Цахим хөгжил, харилцаа холбооны сайд Н.Учрал, Эрүүл мэндийн сайд С.Энхболд нар есдүгээр сарын 16-нд уулзаж, эрүүл мэндийн салбарын цахим шилжилтийн талаар ярилцсан.
Уулзалтын дараа Эрүүл мэндийн сайд С.Энхболд олон нийтэд мэдээлэл хийсэн юм.
Тэрбээр "Эрүүл мэндийн салбарыг цахимжуулах ажил олон жилийн өмнөөс эхлэлтэй. Өнөөдөр 37 өөр программ манай салбарт ашиглагдаж байна. Эдгээр нь хоорондоо мэдээлэл солилцдоггүй учир иргэдэд чирэгдэл учруулдаг. Үүнийг өөрчлөхийн тулд Эрүүл мэндийн салбарын цахим шинэчлэлийг эрчимжүүлэх чиглэлд анхаарч ажиллаж байна.
Цахим хөгжил, харилцаа холбооны сайд Н.Учралтай зөвлөлдөх уулзалтыг хийлээ. Уг уулзалтаар Цахим хөгжил, харилцаа холбооны яамнаас арга зүйн зөвлөгөө, мэргэжлийн тусалцаа хүссэн юм.
Цаашид хоёр сайдын хамтарсан тушаал гаргах замаар тулгарч буй асуудлыг шийдэх ажлын хэсгийг байгуулна.
Эрүүл мэндийн салбарт Дэлхийн банкны санхүүжилттэй “Эрүүл мэндийн цахимжилт” хөтөлбөр хэрэгжиж байгаа. Энэ төслийг үргэлжлүүлэх, алдааг нь засахад хоёр яам хамтран ажиллах болно.
Үр дүнд нь иргэн бүр И-Карттай болж, аль ч эмнэлэгт очсон шуурхай үйлчилгээ авах нөхцөл бүрдэх юм.
Одоогийн байдлаар Эрүүл мэндийн салбар 10 гаруй үйлчилгээг E-mongolia-д оруулсан. Цаашид нэмэгдүүлэх бодлого барьж байна. Эрүүл мэндийн салбарыг бүрэн цахимжуулна" гэжээ.
Нийтлэсэн огноо:
С.Энхболд сайдын АМЛАЛТ#1: Иргэн бүр И-Карттай болно
Энэ мэдээ хуучирсан буюу 2022/11/01-нд нийтлэгдсэн мэдээ болно.
