Цэрэнпилийн Даваасүрэнг нэг өгөр нэр дагалддаг. Арван хувь гэж. Яагаад ийм нэр дагалдах болсоныг анд найзууд нь, улс төрийн хүрээнийхэн илүү сайн мэдэх биз. Эрх мэдлээ далимдуулж, арван хувийг шойтогддог л гэсэн хоч бололтой юм билээ.
Энэ хоч улам л нэршээд, мань сайдын нэрийг орлохуйц болсон нь нийгэмд түгээмэл болжээ. Ц.Даваасүрэн үүндээ дасаа юу, зөвшөөрөө юу, гомдол санал болж ер харагдахгүй юм. Сайд энэ нэрийг өөртөө зөвшөөрөөгүй бол даруй түргэн өөрчилөх хэрэгтэй. Ингэж нэрлэсэн хүмүүс гүтгэсэн, харлуулсан бол манай улсын яруу алдарт шүүх ариун нэр төрийг даруй сэргээгээд өгөх биз.
Ц.Даваасүрэн сайд энэ талаар их сул ажиллаж байгаа шүү. Сайд Даваасүрэн улсын ажлын сайжруулахын төлөө байлгүй дээ, үргэлж л шүүмжилдэг. Оюу толгойг, Эрдэнэтийг, бүтээн байгуулалтын төслүүдийг, ер нь л түүнээс шүүмжийн үгийг сонссоор, эл эрхэм гишүүн УИХ-д дөрвөнтөө суужээ. Ц.Даваасүрэн үүнийг чадчихлаа гэсэн автор ажил эдүгээ юу билээ гээд харахаар нэг их гарт баригдах юм мэдэхгүй юм гэж хүмүүс ярих. Гэхдээ л Ц.Даваасүрэн Хөвсгөлөөс дөрөв сонгогдсон юм чинь, Хөвсгөлдөө их юм хийсэн байх аа.
Мань сайд нэг хэсэг Түлш, эрчим хүчний сайд хийв. За даа, яг хүссэнээ авлаа даа, станци бариад, лавтайяа, нэг юм хийнэ дээ гээд хүлээлээ, олон нийтээрээ. Арга байж үү, дандаа ажил явахгүй байгааг шүүмжилдэг, эх оронч байдаг болохоор. Багануур, Тэлмэн, Эрдэнэбүрэн хөдлөх нь үү гэсэн байдаггүй. Бахь байдгаараа л. Яаманд хэдэн дарга л солих шиг болсон. Одоо энэ З.Мэндсайхан зөвлөх түүнтэй таарахгүй, ширвээсэнд нь явж байлаа. Тун гаажтай шазгар л даа. Ц.Даваасүрэнгийн шазайлтыг давах хүн ховор гэдэг юм билээ.
Ингээд Эрчим хүчний сайд хийж байхад нь станцийн ажлууд хөдлөөгүй. Тэлмэний станцийг Могойн голд анх барихад нь л эсэргүүцэгсдийн нэг. Тэлмэнээ одоо Хөвсгөлд бус, Завханд болгосон, шаахайн мөр Хөвсгөлд гарахгүй юм чинь Улиастай чигт барихад нь дэмжих юм болов уу гээд Завхан, Говь-Алтай, баруун аймгийнхан их харсан. Байхгүй дээ, юун дэмжих, баригдах.
За, иймэрхүү үлгэртэйгээр эрчим хүчинд ажилласан. Намтар зузаарсан. Эдүгээ Барилга, хот байгуулалтын сайд хийгээд Хархорумыг барина гээд явж байна, сайдтан. Саяхан индэр дээр зогссон, яг л Хархорумыг барих нь дээ гэмээр харагдаж байна лээ.
Бариасай, аравхан хувийн гүйцэтгэл дутуу Хархорум маань гээд Ц.Даваасүрэн сайд зогсож байдаггүй юм байх даа. Тэгвэл мөн гоё оо. Ная, ерэн хувийн гүйцэтгэл хийгдчихлээ гээд. Ц.Даваасүрэн ч ганц биш, ерөөсөө сайдууд ингээд зогсож байдаг бол мөн сайхан аа.
Хилрүү тулгаад орхидог төмөр зам шиг, гаваар орсон газрын тосны үйлдвэр шиг утга учиргүй хумьчихгүй бол улс орон ч сэпхийнэ.
Тэгэхгүй юм даа, эд нар маань, давхар давхар албан тушаалаа зузааруулаад л байхаас, амжилт нь ер сөөм урагшлахгүй юм.
Ц.Даваасүрэн сайд удахгүй Оюу толгойн жинхэнэ ашиг хуваарлилтыг яриад гараад ирэх нь дамжиггүй. Хархорумын санхүү явахгүй байж мэдэх шүү дээ. Улс төрийн арга башир, сэхээ сэвтээний хувьд мань эрийг гүйцэх “уран нүүдэлтэн” бараг байхгүй. Хөдөө аж ахуйн сайд энэ хоёр нийлсэн байхад супер. Нэг тийм анимэ тоглоомт эвлүүлэг цахимаар яваад байна лээ. Аргагүйн эрхэнд болтол, арга ядуултал улс төрийн нөөшийг мань хоёр хийнэ л дээ. Хэрэг эрхлэхийн дарга асан зартай шударга, хацар товхтой хүн энэ томилгоог сонсоод толгой сэгсрэн сууна гэж намын хүмүүс ярих.
Ингэж төгсөрсөн шигээ ажлаа төгс хийх хэрэгтэй, Цэрэнпилийн Даваасүрэн. Сэтгүүлчид одоо Ц.Даваасүрэнгээс үргэлж асуух хэрэгтэй. Хархорумын ажил хэр явж байна, хэн саад болж, хөрөнгө оруулалт нь хэр байна, хүрч байна уу, сэтгэлд тань хүрэхгүй юу байна, Хархоринг тойроод эрх ашгаар хүмүүс таныг ээрүүлдэж байна уу, та шударга ажиллах уу, Хархорум яг хэзээ босох юм, арван хувь мувь үгүй биз дээ гээд өчнөөн төчнөөнийг асуугаад, ажилд нь туслах ононо.
Ц.Даваасүрэн сайд үнэхээр сайн, үнэн шамдалтай, гарцаагүй юм хийж байж л арга буюу арван хувь гэдэг нэрээсээ сална даа. Хамт дагалдаад байхад өгөрдүү нэр юм.
Ц.Даваасүрэн сайд мэдээж өгөр юманд дургүй нь тодорхой. Арван хувь гэдэг чинь АТГ-ынханы хувьд аймаар “тодорхойлолт” биз дээ.
Б.БАЯР
Amlalt.mn
