Хууль зүй, дотоод хэргийн сайд Х.Нямбаатар гаднын хөрөнгө оруулагчдыг тонон дээрэмдсэн хэргийн жагсаалтыг ил болгоно гэдгээ энэ сарын 19-нд мэдэгдсэн юм.
Тэгвэл өнөөдөр /2022.10.28/ тухайн асуудлаар олон нийтэд мэдээлэл хийлээ.
Хууль зүй, дотоод хэргийн сайд Х.Нямбаатар “Ерөнхий сайдын захирамжаар Авлигатай тэмцэх ажлын хэсэг байгуулагдаад жил гаруйн хугацаа өнгөрлөө. Гадаадын хөрөнгө оруулагчдын эрх ашгийг хохироосон байж болзошгүй эрүүгийн болон иргэний хэргийн талаар мэдээлж байна. Энэ хоёр асуудал олон агуулгаараа давхацдаг гэж хэлж болно. Гадаадын хөрөнгө оруулалтгүйгээр эдийн засгийг тэлэх боломжгүй.
Гадаадын иргэнийг залилсантай холбоотой АТГ-аас 5, ЦЕГ-аас 50 гаруй хэргийн танилцуулга ирсэн. Ажиллагаанд байгаа зарим хэрэг мөрдөн байцаалтын нууцтай холбоотойгоор хүний нэр, албан байгууллагын нэрийг хэлэхгүй байхаар прокурорын байгууллагатай тохиролцсон.
Хэрэгсэхгүй болсон хэргүүдийг дахин сэргээхийг хүссэн албан бичгийг холбогдох байгууллагууд руу явуулна.
Тодорхой хугацааны дараа дотоодын хөрөнгө оруулагчдаа манай “томчууд” хэрхэн залилсан тухай мэдээллийг ил болгоно.
Над руу нууцалсан дугаараас залгаж, заналхийлэх, дарамтлах үйлдлүүд гарч байгаа” гэж ярилаа.
