Энх-Амгалан хүү түлээ сайн хагалдаг. Энх-Амгалан хүү онц сурдаг. Энх-Амгалан хүү гоё хоол хийдэг. Энх-Амгалан хүү тансаг шүлэг бичдэг. Энх-Амгалан хүү Ленинградад оюутан болсон. Ирээд “Ил товчоо”-д гоё сурвалжлагч болсон. Энх-Амгалан хүү авьяаслаг бизнесмэн болсон. Энх-Амгалан хүү эрийн цээнд хүрсэн. Энх-Амгалан хүү бэлтэй болсон. Энх-Амгалан хүү улс төрд орсон. Энх-Амгалан хүү сайд болсон.
Энэ бол Лувсанцэрэнгийн Энх-Амгалан. Эдүгээн боловсрол хариуцсан сайд. Ийм Энх-Амгаланг эхлээд эцэг эх, үргэлжлүүлээд багш бүтээсэн. Жирийн монгол жолоочийн хүү ингэж Монголын шилдэг иргэн болсон. Энэ бүх боловсролын нь суурийг, шилдэг иргэн болох замыг нь Хөвсгөлийн багш нар, за тэгээд Ленинградын багш нар, цаашлаад Г. Аким, Ж. Оджаргал нар тавьсан байх.
Энэ утгаараа Л.Энх-Амгалан багшийн гавьяаг бүрнээ мэдэх, ширхэглэн танисан хүн. Өнөөдөр энэ бүхнийг мэддэг Л.Энх-Амгалангийн хариуцсан салбарын багш нар эх орноо, хүүхэд залуусаа орхин Солонгост ажил хийхээр бүх ур ухаанаа уралдуулж байна. Яагаад гэхээр өнөөдөр Монголын багш нарын цалин өчүүхэн бага, ажлын ачаалал нь асар өндөр, эрх ашиг нь хамгаалагдсан байдал үлэмж ядруу.
Ингээд Монголын ирээдүйг, ирээдүйн Энх-Амгалангуудыг бүтээх ёстой багш нар Солонгост ажлын үнэлэмж сайтайн учир цэрд самбараа орхиод, Солонгост нийвий барьж барилгачин, бошинз зүүж буудлын үйлчлэгч болохоор зорьж байна. Хэн эмгэнэлтэйв Монгол эмгэнэлтэй, хэн гаслалтайв Монголын ирээдүй. Сайд Л.Энх-Амгалан үүнд хариулах ёстой. Та өнөөдөр Монголын Засгийн газрын гишүүн.
Таны хариуцсан салбарын багш нар, Монголын ирээдүй болсон хүүхэд багачуудын гэгээн оюуныг эрдэм номын эх уурхайгаар бүлүүрдэж байх ёстой улс яагаад ингэж тийнхүү Солонгост хар ажил хийхээр “үхэлдэн” одож байгааг тунгааж анагаах цаг хэдийнэ болжээ.
Багш нар өнөөдөр Солонгос гарахын тулд улсын эмнэлэгүүдээс эдгэхэд хүнд өвчтэй, түүнийгээ илааршуулахын тулд Солонгосыг зорих шаардлагын улмаас үлэмж төгрөгийн эмчилгээ үйлчилгээ хийлгэсэн, үргэлжлүүлэн гадаадад эмчлүүлэх “ёстойн” бичгийг авч, түүгээрээ гуллан виз хүсэх их цуваа үүсчээ. Энэ бол амьдрал тэмцлийн замд аргагүйдэн ядарсаны тов тод илэрхийлэл.
Гунигт үйл явц. Түүнчлэн Солонгосын зүгт явах багш нарын явуулахгүйн тулд улс төрийн аргаар баллуурдахын үүднээс ийм чиглэлийн “хүсэлтийг” үл хүлээн авч байх саналыг БНСУ-ын Элчин сайдад гаргасан байж мэдэх мэдээлэл дуулдаж байна.
Эх орон ингэж ядуурах гэж. Оюун санаагаа алдвал бид бүгдийгээ алдана гэсэн үг биз дээ. Л.Энх-Амгалан сайдаа, Монгол Улсын Засгийн газар аа, багш нарынхаа асуудлыг бодьтой авч үзэн, реформ хийхгүй аваас үнэхээрийн болохоо байжээ. Сардаа сая төгрөгийн цалин авах гэж Монголдоо цаг наргүй зүтгэснээс, Солонгост юу ч хамаагүй хийж ажиллаад сардаа гурваас таван сая төгрөг авах нь амьдралд минь тустай байна гэх багш Монголоор дүүрэн байна.
Үүний цаана хамгийн хэцүү нь Монголын шинэ уураг тархи, оюун санаа, үргэлжлэл болсон хүүхэд багачуудын боловсролын асуудал эзгүйтэн туйлдаж байна. Л.Энх-Амгалаан, одоо энэ салбараа, багш нараа тун түргэн өөд нь тат. Тэднийг тул. Босго, Шинэ урам, шинэ хүч өг. Ажилла.
Яг л “Юнитель” компанийнхаа ашиг орлого, бизнес төлөвлөгөөг чинад шийтгэн, энэ улс орны айл бүрт орон үйлчилж, үйлчилснийхээ хөлсийг өдөр бүр төлүүлэн авч байгаа шигээ, Монголын айл бүрт орж Монголын оюун санааг авар. Та тэгэх л гэж сайд болсон. Засгийн гишүүн болсон.
Тийм учраас өдөр шөнөгүй ажиллаж, энэ салбар, энэ багш нараа хүний дайтай амьдруулж, багшийн дайтай хичээл номыг нь хүүхдүүдэд заалга. Монголын оюун ухаан балрах ёсгүй. Ялангуяа жирийн жолоочийн хүүгээс зэргийн “ноён” болсон, шилдэг оюунтан Лувсанцэрэнгийн Энх-Амгалангийн үед. Угаасаа тэгэхгүй.
Гэхдээ өдөр бүр, цаг тутам Монголын оюун санааг тэжээ, Л.Энх-Амгалаан! Үүний төлөө өөрт тань өчүүхэн ч алдах эрх байхгүй.
Энийг сана. Нүүрсний хэрүүл, тонуул чинь Монголын ирээдүй болсон хүүхэд залуучуудын оюун боловсролын асуудлын дэргэд жогорхой, эрх баригчид, Монгол АРДЫН НАМ АА.
З.БАЯРАА
Амлалт.мн
