УИХ-ын дарга Г.Занданшатарын урилгаар энэ сарын 6-9-ны өдрүүдэд Энэтхэгийн парламентын доод танхимын дарга Ом Бирла манай улсад албан айлчлалаар зочлохоор болжээ.
Энэтхэгийн Засгийн газраас манай улсад Газрын тосны үйлдвэр барихад зориулан 2017 оноос 1.2 тэрбум ам.долларын хөнгөлттэй зээл олгож, 2018 онд Дорноговь аймгийн Алтанширээ сумын нутагт нефтийн үйлдвэрийн шав тавьж ажлыг нь эхлүүлсэн.
Гэвч тэр цагаас хойш 5 жил өнгөрсөн ч бид нефтийн үйлдвэрээ барих нь бүү хэл Уул уурхай, Хүнд үйлдвэрийн яам нь хариуцахаа больж, Эрдэнэс Монгол ХК-д шилжүүлж, Газрын тосны үйлдвэр нь хөгжлийн банкны зээлийн өрөнд орж, цалингаа тавьж чадахгүйд хүрч, инженер техникийн ажилчидаа алдаж, ажилчдын хотхон орон сууцны барилгын ажил эхлүүлчихсэн туслан гүйцэтгэгч компаниуддаа мөнгийг нь өгч чадалгүй хоёр жилийн нүүрийг үзээд байна.
Мэдээжийн хэрэг эдгээр шалтгааныг нэг талаас дэлхий нийтийг хамарсан цар тахал, түүнийг дагалдан бие болсон бараа материалын үнийн өсөлттэй уялдуулан ойлгож болох ч нөгөө талаас удирдлагын зохион байгуулалт, менежерийн ур чадвар сул байгаатай холбож тайлбарлаж болно.
Цаашлаад Дорнодын талруу 500 км нефть дамжуулах хоолой барих, тэндээс нефть хэрхэн олборлож уг хоолойгоор дамжуулах, үйлдвэрийн нарийн мэргэжлийн ажлыг гүйцэтгэгч Энэтхэг компаниудын тоног төхөөрөмж, зардал мөнгийг хэрхэн шийдвэрлэх вэ? гээд ойлгомжгүй асуудал олон байна.
Ийм нөхцөл байдлаас болоод Газрын тосны үйлдвэрийн захирал Д.Алтанцэцэг Энэтхэг улсаас олгосон хөнгөлттэй зээлийн санхүүжилтийг 30 гаруй хувиар нэмэгдүүлэх буюу 460 гаруй сая ам.доллараар санхүүжилтээ өсгөх шаардлагатайг хэлж байгаа.
Харамсалтай нь Энэтхэгийн парламентын доод танхимын дарга Ом Бирлад бид танай улсын засгийн газраас олгосон 1.2 тэрбум ам.долларын хөнгөлөлттэй зээлээр барьчихлаа гээд газрын тосны үйлдвэрийн гэх хэдэн сендвчин барилга, туслан гүйцэтгэгчдийн барьсан ажилчдын хотхоны орон сууцны барилгын карказыг үзүүлдэггүй юм бол ийм бүтээн байгуулалт хийчихлээ гээд үзүүлэх зүйл алга байна.
Ийм л ичгэвтэр байдалд бид Энэтхэгийн парламентын доод танхимын дарга Ом Бирлаг угтан авах нь дээ. Тэгэхлээр УИХ-ын дарга Г.Занданшатар та мань даргад танай Засгийн газраас нь манайд олгосон хөнгөлттэй зээлийг бид нефтийн үйлдвэр барих гээд амжилгүй үрээд дуусгачихсан гэлтэй нь биш ямар энэ тухай сэдэв сөхөж ярилгүй, баяр наадам, хурдан морь, хүчит бөх энэ тэр гэж аргалаад буцаасан нь дээр байх.
Аан тийн, нефтийн үйлдвэрийн хотхоны барилгыг бариад мөнгөө авч чадалгүй 3 жилийн нүүрийг үзсэн гүйцэтгэгч компанийн ажилтнууд төрийн ордоны гадаа жагсаал хийгээд байсан, энэ нөхөд Ом Бирла даргыг ирэхэд зам дагуу нь уриа лоозон бариад зогсож, нефтийн үйлдвэрийн ажил зогсонги байдалд орчихсоныг түүнд сануулах бий дээ гэдэгт УИХ-ын дарга Г.Занданшатар нэг анхаарна биз ээ.
Ц.Мөнх
Амлалт.мн
