Баараггүй шиг, багцаатай шиг юм яриад байдаг Баттөмөрийн Энхбаяр ойрд хааччихав. Эрдүү цээлхэн хоолойгоор эндүүгүй юм яриад байдаг сан. Хөгжлийн банкны асуудлыг шалгах хорооны ажил толгой өөд татуулах завгүй байлгаад байгаа юм болов уу. Нүүрсний хулгайн асуудалд энэ хүн дуугармаарсан. Түүний гавьтай дуу хоолой нь сонсогдсонгүй. Хэн нэг нь гуйв уу, хэл нь энэ асуудалд хөдөлж өгөхгүй байна уу, аль эсвэл Сү.Батболд ямар нэгээр саатуулав уу, ямар ч атугай шударга имижтэй Б.Энхбаяр нүүрсний дөчин их наядын хулгай дээр нөөлөг багатай байна гэхэд хилс болохооргүй байна. Эцэслэж хэлээд мухарлачихдаг болохоор эрх баригчид ч цурамд оруулсанж уу, хэн мэдэхэв дээ.
За, юутай ч, Энхбаярыгаа дуугаргамаар байна аа. Энэ удаагийн УИХ, Засгийн газарт байгсад нүүрсний хулгайн хэрэгт даамай оролцоотойн учир ирэх сонгуульд хэн нь нэр дэвшиж болохыг Энхбаяраар зарлуулмаар байна. Хэн нь нэр дэвших эрхгүйг Энхбаяраар цоллуулмаар байна. Шударга, эх оронч гэж боддог болохоор тэр шүү дээ.
Энэ оронд болж байгаа үй түмэн шударга бус үйлдлийг харахаар түмпэн түмпэнгээр бөөлжмөөр байна гэж ард түмэн дотор огиудаслаад асар удлаа. Баянзүрхийнхэн өөрийг нь баараггүй шударга гэж өндөр хувиар гаргах шиг болсон. Дөчин их наядын хулгайн гол эзнээр яг хэн байгааг Б.Энхбаяр мэдэж л байгаа. Дөчийн дөчин их наядын хулгайг мэдэж байхаар хуулийн ном судласан хүн бол Б.Энхбаяр. Хуулийн номондоо эхээсээ урвахгүйн үлгэрээр үнэнч байж чадахаар хүн бол мөнхүү Б.Энхбаяр.
Энэ учир Баттөмөрийн Энхбаярыг нүүрсний хулгайг илрүүлэх нөр шударга үйлсэд татан оролцуулах нь манай нийгмийн ариун захиалгаас урган гарч байгаа эрэлт билээ. Нөгөөтэйгүүр Б. Энхбаяр Хөгжлийн банкны хулгайн асуудлыг нөөцтэй мэдэж байгаа хүний хувьд, Хөгжлийн банкыг тонон, хөгжлийн бус үлгэр үзүүлсэн төрийн түшээдийг эрх мэдлийн сэнтийгээс эгнэгт зайлуулах ажлыг төгс төгөлдөр хийх хэрэгтэй.
Хөгжлийн өчнөөн төчнөөн төсөл банжсан хүмүүст санхүүжилт үл олгох атлаа, УИХ, Засгийн газрын эрх мэдлээрээ лаахайдан бүхий мөнгө зээлийг авсан нөхдийг эргэж харахгүйгээр УИХ, Засгаасаа шахах нь Баттөмөрийн Энхбаярын цааш цаашдын үйл хэрэгт өндөр ивээс болох юм. Энэ учир Хөгжлийн банкинд хөнөөл тарьсан эрх мэдэлтнүүдийг Баттөмөрийн Энхбаяр минь, гарцаагүй энэ үгийн дор гарын үсэг нь Ленинийх байлаа гэдэг шиг, Хөгжлийн банкыг хөсөрдүүлэгсдийг хөөсөн нь гэдэг үгийн дор Баттөмөрийн Энхбаяр гэдэг гарын үсгийг сийлээрэй.
Баттөмөрийн Энхбаяр аа, бас хэлэх юм байна, буруу санаагүй бол төрийн өмчийн компаниудыг төв мэргэн болгох хуулиа хурдлаач ээ. Эрдэнэтэд хүүгээрээ бараа шахуулдаг Нямдоржийн өлөн элгэн дороос өөрөө тэр хуулийн төслийг арайчүү олж аваа биз дээ. Одоо түүнийгээ амилуулаач ээ. Батлуулаач.
Цаана чинь Эрдэнэт үйлдвэрт гэхэд ерэн нэгэн оны нэг хуулиар онц байдал тогтоон гурав дөрвөн удаа сунгагдаад, эдүгээ ямар ч хяналтгүй олон жил боллоо. Оюун-Эрдэнээс өөр тэр үйлдвэрийг мэддэг хүн алга. Одоо компанийн сахилга баттай болгооч ээ. Бадамсүрэн гээд нэг нөхөр баахан байгаад баатар болсноос өөрөөр Эрдэнэтэд эх үнэн алдар нь, их зарчим очихгүй байна. Нүүрсний хулгайн замаар орсон байж тун мэднэ дээ.
БЭТ гээд нөхөд томилогдоод байх юм. Баттөмөрийн Энхбаяраа, энэ зөв үү. Өөрийн чинь шалгаад байгаа Хөгжлийн банкны ТУЗ-ийн дарга Эрдэнэс таван толгойд Жигжидийн Ганбат гэдэг Хэнтийн галшар удмын “хүлэг”, “өөрийнхөө адуунаас”, бэлчээрээс АТГ-д хүмүүс өгч шалгуулаад л давхиад байх юм. Адууны эзэн анхнаасаа “адуугаа” мэдэж байсан баймаар. Энэ “хүлэг” зөв замаар хурдалж байгаа юм уу, Хэнтийн угшлаараа түрий барьж хурдлаад байгаа юм уу, өөрийн чинь амнаас сонсоод эргэлзээ тайлчихмаар юм мөн ч их байна даа.
Баттөмөрийн Энхбаяр аа, ажлаа хий л дээ, “алга” болчих юм.
З.БАЯРАА
Амлалт.мн
