Монгол төрийн түшээдээ бид одоо яах вэ. Түрүүчээсээ зарим нь төрийн ордонд агсам тавиад болохоо байлаа. Тендер, концесс, ЖДҮ, Хөгжлийн банк. Бүгдийг нь идсэн олигархиуд шигэж суугаад, үнсэлдээд л.
Гэвч олон дотор од, цөөн дотор тод зүс байдаг даа. Жигжидийн Батжаргалыг бүлгийн дэд дарга болгоотохож. Сайн мэдээ. Гүндүүгүй, эрсхэн, хэлж ярих гэснээ хэлчихдэг ийм эрс хэрэгтэй ээ. Гол нь зөв, зарчимтай харагддаг. Гарцаагүй. Монгол төрийн мэргэн өвөө хэмээгддэг Жамсрангийн Самбуу гэж бодь хар хүн байлаа. Зүгээр л төв цөлх, язгуурын эх оронч, бүдүүн хадуун, гэвч үнэн. Ж.Батжаргал чинь арай Бүрэнгийнх биш байгаа даа.
Эргээд ингээд нэг анзаарсан чинь, энэ Төв аймгийн Батжаргал, тэр Дорноговийн Т.Энхтүвшин , өөр хэн хэн ч билээ дээ, Хэнтийн Идэрбат, Өвөрхангайн Ганболд, Жамбын Батсуурь, Орхон, Архангайн Батлут, Багануурын Сандаг-Очир, бас хэн билээ дээ, Өмнөговийн Наранбаатар, өө тэр чинь нээрээ нам нь нэрлэчих лүү, за даа ингээд арваад гишүүн байдаг шүү. Дандаа аймгийн Засаг дарга нар байсан. Буцаад бодож байх нь ээ, энэ хэд чинь харин амьдралд ойр, элдэв хэл аманд орооцолддоггүй, эвтэйхэн яваад байгаа нөхөд юм биш үү дээ.
Хөдөөгийн гишүүд ч бил үү, Үйлдвэржилтийн байнгын хорооны гишүүд ч билүү нэг тийм нэршилтэй. Хэрэг дээрээ хэрэг явдал бүхэнд зөв оролцоноо гээд бүх байнгын хороонд харъяалагдаад ажиллаж байгаа нөхөд гэж дуулдсан шүү. Энүүхэндээ гэхэд зөв яриад, нэхийгээ элддэг, малын гаралтайгаа боловсруулдаг үйлдвэртэй болчихмоор байна аа гээд яваад байгаа гишүүд чинь харин эд чинь байна шүү дээ. Нөгөө олигархи, намыг зайдалж, найм хүртэл сонгогдох зүүдтэнүүд, нүүрс , хөгжлийн банк, тендер , концесс эд нараас харин ч үнэртдэггүй гэхэд хилсгүй.
Ц.Сандаг-Очир гэхэд зөв шударга л дуугараад байгаа харагддаг. Батлут, Энхтүвшин аль нь ч тэр. Идэрбат гэхэд отгон гишүүн атлаа хэвлүүхэн л улс төр хийгээд харагддаг. Энэ хэд Ерөнхий сайдад их түшиг болдог болов уу гэж бодогддог. Ерөнхий сайд маань нээрээ нүүрс , тээврийн хулгайтай заамдалцаад, ард түмэн, Нямбаатар хоёртойгоо үзээд л байна. Ингэхэд энэ аймгаас сонгогдсон гишүүд минь Ерөнхий сайдтай нэгдээд, Батжаргалаа туг болгоод ард түмнийхээ эрх ашиг руу ор оо.
Та нарыг наад дээд долларын тэрбумтнууд чинь биш, ард түмэн, Ерөнхий сайд чинь дэмжинэ. Тэдэнтэйгээ шалавхан нэгийгээ зарлаад үзээд үзээд явчих, энэ худал хуурмаг, хулгай луйвартай. Долларын тэрбумтнуудын доллар чангараад, бидний мөнгө үйрмэг болж гүйцлээ. Бодооч дээ, та нар.
Эх орны төлөө зүтгэхэд алдах юмгүй, алдах эрхгүй аавын хөвгүүд чинь харин та нар харагдаж байна шүү. Намынхаа санхүүг шалгая, шилэн болгоё, намаа шинэчилье, эрүүл болгоё, холимог тогтолцоотой болъё, Үндсэн хуулиа иргэн бүртээ, эх оронч түмэндээ ээлтэй болгоё гээд ажиллах зүйл , ээ дээ, мөн их байна даа, Батжаргал аа. Генсек тань ч ийм бодолтой байх шиг байдаг. Түүнийгээ ч дэмж ээ,Жигжидийн Батжаргал аа. Эргээд харсан, энэ чинь харин бат жаргалт, бат лутат, идэр батат, бат суурьт, фракц бус уу, улс төрд. Үнэн, зөв.
З. БАЯРАА
Амлалт.мн
