Шатар их сайн тоглодог хүн шиг байдаг. Монголд болж байгаа бүх шатрын тэмцээнээс түүнийг харж болно. Гадаадад болдог тэмцээнүүдэд ч оролцомтгой. Ерөнхийдөө л улс төрийн шатрын өргийн ард суухаас, ухаан оюуны шатрын хөлгийн ард илүү суумтгай хүн дээ, эл бүсгүй. Миеэгомбын Энхболд даргыг бараадамтгай, тэгээд ч улс төрд ороод ирэх шиг болсон.
Ногоон хөгжлийн асуудал яриад байдаг. Энэ нь огтоос буруугүй. Одоо У.Хүрэлсүх Ерөнхийлөгчийг дагамтгай болоод, хүнс хоол, тэрбум мод тарихын чиглэлээр яваад байх шиг байна. Улс төрийнхөө индрээс, УИХ-ынхаа суудлаас энэ эмэгтэй тийм ч хоногшилтой үг хэлж, жинхэнэ улс төрчийн хувиар тийм ч сайн жишиг үзүүлсэнгүйгээр хоёр дахь парламентынхаа нүүрийг дуусгах гэж байх шиг. Баянзүрхээс хоёр гарчихсан, УИХ-д.
Баянзүрхийнхэндээ бачтай юу, бахтай юу, нэг их овойх зүйл мэдэгддэггүй. Лавтайяа, хорин оны сонгуулиар Баянзүрхэд дэвшигсэд Цагаан даваанд хог боловсруулах үйлдвэр барина гэж амласан. Б.Саранчимэг энэ амлалтыг хийсэн хүний нэг. Саяхан Б.Энхбаяр нь хариулна билээ. Хогны үйлдвэр баригдаагүй ээ, төслийн явцыг дүүргээс асуу гээд хээвнэг зогсож байна билээ. Б.Саранчимэг бас ингэсхийгээд зогсох юм болов уу.
Баттөмөрийн Энхбаярын ярьж буйгаар бол энэ дүүрэг оносон, тогтсон эмнэлэг байхгүй, одоо л харин гишүүд нь нэгдээд, хамжаад эмнэлэг бариулах юм болж байгаа гэх. Б.Энхбаяраасаа дөрвөн жил илүү УИХ-д суусан Б.Саранчимэгээс энэ асуултыг асуувал юу гэх юм бол. Юу ч гэхэв дээ, тийм ээ, Энхбаярын ярьж байгаагаар л байгаа гэх юм байлгүй дээ. Ингэхээр Б.Саранчимэгийг хоёр удаа УИХ-д сонгосон Баянзүрхчүүдийн эрх ашгийн багцаа аяндаа л үзэгдчихнэ.
Батсүхийн Саранчимэг гишүүн эдүгээ Дундговь аймаг руу ойр ойрхон явамтгай болсон, тэнд баяр ёслолоор бэлэг тараасан нь мэдээлэгдсэн. Баянзүрхээсээ Дундговь руу сэлгэн дэвших салхи үнэртүүлж байна. Бас л цараатайхан л нүүж байна аа даа. Шатрын хөлгийн ард дахь ялалт шатар тоглогчийн л ялалт байдаг. Хувь ялалт байдаг. Улс төрийн намаас шилэгдээд, УИХ-д дүүргийн иргэд төлөөлж, бэрс, ноён болно гэдэг нийтийн эрх ашиг байдаг.
Нийтийн эрх ашиг, Баянзүрхчүүдийн итгэл найдварыг, тэдэнд амласнаа Б.Саранчимэг хэрхэн биелүүлсэн бэ гэдгийг Саранчимэг ч, Баянзүрхчүүд ч бүгдээрээ хэлэлцээд, бүлээн усаар угаавал таарна. Тэгээд, хийсэн юмтай, хэлэх үгтэй аваас Дундговьдоо, эс бөгөөс Баянзүрхдээ дахин дэвших эсэхийн боломжтойг нягтлаад дэнсэлчих нь чухам ононо.
Байдаг л нэг гишүүн, байдаг л нэг товариш сонгоод, байлгаад байгаагийн үр дүн нь хөгжлийн уналт, хоцрогдол юм. Б.Энхбаярын хэлж байгаагаар бол Баянзүрх дүүрэг хүн ам нь үргэлж тэлээд, хийх учиртай, шийдвэрлэхээс аргагүй нэн олон асуудал хуримтлагдаастай байгаа юм билээ. Асуудлыг шийднэ гээд л манай УИХ-д суугсад орчлонгоор нэг цуурайтуулаад сонгогддог биз дээ.
Одоо Баянзүрхийнхэн Батсүхийн Саранчимэгээ амьдрал аж байдлыг шийдэхийн төлөөх шатарт их сууж уу, амжилт нь өөрт нь наагдах хувь шатрын өргийн ард илүү сууж уу гэдгийг нэгмөсөн нотлоод энэ хүндээ дүн тавих ёстой. Тэгж гэмээнэ л МАН энэ хүнийг дахин УИХ-д дэвших эсэхэд шийд гаргах нь бүх талын эрх ашигт нийцнэ. Намуухан дуугарч, намуухан амьдарч, намууханаар цаг төлвийг үрээсээр байдаг УИХ-ын гишүүд олон. Байгаа, байхгүй нь нэг их мэдэгдэхгүй. Б.Саранчимэг иймэрхүү өгүүлбэрээс нэг их зайлсхиймгүй л дүр зурагтай явж ирсэн гэвэл хилс огт үл болно.
Б.Саранчимэг шатрын хөлөг болгоны ард явж ирлээ. Лүндээтэй хамжаад л. Бас гадаад томилолтод зэгсэн идэвхтэй байж ирсэнийг УИХ-ын гадаад харилцаанаас асуучихад шууд мэдэгдэнэ. Энэ гишүүний идэвхтэй үйл ажиллагааны үнэмлэхүй хэсэг гадаад айлчлалын бүрэлдэхүүнд орж ажилласнаас маш тодорхой үзэгдэнэ. Уг хүн нь сайн хүн байх. Угтаа сайн гэдэг тодорхойлолт УИХ-ын гишүүнд ямар мөр замтай, ямар үйлс шамдалтай манлайлав гэдгээр л хэмжигдэх учиртай.
З.БАЯР
Амлалт.мн
