Монгол Улсын Цагаатгах Ажлыг Удирдан Зохион Байгуулах Улсын Комиссын нарийн бичгийн дарга Г.Төгөлдөр, Захиргаа, дүн шинжилгээний албаны дарга Л.Очирсүрэн, Ажлын албаны ажилтан Д.Зоригт нарын бүрэлдэхүүнтэй ажлын хэсэг Өвөрхангай аймгийн ИТХ-ын дарга, Цагаатгах ажлыг удирдан зохион байгуулах аймгийн салбар комиссын дарга О.Пүрэвдорж, тус салбар комиссын нарийн бичгийн дарга Т.Гончигдорж болон холбогдох албаны хүмүүстэй ажил хэргийн уулзалт зохион байгуулж, санал солилцов.
Мөн хэлмэгдэгсдийн ар гэр, үр хүүхдүүдийн төлөөлөлтэй уулзаж улсын комиссоос хэрэгжүүлж буй үйл ажиллагааны талаар мэдээлэл өгч, тэдний сонирхсон асуултад хариулт өглөө.
Тус ажлын хэсэг Өвөрхангай аймаг дахь салбар комиссоос хэлмэгдэгсдийн гэгээн дурсгалыг мөнхжүүлэх, иргэд олон нийтийг соён гэгээрүүлэх чиглэлээр хэрэгжүүлсэн "Хэлмэгдэгсдийн дурсгалыг мөнхжүүлэх гэрэлт хөшөө” цэцэрлэгт хүрээлэнгийн тохижилт ажлыг үзэж сонирхон орон нутагтаа идэвх санаачилгатай, бүтээлчээр ажиллаж байгаад талархалтай байгаа илэрхийллээ.
Дашрамд сонирхуулахад Өвөрхангай аймаг дахь салбар комисс нь 2022 онд дээрх цэцэрлэгт хүрээлэнгийн хайсыг засаж сайжруулан, гэрэлт самбар байршуулж, мод зүлэг тарьж ургуулж байгаа бөгөөд цаашид байнгын арчилгаа, үйлчилгээг “Арвайхээр нийтийн тээвэр, гэрэлтүүлэг” ОНӨААТҮГ, “Арвайхээр тохижилт, үйлчилгээ” ОНӨААТҮГ, “Арвайхээр цэцэрлэгжилт” ОНӨААТҮГ-ууд хариуцаж, хамтран ажиллахаар болсон билээ.
