Татвар төлөгчдийн 134 тэрбум төгрөгийг хулхи ногоон автобус худалдан авч, төр түмэнд их хэмжээний хохирол учруулсан “Хулхи ногоон автобус”-ны хэргийн шүүх хурал сүр дуулиантай болсон ч гарсан шийдвэр нь ядмаг байлаа.
Монгол Улсын сайд, Нийслэл Улаанбаатар хотын авто замын түгжрэлийг бууруулах Үндэсний хорооны даргаар ажиллаж байсан УИХ-ын гишүүн асан, Ногоон автобусны Ерөнхийлөн захирагч Ж.Сүхбаатарыг шүүх гэм буруугүй хэмээн цагаатгаж, “Тэнүүн Огоо” ХХК-ийн захирал А.Ганхуягт 6 жилийн хорих ял, Нийслэлийн нийтийн тээврийн дарга асан С.Жавхлантбаатарт 3 жилийн хорих ял, Ногоон автобус худалдан авах Ажлын хэсгийн гишүүн н.Чойжилсүрэнд 2.6 жилийн хугацаагаар зорчих эрхийг хязгаарлах ял, х.Баярмаад 2 жилийн хугацаагаар зорчих эрхийг хязгаарлах ял тус тус оноож шийдвэрлэлээ.
Ногоон автобусны хэргээс болж Хотын даргын ажлаа өгсөн Д.Сумъяабазар таг чиг байсан ч энэ хэрэг шүүхээр шийдвэрлэгдсэний дараа олон нийтийн өмнө “гэнэтхэн” гарч ирээд, Ногоон автобустай холбоотой сэтгүүлчийн асуултанд хамтран зүтгэгч асан, Түгжрэлийн сайд асан Ж.Сүхбаатарыг “буруутгав”.
Үнэндээ хууль ёс хэрэгждэг улс оронд бол Ж.Сүхбаатар ч, Д.Сумъяабазар ч аль аль нь энэ хэргээс хуулийн хариуцлага хүлээх ёстой.
Төсвийн тухай хуулиар төсвийн Ерөнхийлөн болон Шууд захирагч төсвийн эрхээ бусдад шилжүүлсэн нь хариуцлагаас мултрах шалтгаан болдоггүй.
Энэ тухай Төсвийн тухай хуулийн 6.6.3-т “төсвийн захирагч нь өөрийн эрх, үүргээ доод шатны төсвийн захирагчид шилжүүлж болох боловч энэ нь түүнийг хариуцлагаас чөлөөлөх үндэслэл болохгүй” гэж заасан байдаг.
Хуучин ногоон автобусыг шинэ автобусны үнээр авах гэж байсан “гэмт хэрэг”-ийг Ж.Сүхбаатар, Д.Сумъяабазар нар мэдэхгүй байсан гэвэл тэрэн шиг худал зүйл байхгүй.
Жишээ нь, Чингэлтэй дүүргийн МАН-ын дарга Ж.Сүхбаатар тухайн үед Сүхбаатарын талбай дээр байршуулсан “хулхи ногоон” автобуснуудыг “шинэ, сайхан автобус байна гэж хэлж ярь” хэмээн Чингэлтэй дүүргийн МАН-ын ахмадуудыг зохион байгуулалттайгаар явуулж байсан нь тухайн үедээ зураг бичлэгээр ил болж байсан.
Хотын дарга асан Д.Сумъяабазар Ногоон автобусыг тендергүй шууд худалдан авах бичгийг ТЕГ-аас гаргуулсан тухайгаа тухайн үед өөрийн биеэр барин тавин ярьж байсан.
Үүнээс гадна “Хөшигний ард” тэднийг гэмт хэргээс мултлах улс төрийн том “тохироо” хийгдэж байж тэднийг ялгүй гаргасан гэх хардлага ч олны дунд байсаар байна.
Магадгүй Ж.Сүхбаатарыг дахин улс төрд оруулахгүй байх, ДСумъяабазарыг улс төрд идэвхгүй байлгах шийдэл энэ тохирооны гол хэсэг ч байж мэднэ.
Эл тохирооны дагуу улс төрч, эрх мэдэлтнүүд Ногоон автобусны хэргээс “уснаас хуурай гарч”, хувийн хэвшлийн захирал, хурган дарга, даргын үүргийг биелүүлсэн жирийн төрийн албан хаагчид ял өгсөн болоод өнгөрөх шив дээ.
Зүй нь бол нийтийн эрх ашгийг хохироож, төсвийн мөнгөнөөс "хулгайлагсад" хэн байлаа ч гэсэн төр засаг, шүүх засаглал эвлэрэхгүй байх ёстой.
Гэтэл тэднийг “толгойг илж, ял завшуулж” байгаа болохоор ард түмэн нам төрийн удирдлагуудад, шударга бус шүүхэд, авлигачин дарга нарт, албан тушаалтнуудын талд “ажилладаг” прокурор, мөрдөн байцаагч нарт итгэх итгэл алдраад байгаа юм.
А.Галт
Amlalt.mn
