“Эрх чөлөөний эвсэл” намаас өнгөрсөн бямба гарагт /2025.01.11/ олон нийтийг хамарсан жагсаал цуглааныг зохион байгуулсан боловч тэдний шаардлага, зорилго “ойлгомжгүй” байв. Тэд “Засгийн газар” огцор гэсэн шаардлагыг тавьж байгаа гэх боловч эл жагсаалд оролцогчдын дунд Засгийн газрыг огцруулах шаардлагагүй, түүний оронд “Утааг бууруул, татвараа багасга, замын түгжрэлийг арилга, Хотын даргад хариуцлага тооц” гэсэн шаардлагыг тавьж жагсаалд оролцогчид олон байлаа.
Хэдийгээр жагсал цуглаан зохион байгуулж, үзэл бодлоо чөлөөтэй илэрхийлэх нь ардчилсан нийгмийн язгуур эрх мөн боловч жагсалчдын тавьж буй шаардлага, зорилго тодорхойгүй, нэгдсэн зохион байгуулалт байхгүй, амралтын өдөр учир төрийн ордонд албан хаагчид байхгүйг мэдсээр байж төрийн ордон руу орох гэж хүч түрсэн, бодит эрүүл, хэрэгжихүйц шаардлага тавьж түүндээ нэгдэж чадаагүй байгаа нь ажиглагдлаа.
Мөн нэг хүний эрх нөгөө хүний эрхээр хязгаарлагддаг ардчилсан үзэл баримтлалыг хүндэтгэж, авто зам болон тээврийн хэрэгслийн үйл ажиллагаанд саад болохгүй байхад анхаарах ёстой байсан ч жагсагчид Төв шуудангийн урд дөрвөн замын уулзварыг хааж, цагдаа, эмнэлэг, онцгой байдлын автомашин, нийтийн тээврийн үйл ажиллгаанд саад учруулж бусдыг эрхийг бүдүүлэгээр зөрчсөн үйлдлийг гаргаж байв.
Хэдхэн сарын өмнө болсон УИХ-ын болон Орон нутгийн сонгуулиар МАН-ыг дэмжиж саналаа өгсөн иргэдийн саналд тулгуурлан байгуулагдсан УИХ, Засгийн газар, Хотын удирдлагыг “тар, огцор” гэхээс илүүтэй бодит байдал дээр хэрэгжихүйц шаардлага тавих нь зүйтэй мэт санагдсан. Учир нь Засгийн газар огцрсноос хэн илүү хожих вэ гэдгийг хэрсүү ард түмэн та бид эрүүлээр харж бодох цаг хэдийнэ болсон.
Тухайлбал, хулгай худал, гэмт хэрэг, ёсзүйн зөрчил гаргасан нэр холбогдсон УИХ-ын гишүүдийг эргүүлэн татах хууль санаачилж батлуулан хэрэгжүүлэх, нийгмийн даатгал болон хувь хүний орлогын албан татварыг хувь хэмжээг бууруулах, автомашины татвар, зам ашигласны төлбөрийн хэмжээг багасгах, авлига албан тушаалаа урвуулан ашиглаж хөрөнгөжсөн улстөрчид, албан тушаалтны хөрөнгө орлогыг төрийн өмч болгох хуулийг УИХ-аар батлуулах, Хууль хяналтын байгууллагын алба хаагчид, шүүгчдийг шударга ажиллахыг шаардах, эс чадвал албан тушаалаас нь чөлөөлдөг шударга шуурхай механизмыг бий болгох зэрэг шаардлагыг тавьж жагсан, үүнийгээ хэрэгжүүлэх боломжийг бий болгосон бол иргэд олон нийт, нийгэмд ашиг тустай үйл хэрэг болох байлаа. Ийм бодит шаардлагууд тавьсан бол тэдгээрийг дэмжиж Сүхбаатарын талбай дээр очих иргэд олон байсан биз.
Тиймээс цаашдаа жагсаал зохион байгуулж буй нам эвсэл, холбоо, ТББ-ууд анхнаасаа бодит хэрэгжихүйц, иргэдийн ажил амьдралд тус нэмэр болохуйц шаардлага тавьж түүнийгээ улс төрчид, Засгийн газарт, УИХ-д хүргэж ажиллах нь чухал болж байна.
М.Баатар
Amlalt.mn
