Хүрэлбаатарын Булгантуяа Эйнштеинээс ишлээд л алдаагүй хүн гэж байхгүй гээд л мэтгээд байна. Төр бол алдах ёсгүй юм л даа. Та төрийг төлөөлж байгаагийн хувьд мөн алдах учиргүй юм. Алдахаар өмнөх сайд Д. Сарангэрэл шиг л ойчно шүү дээ. Улны гэж хэлэхээс, тэгэж хэлж алдахаас айхгүй гээд байвал, Х. Булгантуяа сайд хэлнэ л биз. Өөрт нь тусгүйгээс гадна, төрд тусгүй зүйл болдог.
Сайд нар байсхийгээд солигдоод, сав л хийвэл ойчоод байх нь Х.Булгантуяагийн удирдсан яамаас жишээчлэн төгс ойлгогдсон. Энэ дөрвөн жилд А. Ариунзаяа, Т. Аюурсайхан, Д. Сарангэрэлийн сэлгэлтээр наад яам чинь албан удирдлагын хувьд үдийн будаалга шиг л байгааг Х. Булгантуяа сайд ойлгоосой, алдаагүй гэж байх учиргүй мэтээр ярих чинь онохгүй байна даа.
Тэтгэвэрийг нэмсэнээс орхигдсон гээд нийгмийн нэг хэсэг гомдоллоод байна. Тэрийгээ л бодож, төлөвлөж, шийдэл эрэх нь Х.Булгантуяагийн ажил баймаар. Говьд баахан хар хувцастай дарга нарын дунд цэнхэр дээлтэй сууж байгаа харагдсан. Хүүхнүүдээ бодоод, жендерээ тэгшитгээд, манлайлах , оройлохоо бодсон нь л зөв байх.
Эрүүл мэндийн сайд Содномын Чинзориг донрын асуудлаар оройтсон уучлал, учирлал хийсэнд нийгэм таатай байхгүй байх шиг байна. Сэтгүүлч Н.Өнөрцэцэгийн нийгэмд гаргасан асуудлаар олон л өнцөг гарч байх шиг байна.
С. Чинзориг угийн л нэг тийм хулчигнуур, араар суумтгай, гоншигнуур маягийн эр л дээ. Донрын асуудлаар энэ хүнд хийх ажил эрх зүйн чиглэлд асар их байгааг нийгмийн хэлэлцүүлэг харуулж байна. Хамгийн наад зах нь С. Чинзориг энэ салбартаа гадагшаа урсдаг мөнгөний урсгалаа авч үлдэхэд бодлого, ахицыг бодьтой хиймээр байгаа юм.
Ж.Чинбүрэн хэлээд байдаг. Монголд анагаахын бүх технологи, эмчилгээ, эмнэл дэлхийн түвшинд бүгд нутагшсан, ертөнцөөс дутах зүйл огтхон ч үгүй гээд. Хэдэн сая доллараар бид гадаадад эмчилүүлж байгаа. Энэ урсгалаа Монголдоо шингээх, ард иргэдийн сэтгэл зүй, мэдээллийг эх нутагтаа итгүүлэн дэмжүүлэх гээд маш их ажил байна, С. Чинзоригт. Тэр харин гэтсэн, арагш суусан байдалтай, Арвайхээрт бөхийн цолны найрт үг хэлээд л яваад байгаа.
Харилцаа холбооны Н.Учрал машины гэрчилгээг цахимаар шилжүүлэх боломжтой болсон тухай мэдээлж байна.Цаг зав, зардал чирэгдэл, хүнд суртал танагдаж л байна. Овоо доо л гэмээр.
Монголын сайдууд янз бүр байна. Х. Нямбаатарыг Б. Ганхуяг хорин нэгэн онд жиргээгээр баахан загнасан юм байна. Үүнийг нь нийгэмд гаргаад, эдүгээн зодооны суурь ингэж тавигдаж байв гээд л бичигдээд байна. Сонирхолтой нь, Х.Нямбаатар тухайн үед за , за л гэж хариулаад байж. Нөгөө өөр рүү нь агсрагчдаа.
Ардчилсан намын дарга Л. Гантөмөр Монголоо, Монголын улс төрийг ёс суртахууны, ёс зүйн заслаар эмнэе, илааршуулъя гэж. Үгүй ээ тийм, тэгэх ёстой, зөв л дөө, тэгэх л учиртай. Одоогийн парламентэд энэ талаар, ёс зүйн агуулгаар Дамдинсүрэнгийн Өнөрболор гэдэг гишүүн ихээхэн хэлдэг, давтаад байгаа үзэгддэг.
Л.Гантөмөр Д. Өнөрболорын үзэл санаа, тэмүүллийг өдөөгөөд бай, нийгэмдээ, парламентэд, Монголын улс төрд тариад өг . Нийгэмд үүн шиг тустай юм алга.
Б.БАЯР
АМЛАЛТ.МН
