэргийн хүчнийхэн 188 өрхийн гэр хашааг цаснаас гаргаж, 116 өрхийг нүүлгэсэн.
Дорнод, Дорноговь, Сүхбаатар, Хэнтий, Төв зэрэг аймаг найман мянган тэжээлийн буудай худалдан авах ажил зохион байгуулж байна. Цаашдаа айл өрхүүдэд тэжээл буудай хүргэх ажлыг шуурхай зохион байгуулна. Тэжээлийн хангалт нийлүүлэлт тийм сайн биш байна. Үнэ, тээвэрлэлтийн асуудал байна.
Иргэдэд тусламжийн бараа бүтээгдэхүүнийг хүргэх асуудалтай холбоотой ташаа мэдээлэл гарч байна. Иргэдийн тусламжийн мэдээлэл ч зөрүүтэй гарч байна. Аймаг орон нутгийг нам, эвслээр нь ялгах, замаас нь завшиж байна зэргээр бодит бус мэдээллийг дайны хажуугаар дажин гэдэг шиг гаргаж байна. Ялгавартай хандаж байна гэдэг асуудал цаашид байж болохгүй. Үнэн бодитой мэдээллийг цаг тухай бүрд нь хүргэх, хэрвээ үнэхээр асуудал гарвал хуулийн хариуцлага тооцох арга хэмжээ авахыг холбогдох албаныханд даалгасан.
Зургаан шуурхай бүлэг иргэдэд тусламж үйлчилгээ хүргэж байна. 350 өрхөд эрүүл мэндийн тусламж үзүүлсэн. 12 сумын Эрүүл мэндийн төвд стандартын шаардлага хангасан, туулах чадвартай автомашиныг ЭМЯ-аар дамжуулан хуваарилж байна.
Иргэд олон нийт, олон улсын байгууллага хандивт оролцож байна. Өнөөдрийн байдлаар 3.1 тэрбум төгрөгийн хандив цуглараад байна. 800 сая төгрөгийн бараа бүтээгдэхүүн цугларсан. Тайлан тооцоог цахимаар олон нийтэд ил тод мэдээлж байгаа.
Олон улсын донор байгууллагуудаас 3.2 сая ам.долларын тусламж ирсэн. Олон улсын байгууллагууд өөрсдөө зудад нэрвэгдсэн айл өрхүүдэд бэлэн мөнгөний тусламж үзүүлж байна.
Сүүлийн 10 хоногийн нэгтгэсэн мэдээллээр гурван сая толгой мал хорогдсон байна. Маргааш хорогдсон малын тоо шинэчлэгдэнэ" гэлээ.
