Хураасан, цуглуулсан нь улсаасаа баян. Хадгаламж, хөрөнгө нь хэдэн аймгийн иргэдийн хадгаламжаас давсан. УИХ-ын гишүүн хэмээн хорин жил ноёлсон улс дахиад л УИХ-д дүүрэн дэвшлээ.

Эрх баригч намын дарга Л.Оюун-Эрдэнэ нэг хэсгийг нь хазаарласан ч, баруун аймгуудад яах аргагүй дийлдэх шиг боллоо. Яамдыг сэлгээний морь шиг зайдалж, Үндсэн хуулийг дуртай үедээ өөрчилөн, өөрсдөдөө зориулан суудал засан, төрийн баялагийг мэдээлэлд ойр, эрх мэдэлд дөтийнхөө боломжоор хуу тоносон хүмүүс

Баруун бүсийг дахин банжиж, ард түмнийг өөрсдөдөө зориулсан хамжлага мэт аашилж байна. Аашилсаар хорин жил болов. ЖДҮ, тендер, концесс, Хөгжлийн банкны зээл гээд бүхий л боломжийг ард түмнийхээ өмнүүр хэрэн орж, асман азарга шиг хасан хөөж, бүгдийг өөртөө наадаг.

Тэдэнд хууль хяналт, шүүх засаглал огтхон ч падгүй. УИХ-ын гишүүний бүрэн эрхийн малгайн дор дураараа тонгочиж, дээгүүр харан ихэрхэж, өмхий үл тоогсдоор долоолгон, тэсрэх бөмбөг бариулахад хамт тэсрэх бэртэгчин, биеэ худалдагсдаар хулдан хуягласан, Монголын төрийг эцээгсэд Баруун бүсийг хачиг шиг ноолон дахин сонгогдохоор улайрч байна.

Эрх мэдлээрээ лаахайдан өөрсдөдөө, өөртөө наасаныг нь далайн эн гүйцэхээргүй байгаа ч, энэ улсдаа, энэ орондоо бүтээн байгуулалт, хөрөнгө оруулалт наахгүй байгааг ганц дулааны станци барьчихгүй байгаагаас нь харахаас илүү яаж нотлох юм бэ.

Эрдэнэбүрэнгийн станци гээд хорин жил ярьлаа, өнөөдөр л сонгогдоотохвол л яг хийчих гээд байна гэсээр зам, эрчим хүчийг эрхшээн Монголын төрийн сэнтийг хотойтол суугсад үнэндээ юу ч хийсэнгүй.

Төрийг саан, төрийг унан, төрийг эдлэн олсон мөнгөөрөө бүгдийг худалдаж авдаг, гуйланчлал, эрх чөлөөгүйдлийг эдийн засаг хяхах замаар баяжсан эдгээр хүмүүсийг сонгохгүй байх нь ард түмний язгуур эрх ашиг байгааг бүгдээрээ ухаарах хэрэгтэй. Махатма Гандигийн үг байдаг. Зарчимгүй улс төр, хөдөлмөрлөөгүй олсон баялаг бол нүглийн дээд гэж.

Баруун аймгуудын ард түмэн зарчимгүй улс төр, жинхэнээр хөдөлмөрлөөгүй баячууд, олигархиудын нухчигдалд автах ёсгүй. Юуны төлөө эх оронч, ойрад, зүүн гарынхан билээ дээ. Хуу солих хэрэгтэй.

Соён гийгүүлэгч Л.Түдэв хэлсэн. Худалч хулгайчид, дээрэмчид дээр нь өтгөн шингэнээ асгаж байгаа ард түмнээ яалтайв, доромжлолд ханах болоогүй юу гэсэн байдаг. Хэлэх үг алга гэсэн байдаг.

Баруун аймгийн ард түмээн, ухаараач, сэнхрээч.

Б. ДОРНО