УИХ дахь Улаанбаатар хотын хөгжлийн асуудал эрхэлсэн Түр хорооны санаачилгаар нийслэл хотын тохижилт, амралт зугаалга, ногоон байгууламж, цэцэрлэгжүүлэлтийн төлөвлөлтийн асуудлаар хэлэлцүүлэг, уулзалтыг Үндэсний соёл амралтын хүрээлэнд энэ оны зургаадугаар сард зохион байгуулсан.
2022 оны тавдугаар сарын 30-нд хуралдсан Нийслэлийн ИТХ-ын ээлжит XIV хуралдаанаар хүүхдийн паркийн эзэмшилд байгаа 31.4 га газартай холбоотой тогтоолыг баталж гаргасан.
Ингэхдээ тус газрыг зөвхөн хүүхэд залуучуудын хөгжлийг дэмжих, чөлөөт цагаа зөв боловсон өнгөрүүлэх, амралт зугаалга, цэцэрлэгт хүрээлэн, ногоон байгууламжийн зориулалтаар ашиглаж, талбайн хэмжээ болон зориулалтад өөрчлөлт оруулахгүй байхаар тусгасан.
Тэгвэл тус уулзалт хэлэлцүүлгийн үеэр УИХ-ын дарга Г.Занданшатар “Үндэсний соёл амралтын хүрээлэн болон Баянзүрх дүүрэгт баригдаж буй “Эв нэгдлийн цэцэрлэгт хүрээлэн”-гийн эзэмшлийн нийт газрыг улсын тусгай хэрэгцээнд авах тогтоолыг батална” гэж мэдэгджээ.
Уулзалтын үеэр Нийслэлийн ИТХ-ын дарга Ж.Батбаясгалан хэлсэн үгэндээ “Бид хөгжлийг өндөр байшин, өргөн замаар дүгнэж байсан бол одоо дэлхий даяараа орон зай, амар тайван байдал, бүр цаашлаад суурьшмал соёлд дасан зохицож амьдрах хэв маягаа өөрчлөх нь хөгжил болон хувирч байна.
Иргэд маань тайван алхах зам талбай, үр хүүхдээ тоглуулж, салхилуулах орон зайг хөгжлийн суурь гэж харж байна. Бидний зогсож, зөвлөлдөж байгаа энэ газар 60 жилийн түүхтэй. Энэ хүрээлэнгийн төв цэгт хүрэлцэн ирж, Улаанбаатар хотын тохижилт, амралт зугаалга, ногоон байгууламж, цэцэрлэгжүүлэлтийн төлөвлөлтөөр санаа бодлоо уралдуулж байгаа УИХ-ын гишүүддээ талархал илэрхийлье.
Нийслэлийн ИТХ, Нийслэлийн Засаг дарга, түүний баг хамт олон яг энэ асуудлаар зургаадугаар сард тодорхой шийдвэр гаргахаар ажиллаж байна. Улаанбаатар хотыг зөвхөн төрийн шийдвэр, төсвийн хөрөнгөөр босгоогүй. Энд үеийн үед ажиллаж, амьдарч байсан иргэд, аж ахуйн нэгж, татвар төлөгчдийн оролцоогоор бий болсон. Тиймээс энэ хүрээлэнгийн орон зайг хадгалж ирсэн аж ахуйн нэгжүүддээ мөн талархал илэрхийлье. Одоо бүгдээрээ эрүүл аюулгүй, ногоон хотыг бий болгохын төлөө иргэд болон төрийн хамтын дүрмээ тохирно” гэжээ.
