Сүүлийн хэдэн жил нам дотроо хэд хэд хуваагдаж, УИХ-д суудалтай гишүүд нь МАН-ын “идэш зоог” болж, фракци бүр АН-ын дарга, генсекээ зэрэг томилж, олон толгой сүүлтэй луугийн үлгэр шиг явж ирсэн АН-ын даргаар Гантөмөр сонгогдлоо. Дээд шүүхээс түүнийг АН-ын дарга гэдгийг зөвшөөрч баталгаажуулчихлаа.

Харин АН-ын дарга асан С.Эрдэнэ л түүнийг эсэргүүцээд байх шиг. Бусдаар бол АН-ын гишүүд хүлээн зөвшөөрчих шиг боллоо. Ард түмэн ч одоо АН учраа олоод явах нь зүйтэй гэж харж байгаа нь ажиглагдлаа.

Одоо Л.Гантөмөр хойшоо суулгүй, улс орноо бодоод, урагшаа харж улалзтал ажиллах хэрэгтэй. МАН-аас тавих өгөөш, саадыг үл хайхран зүтгэх хэрэгтэй. Эрх баригч МАН-ын 2020 оны сонгуулийн мөрийн хөтөлбөр, амлалтыг АН-ын гишүүд, ард түмэнтэйгээ нийлж байгаад тэднээс нэхэх ёстой.

Долоодох жилдаа завсаргүй засаглаж байгаа МАН-аас “Хаана байна тэр иргэдийн орлогыг нэмэгдүүлэх, амьдралын чанарыг дээшлүүлэх арга хэмжээ авна” гэсэн амлалт чинь гээд л асуугаад явчих хэрэгтэй.

Л.Гантөмөр “Авлигын аквариумыг хага цохино” гэсэн байна лээ. Тэр энэ ажлаа МАН-ын албан тушаалтнуудын ЖДҮ, Хөгжлийн банк, Нүүрсний хулгай, Ковидоор халхавчилсан төсвийн зарцуулалт зэрэг авлигын хэргүүдийг иргэд олон нийтэд сануулж, өнгөрсөн жилүүдэд хэний орлого нэмэгдэн, хэний түрийвч зузаарч, хэдэн ААН, иргэд дампуурч, ядуурсныг судалгаа тооцоонд тулгуурлаад хэлээд өгөх хэрэгтэй.

Бас УИХ дах АН-ын “мануухай” шиг хэдэн гишүүдээ ажиллуулаа. Тэд сөрөг хүчний байр сууриа илэрхийлэх цаг хэдийнэ болсон. Өвөр зуураа бүлгийн дарга цэрэг, оймс гуталны хэрүүл хийх биш улс орны хөгжлийн төлөөх асуудлаа тэд тэнд яриг. Тэднээр УИХ дах МАН-ын олонхийн бүлэгээрээ түрий барьж гаргаж, батлаж байгаа шийдвэрт шинжилгээ хийлгэ, бодлого яриул, суурьтай шүүмжлүүл.

Сөрөг хүчингүй төр засаг ямар хэмжээнд хүртэл доройтдогийг та ч үзлээ, бид ч харлаа, МАН-ынхан ч ойлголоо. Тиймээс одоогоос эхлэн АН-аа төрийн ордонд ч, түмний дунд ч сөрөг хүчин шиг ажиллуулаарай.

Тантай цуг АН-ын даргад өрсөлдсөн С.Баярцогтыг дэргэдээ аваад нэг баг болоод ажиллавал нэг талаас АН-ын фракциуд нэгдэж, хүчээ нэгтгэж хамтран зүтгэх боломж бүрдэх, нөгөө талаас олон ажлыг урагшлуулж, улмаар сонгуульд амжилт гаргах үндэс болохыг үгүйсгэхгүй.

МАН-аас ирэх элдэв тохироо наймаалцлаас хол байсан нь дээрээ. Тэд алсуураа АН-ыг хүчгүйдүүлэх, муухай харагдуулах, хагалан бутаргах, эцэстээ сонгуульд цөөн суудал авахуулахын төлөө ажиллах байх. Энэ бүхнийг та ухаан, ур хоёроор шийдээд явах нь зүйтэй.

Хэрэв АН-ын дарга Л.Гантөмөр та эдгээр асуудлыг шат дараатай шийдэж, АН-ын олон зуун гишүүдийн итгэл сэтгэлийг татаж, сонгууль хүртэлх багахан хугацаанд ч болов АН-ын алдсан цаг хугацааг нөхөж, сөрөг хүчний ажлаа төгөлдөр хийж чадах юм бол өвчтөнтэй зүйрлэвэл сэхээний өрөөнд орчихсон АН энгийн тасагт шилжээд зогсохгүй, эдгэж гараад, их улс төрд амжилт гаргах боломж бүрдэнэ гэж харж байна.

А.Галт

Амлалт.мн