Засгийн газрын ээлжит хуралдаан өнөөдөр боллоо. Хуралдаанаар хэд хэдэн чухал асуудлыг шийдвэрлэснээ Засгийн газрын гишүүд олон нийтэд танилцууллаа.
Эдийн засгийн хөгжлийн сайд Ч.Хүрэлбаатар “Цагааннуур чөлөөт бүсийг байнгын ажиллагаатай болгох шийдвэрийг Засгийн газар гаргалаа.
Ингэснээр тэнд тээвэр ложистик, гадаад дотоод худалдааны төв, үйлдвэрүүд байх бүрэн боломжтой гэж үзэж байна.
Европоос ирэх ачаа Цагааннуурын боомтоор дамжин Улаанбаатарт ирвэл, Алтанбулагаар дамжсанаас 200 километрээр татуу байгаа. Тэгэхээр энд тодорхой хэмжээний цаг хугацаа, санхүүгийн хэмнэлт гарах юм.
Мөн гадаадын хөрөнгө оруулагчдын гомдлыг шийдвэрлэх талаар хэлэлцлээ. Эдийн засгийн хөгжлийн яамны дор ирэх нэгдүгээр сарын 1-нээс Гадаадын хөрөнгө оруулалт, гадаад худалдаа хариуцсан агентлаг байгуулагдаж байгаа.
Эдийн засгийн яамны хувьд гадаадын хөрөнгө оруулалтыг чухал гэж үзэж байгаа. Цаашид ч ийм байр суурьтай ажиллана.
Гадны хөрөнгө оруулагчдын зүгээс ихээхэн гомдол ирдэг. Өнөөдөр Засгийн газрын хуралдаанаар энэ асуудлыг хэлэлцэж, Засгийн газрын тогтоол гаргалаа.
Одоогоор Эдийн засгийн хөгжлийн яаманд 38 гомдол ирсэн байгаа” гэж хэллээ.
