Хуучин автобусыг Солонгосоос худалдан авч, Вьетнамд аваачиж будаж янзлаад төрд өндөр үнээр “шахах” гэж байсан Нийслэлийн тухайн үеийн удирдлагууд болох Хотын дарга асан Д.Сумъяабазар, “Түгжрэлийн сайд” Ж.Сүхбаатар нарын нэр бүхий 24 хүнд холбогдох эрүүгийн хэргийн анхан шатны шүүх хурал энэ өдрүүдэд болж байна.
Шүүх хуралдааныг анхнаас ажиглахад шүүгдэгчид бүгд буруугүй, явж явж “ногоон автобус өөрөө буруутай” болох шинжтэй болоод явчихаж байна.
Дашрамд сануулахад НЗДТГ-аас Евро 5 хөдөлгүүртэй их багтаамжтай автобус худалдан авах гэрээг 2023 оны 01 сарын 17-ны өдөр “Тэнүүн Огоо” ХХК-тай байгуулсан байдаг бөгөөд “Тэнүүн Огоо” ХХК нь мөн оны 7, 8 сарын ихээр оруулж ирсэн 20 автобусыг Нийслэлийн Нийтийн тээврийн газрын дарга С.Жавхлантбаатарын тушаалаар байгуулсан, газрын дарга н.Мөнхболдоор ахлуулсан 15 хүний бүрэлдэхүүнтэй Ажлын хэсэг хүлээж авахаар 2023 оны 08 сарын 14-ны өдөр ажилласан байдаг.
Тухайн ажлын хэсэг ажилласан өдрөө эдгээр автобусыг хүлээн авах боломжгүй гээд тарсан боловч орой нь дарга нарын “заавраар” Ажлын хэсгийн нарийн бичгийн дарга комиссын гишүүдтэй нэг бүрчлэн биечлэн очиж уулзан “дарга нараас ирсэн чиглэл, яаралтай зурахгүй бол автобусны санхүүжилт нь зогсох гээд байна, 9 сард хичээл сургууль эхлэх үеэр нийтийн тээврийн үйлчилгээнд гаргаж амжихгүй болох гээд байна” гэх шалтгаанаар гарын үсэг зуруулсан байдаг.
Шүүх хуралдааны үеэр өмгөөлөгчдийн асуусан асуултанд хариулсан зарим шүүгдэгчдийн хариулт тайлбараас ишлэе.
- “Тэнүүн Огоо” ХХК-ийн захирал А.Ганхуяг Автобусыг хүлээлцэх ажлын хэсгийн гишүүдэд тайлбарлахдаа “эдгээр автобусууд хэдийгээр Евро-2 хөдөлгүүртэй боловч нэмэлт төхөөрөмж суурилуулснаар Евро-5 хөдөлгүүртэй ащдилхан стандарттай болох боломжтой” гэж тайлбарлаж байжээ.
- Түгжрэлийн сайд асан Ж.Сүхбаатар хэлэхдээ “Миний хувьд төсвийн ерөнхийлөн захирагчийн хувиар автобус худалдан авах эрхийг хуулийн дагуу Нийслэлийн Засаг даргад 2022 оны 12 сард шилжүүлсэн. Үүний дагуу 2023 оны 1 сард Нийслэлийн Засаг дарга “Тэнүүн Огоо” ХХК-тай автобус худалдан авах гэрээг байгуулаад ажилласан байдаг. Хэрэв намайг буруутай гэж үзвэл ингэж эрх шилжүүлсэн төсвийн ерөнхийлөн захирагч бүхэн буруутай болох биш үү гэв.
- Автобус хүлээн авах ажлын хэсгийн бүрэлдэхүүн 15 хүнийг хэрхэн сонгож томилсон талаар өмгөөлөгчийн асуусан асуултанд Нийслэлийн нийтийн тээврийн дарга С.Жавхлантбаатар хариулахдаа “Манай байгууллагын хэлтсийн дарга нараас ирсэн саналд үндэслэн тушаалыг нь албажуулж би гарын үсэг зурсан, энд ийм тийм хүнийг оруул гэсэн чиглэл заавар өгөөгүй” гэв.
- Харин Ажлын хэсгийн ахлагч н.Мөнхболд хариулахдаа “С.Жавхлантбаатар даргын зүгээс ингэ тэг гэсэн тушаах зааварчилгааг шууд өгч ажилласан” гэв.
- 2023 оны 8 сард Нийтийн тээврийн газрын дарга С.Жавхлантбаатарын гарын үэсэгтэй “Тэнүүн огоо” ХХК-д хандсан 8 заалт шаардлага бүхий албан бичигт тэдний нийлүүлсэн автобусны хөдөлгүүр гэрээнд заасны дагуу Евро-5 хөдөлгүүртэй биш байгааг дурдсан тухай өмгөөлөгчийн асуултанд С.Жавхлантбаатар хариулахдаа “би өмнөх мэдүүлэгүүддээ ч хэлсэн, ийм бичиг гаргаагүй, огт мэдэхгүй байна” хэмээв. (Түүний албан тушаал, нэр, гарын үсгийг хэн нэгэн дуурайлган зурсан гэсэн үг үү?)
- Ногоон автобусыг техникийн тодорхойлолтонд заасан 7 үзүүлэлт нь үйлдвэрийн горимд үйлдвэрлэгдээд ирэх ёстой байсан уу эсвэл энд нэмэлтээр суурилуулах ёстой юу гэсэн асуултанд “Тэнүүн Огоо” ХХК-ийн захирал А.Ганхуяг хариулахдаа 1 нь үйлдвэрлэлийн горимд үйлдвэрлэгдэх ёстой, бусад чиглэл заах лед дэлгэц зэрэг 6 зүйлийг энд нь угсрах ёстой байсан гэв.
- Хэдийгээр Евро-2 хөдөлгүүртэй байсан боловч орох хаалганы дэргэд Eвро-5 гэсэн төмөр пайз наасан байсан гэдгийг ажлын хэсгийнхэн хэлэв.
Amlalt.mn
