УИХ-ын гишүүн, Эрчим хүчний сайд Б.Чойжилсүрэн өчигдөр /2022.11.22/ цаг үеийн нөхцөл байдалтай холбоотойгоор олон нийтэд мэдээлэл хийлээ.

Тэрбээр “Намайг сайд болохоос өмнө “Тавантолгой” дулааны цахилгаан станцын тендерийг хоёр удаа зарласан байдаг. Тендерийн эргэн төлөлтийн нөхцөл нь нүүрсний оффтейк гэрээгээр зохицуулагдахаар заагдсан байсан. Хоёр удаагийн тендерт нэг нэг оролцогч оролцсон ч техникийн шаардлага хангаагүй гэх шалтгаанаар бүтэлгүйтсэн.

Тендерийн эргэн төлөлтийг оффтейк гэрээгээр зохицууулах нь оновчгүй. Тиймээс өөр санхүүжилтийн арга замуудыг судалж байна. Идэвхтэй 3-4 хэлэлцээрийг хийж байгаа. 2023 оны нэгдүгээр сард багтааж санхүүжилтийн асуудлыг шийдвэрлэнэ. Үүний дараа тендерийг гурав дахь удаагаа олон нийтэд нээлттэйгээр зарлах болно.

Би 11 дүгээр сарын 30-наас 12 дугаар сарын 2-ны өдрүүдэд Эрдэнэбүрэнгийн усан цахилгаан станцад очиж, ажиллахаар төлөвлөж байна. Гурван аймгийн Засаг даргад хүсэлт хүргүүлсэн. Үүний дараа та бүхэнд эцсийн мэдээллийг өгнө.

“Амгалан” дулааны станцын өргөтгөлийн ажлын шавыг тавьсан. Санхүүжилтийн гэрээг Хөгжлийн банктай эцсийн байдлаар байгуулаагүй. Ирэх долоо хоногт санхүүжилтийн асуудлыг шийднэ. Гүйцэтгэгч нь тодорхой болчихсон байгаа. Ирэх хавар гэхэд бүтээн байгуулалтын ажлыг эхлүүлж, 2024-2025 оны халаалтын улиралд “Амгалан” дулааны станцын өргөтгөлийг ашиглалтад оруулна” гэлээ.