Байгаль орчны дэд сайд дөнгөж болоод байгаа “По” хэмээх М.Ганбаатар утаа тун удахгүй, бараг маргааш нөгөөдөргүй арилна, харж байгаарай гэсэн гээд л цахим сүлжээнд шуугиад байх. “Таван толгой түлш”-д байгаад утааг угаас нь мэдэх тэр яагаад тэгэж хэлээд байгаа юм, бүү мэд. Нэг л учир байна. Намын нэг том даргын татаас ивээстэй шинэ түлш орж ирсэн сураг гарсан.
Тэр түлшээ сэмхэн түлхээд, түлүүлээд эхэлсэн юм болов уу. Нэг чиг гарах байгаа.
Чиг гэхэд, чиггүй юм Улаанбаатарт олон байна. Хот маань цатгалан битгий хэл, туранхай могой шургахааргүй бетонон ширэнгэд хүлэгдээд удлаа. Илүү тэлэн хүлсээр, өрсөөр. Чойжоо тэргүүтэн. Чойжоог хэлд орохгүй байна гээд их шүүмжилсэн.
Чойжоо хэлж ярихаасаа илүү бодчихдог л хүн. Жишээ гэхэд, бодсоор байгаад аварга эдийн засаг бүхий их хотын “бетонон ширэнгэ” босгож чадсаны дундуур бид шургалдан амьдарч байна. Чойжоо үгүй, тэгээгүй гэж хэлэхгүй байх.
Чойжоо одоо Эрчим хүчний сайд хийж байна. Мань эр аанай л чимээгүй л яваад байна. Эрдэнэбүрэн хавиар харин эргэлдээд байгаа харагдах. Энэ ч зөв шүү. Их хотыг их барилгаар чигжиж чадсан шигээ Эрдэнэбүрэнг босгохоор “чигжиж” ажиллаж байгаа бол Чойжоод юу хэлэх билээ.
Эрчим хүчний төсөл болгоныг элдэвлэн боогдуулдаг хүмүүс Эрчим хүчний сайдууд өөрсдөө байдаг. Хөвсгөлийн хоёр ч сайд байлаа. Гантай, давтай. Эрчим хүч эх орны баялаг гэчихээд л эсэргүүцээд, ил далд хана босгочихдог нөхөд байсан.
Харин энэ Чойжоо тэдэн шиг байна уу, тэднээс өөр байна уу гэдгийг энэ Эрдэнэбүрэн дээр л яг хармаар байна гэж хүмүүс, Ховдынхон, Увсынхан яриад хөөрөөд байна.
Ховд, Увсынхан хойноос цахилгаан авдаг. Хүний гар харахын зовлонг мэднэ. Хөгжил бол хөдөө хотын, хүн төрөлхтний гарцаагүй сонголт гэдгийг ядуурч гүйцсэн амьдралаараа нотолсон тэд мэдээд удлаа.
Үүний нь эсрэг ганцхан хөдөлгөгч хүч бол эрчим хүч гэдгийг ч мэдээд удлаа. Завханыхан бол бүр үгээ хэлж, үсээ зулгааж байгаа. Тэлмэний гээд станц баригдах гэж байхад тэдгээр сайдууд нь зогсоосоныг хараах нь халаг байдаг шиг билээ.
Одоо Чойжоо тэдгээр өмнөх сайдууд шигээ хараалгалгүй, ерөөсөө Эрдэнэбүрэнгийг станцыг барих төслийн нэгжийн даргын хэргэм цолоор л ажилла. Парламентдаа хориод жил суучихлаа. Байшин барилгаа одоо Эрдэнэбүрэнгийн хөндийд очиж цэцэглүүл. Энэ Алтантэвшийн хөндий таны барьсан байшин барилгыг даахаа болилоо.
Энүүхэндээ гэхэд Эрдэнэбүрэн, Тэлмэний станцаа бариад их хотыг тэнд л харин чигжүүгээр, эрчим хүчийг яг Улаанбатарынхаа хөндийг Панам, Хонконгийнхон шиг барилгаар яаж зээтүү шиг өрсөн шигээ болгоод аль. Тийм их батерейтэй болгоод өг өө. Эрчим хүчтэй болгоод өг. Хөгжил өрөгдөнө.
Энэ бол Чойжоо сайдын цоорсон түүх байх болно. Ширэнгийн Чойжоо биш, эх орны хөгжлийг үнэнхүү түүчээлсэн Чойжоо байх болно.
Эхлээч, Чойжоо сайд аа! “Хурд”-тай ажиллачих хэрэгтэй. Ер нь, одоо энэ УИХ-д хориод жил болж байгаа Хүрлээ, Бямбаа, Ганбаа гээд хөрөнгө мөнгөө цуглуулсан, хөндий хөндий бизнэстэй энэ олон сайдуудыг ерөөсөө л хөгжлийн Төсөл хариуцсан нэгжийн захирлууд болгох хэрэгтэй. Их хуралд олон жил байсных хэнээс ч айна гэхэв, Их бодлогын бүх хуулиудаа эгнэгт мэддэг боллоо.
Эдийн Засгийн чөлөөт бүсийн захирал Хүрлээ, Хил тулсан төмөр замын ложистикуудын терминал байгуулах нэгжийн захирал Бямбаа, Баянгол хийгээд Сонгинохайрхан дүүргийн Дэд бүцийг төгөлдөржүүлэх төслийн нэгжийн захирал Ганбаа гээд томилчих хэрэгтэй ээ. Яг л “Оргил” худалдааны төв бүрхсэн шиг босгоно доо. Хөгжүүлнэ, чадна, энэ аваргууд...
З.БАЯРАА
Амлалт.мн
