Жадамбын Бат-Эрдэнэ гишүүн ногоон автобусны асуудлаар сонсголыг удирдах нь. Энэ хүн хоёр ч удаа УИХ-ын гишүүнээр сонгогдон ажиллалаа. Сайн биш гэхэд муу биш гишүүн. Хөгжлийн банкны сонсголын үеэр ч асуудлыг зарчмын үүднээс голчтой ярьж, зөв оролцоотой байсан.
Саяхан одоо л чухам Монголынхоо мал аж ахуйг шинэ бодлогоор удирдах эрх зүйг бүтээмээр байна гээд ярьж байгаа нь ч зөв юм. Монголын улс төрд тун тааруу түшээд овоорч, нэр хүнд үнэгүйдэж, элдэв хэрэгт хутгалдах нь элбэг болсон.
Ж.Бат-Эрдэнийн тухайтад, ямарваа муу муухайтай нэр холбогдоогүй, харьцангуй цэвэр өнгө илэрхийлэлтэй маш цөөхөн гишүүний нэг.
Гэхдээ хүн л болсон юм алддаг л даа гэгчээр, залуу бүсгүйтэй цээж нүцгэн, төрсөн өдрийн “тоорцогтой” зургууд нь нэг хэсэг хэвлэл мэдээллээр гарсан нь бас л сэвтэл болсон.
Өрсөлдөгч нь, хамт Булганаас сонгогдсон хүмүүсийн явуулга шигээр ойлгогддог. Гэхдээ л эдүгээ улс төрд хамгийн зөв байж, зарчим, ёс зүйн үлгэрийг л төгөлдөр үзүүлж байж бэхэжнэ. Том болоод хойчийн сайн улс төрчийн өвийг үлдээх ёстой юм. Ж.Бат-Эрдэнэтэй хамт сонгогдсон хүн дөрвөн жил Монголоор нэг шуугиуллаа. Ёс зүй болоод бусад олон асуудлаар.
Энэ хэрээр Ж.Бат-Эрдэнийг шинжин ажих нийгмийн хараа тусгал их байсан. Үүнд Ж.Бат-Эрдэнэ онц байгаагүй гэхэд муу байгаагүй нь үнэн юм. Шунал багатай, төрөөр мөнгө хийсэн бусад олон нөхдөөсөө ялгарч л байгаа хүн. Ж.Бат-Эрдэнэ ингэж мөнгө идэж, тэгж зувчуулав гэж сонсогдсонгүй. Зам тээврийн сайд хийж асан үед нь яам дээр нь хүн амины хэрэг гарсан. Тэгээд ажлаа өгсөн. Уг нь зам тээврээ ойлгож ухаарсан л хүнээр мэдэгддэг.
Хэлэх ярих нь харьцангуй зөв, нийгмийн оюун санаанд итгэж болохоор ойлгогдсон ийм нэг гишүүн одоо гурав дахь сонгуулийн нүүрийг үзэх гэж байна.
Эрдэнэт, Хөвсгөл, Булган нэг тойрог байгаа. Ж.Бат-Эрдэнэ энд энтэй харагдаж мэдэх л юм. Гэхдээ энэ гурван аймгийн бүсчлэл гэж ямар дэвшилт, хөгжилтийг агуулж нэгтгэх учиртайв гэдгийг л тун чиг нарийн бодож, төлөвлөж, хууль тогтооход ажиллах зүйлээ ярьж байж л сонгогдоно доо.
Гэхдээ нэр дэвших эрхийн өмнө ногоон автобусны асуудлыг нийгэмд нэн тод ярьж, хулгайг ард түмнээсээ хийж огт болохгүйг нэн шинээр тунхаглах ажил Ж.Бат-Эрдэнийг хүлээж байна.
Б.ДОРНО
Amlalt.mn
