Гишүүний шинж төлөв: Хэн УИХ-ын гишүүн байж чадах вэ! /Цуврал/ - АМГАЛАНГИЙН АДЪЯАСҮРЭН

Амгалангийн Адъяасүрэн хэмээх бүсгүй УИХ-д орж ирэн “Босоо” Ганбаатай тохой суулган суусан. Орж ирсэн цагаасаа энэ хүнд олигтой сэтэр наалдсангүй. Гавьтай хууль санаачилсангүй. Хуулийн “эх” болж хоногшсонгүй. Босоо Ганбаа түүнийг өмөөрсхийж, тэр хоёрын хамтдаа нэгнээдээ инээмсэглэсэн урьхан харцтай зургаас илүү зөв имиж ер харагдсангүй.

Амгалангийн Адъяасүрэн нүүрсний тээвэр хийдэг, жолооны сургуультайгаараа шахуу бараг танигдан төрийн эрх барих дээд байгууллагад орж ирсэн. Ингээд үзвэл хамгийн түрүүнд нүүрс тээврийн жолоочдын эрх ашгийг хамгаалах, ерөөс Монгол дахь жолоо барин ар гэрийнхээ амьдралыг залгуулж байгаа олон хүмүүсийн төлөөх агуулгаар хангагдсан хуулийн төсөл бариад, түүнийхээ араас явахад л энэ хүн ихээхэн амжилт олох байсан.

Гэвч тийн санаачлах, тийн зүтгэх ажлыг эс хийв. Товчхондоо А.Адъяасүрэн гишүүн энэ Их хуралд юу ч хийж чадалгүй он жил барж байна гэж гэхэд огтоос хилс болохгүй. Монголын төрд эмэгтэйчүүд маш цөөхөн сонгогдож ирсэн. Энэ өндөр төрийн босгоор алхаж ирж ирсэн эмэгтэй бол маш их үүрэгтэй. Бас дэмжлэгтэй.

Монголын хүн амын талаас илүү хувь нь эмэгтэйчүүд. Тэднийхээ бодит үлгэрлэл болоод, нийгмийн тустай олон хууль санаачилж, нийтээр хэлэлцүүлж, шүүн тунгаалгаж, олон талаар ажиллах боломж А.Адъяасүрэнд байсан. Гэвч тэрээр нүүрсний хулгайн хэрэгт нэрлэгдэн, үргэлж турш хууль хяналтынхны үүд сахисан өнгө төрхтэйгээр явж ирэв. Нэгэнт УИХ-д орж ирсэн л юм бол, идэр залуухан эмэгтэйн хувиар гялалзтал, санаачлагатай ажиллаж, улс төр дэх алив болохгүйг илчлэн, сөрөг хүчний хоёрхон эмэгтэйн нэгийн хувьд Салдангийн Одонтуяатайгаа дөрөө харшуулан, түүнээс суралцаж, улс төр дэх Монголын эмэгтэйчүүдэд даган дуурайхаар хэв шинж, илэрхийллийг бүрнээ утгажуулан тунхаглаж болох байв.

Гэвч энэ бүхнээс тэр ард үлдлээ. Орхигдов. Хэрэг дээрээ өөрийгөө ч орхив.

Нэр төр, улс төрчийн аль ч хэв шинжийг өөртөө наасангүй...!!!

З.Баяр

Амлалт.мн