Г.Занданшатарын хамтсарсан Засгийн газрын сайдуудын нэг ИЗНН-ын дарга, УИХ-ын гишүүн, БОУАӨ-ийн сайд Б.Батбаатар хамтарсан Засгийн газраас гарч магадгүй гэх агуулгатай мэдээлэл сошиал орчинд явах боллоо.

Энэ тухай УИХ-ын гишүүн М.Нарантуяа-Нара “ИЗНН засагт хамтрахаа больж байгаа” талаар цахимд мэдээлсэн нь олны анхаарлыг татжээ.

Үүнтэй холбоотойгоор улс төрийн хүрээнд ИЗНН-ын даргыг Б.Батбаатарыг АН цаанаас нь “удирдаж, Засгаас гарахыг зөвлөсөн, БОУАӨ-ийн сайд Батбаатар Тусгай хамгаалалттай газар нутгийн бодлогын хэрэгжилтийн газрын даргаар өнгөрсөн жил томилогдон ажиллаж байсан, УИХ-ын гишүүн, ЗГХЭГ-ын дарга С.Бямбацогтын баз Д.Батцогтыг чөлөөлсөн нь түүнд таалагдаагүйн улмаас тус яамны Төрийн нарийн бичгийн даргын албан үүргийг түр орлон гүйцэтгэгчээр томилуулахаар Б.Батбаатар сайдын “хүн” болох Т.Золбаярыг ЗГХЭГ-ын дарга С.Бямбацогт томилоогүй гэх зэрэг шалтгааныг онцолсон байна.

Гэвч үнэн хэрэгтээ ИЗНН -ын дарга Б.Батбаатар БОУАӨ-ийн сайд болсноосоо хойш “төрөл арилжиж”, парламентад 4 суудал авахуулахын төлөө, намынхаа төлөө УИХ-ын сонгуулиар зүтгэсэн “журмын нөхдөө” гомдоож, албан тушаалын томилгоо хийхдээ намынхантай зөвлөлдөлгүй, эгээтэй л ИЗНН-ын “хаан” мэт дур зоргоороо аашилсан нь тус намаас УИХ-д сонгогдсон М.Нарантуяа-Нара болон бусад олон арван гишүүдийнхээ зэвүү дургүйг зэрэг хүргэжээ.

Үүний улмаас ИЗНН-ын дарга Б.Батбаатарт хандан УИХ-ын гишүүн М.Нарантуяа-Нара “дээрх асуудлыг тавьж, анхааран авч үзэхгүй бол УИХ дээр сэлэм эргүүлэхээ илэрхийлсэн, намын журмын нөхөд ч ингэж шаардсан” бололтой.

Дээр нь БОУАӨ-ийн сайд Б.Батбаатар яамныхаа Төрийн нарийн бичгийн даргад томилуулахаар “зүтгүүлсэн” Т.Золбаяр нь тус албан тушаалд тавигдах төрийн албаны шаардлагыг хангаж чадахгүй байгаа учир ЗГХЭГ-аас түүнийг томилуулахаар Засгийн газрын хуралдаанд оруулж чадахгүй байгаа гэнэ.

Дарга болоод төрөл арилжиж, өөрөө эрийн сайндаа “дарга сайдын суудал”-д суучихсан аятай аашилж, өөрийнх нь төлөө, намынхаа төлөө зүтгэсэн журмын нөхдөө “гомдоох” нь өөрийг эргээд байсан байр суурин дээр нь аваачих магадлалтай гэдгийг эрхбиш ИЗНН-ын дарга Б.Батбаатарын дээрх жишээгээр бусад дарга, сайдын сандал ширээнд суугсад ч гэсэн анхаараад авахад илүүдэхгүй бизээ.

А.Галт

Amlalt.mn