Санжийн Баяр Сайнхүүгийн Ганбаатарыг баалаад л, шоглоод л байна. Ертөнцийн бүх зовлонг үүрсэн царайтай л гэнэ, муулж мөнгө олдог байсан, одоо магтаж олоход хэцүү болж байгаа юм байлгүй ч гэх шиг.
Санжийн Баяр Цэрэнпилийн Даваасүрэнгээс саяхан дулааны станцын төсөл сураглаад, тав зургаан жил болж байгаагаа бичсэн байсан. Улс төрөө ч С.Баяр гуай эрхбиш гадарлаж л байгаа л даа.
С.Баяр гуайгаас энэ мэт хандлагаараа илэрхийлчхээч гэмээр зүйлс их л байх юм, хүн доромжлох яах вэ. Жишээ нь, Халтмаагийн Баттулгын нүүрстэй, төмөр замтай гүн холбогдож байгааг С.Баяр дарга хэрхэн тайлбарлах бол. “Буу халаач” гэмээр. Бас нүүрсний сонсголын олон олон гэрч Х.Баттулга, Ж.Мөнхбат, Т.Аюурсайхан, Ц.Элбэгдорж нар яагаад сонсголдоо ирэхгүй байгааг С.Баяр стратегич ултай л тайлбарлана даа. “Хөөрөлдөөч” гэмээр.
Баттөмөрийн Энхбаяр “Н.Удаанжаргал, Б.Ганхуяг хоёр Х.Баттулгын өрөөнд л байж байдаг болсон, баахан бичиг цаас хараад гэж намаараа л ярьж байлаа” гэж хэлснийг С.Баяр дарга бас тайлбарлаасай.
Б.Энхбаяр мөн хэллээ шүү дээ. Л.Халтар, Г.Ёндон хоёр нь хариуцах ёстой Засгийн сайдууд атал Б.Ганхуяг, Н.Удаанжаргал хоёр асуудлыг Ерөнхийлөгчийн Тамгын газраас тавиулж, санал авхуулж байж, иймэрхүү л замаар явж гээд Засгийн газрын багцааг тодорхойлоод байгааг С.Баяр дарга л гаажтай тайлбарламаар хүн дээ.
С.Ганбаатарыг дооглож сууснаас эдгээрт л том тулхтай үг тайлбарыг С.Баяр дарга өгмөөр байна санж. Улс улсаараа байж чадаж байна уу, байсан уу гээд яривал ярихаар юмнууд С.Баяр шиг хүнд бол их л харагдмаар.
Оюу толгойн гэрээг хийснийхээ үрээр, улсаа тэжээх төслийг явуулсныхаа үрээр хар гэрт хүртэл хоригдсон Санжийн Баяр сайн нөхөр Баабартайгаа суугаад энэ мэтийг нэг сайхан яриасай. Нэг нэвтрүүлэг хөтлөх гээд ч байгаа юм уу, залах гээд ч байгаа юм уу, нэг юм хийж эхэлсэн бололтой.
Баяртай үдэш бил үү, яриа ч билүү. Түүнийхээ анхны дугаарыг “Баттулга ба нүүрс -төмөр зам“ гээд яримаар юм биш үү дээ, С.Баяр дарга аа!
“Жаран бутархай”-д бий л дээ, хэмээн догирхолгүй. Тэгээд улсаа хорлогчдыг нэг бүрчлэн яриад, жигшээгээд, дахин улс төрд орох үндэсгүй болтол нь босголж хаагаад, ухуулан таниулаад, энэ улс орондоо, ард түмэндээ жаахан гэгээрэл өгөөч, Ерөнхий сайд асан Санжийн Баяр аа.
Таныг одоо эд нар яаж ч “буудаад”, “харлуулах” гээд барахгүй. Та бол нэгэнт долоо буудуулж, найм шархаджээ. Одоо харин улс орныхоо төлөө хэн нь улс төрд байх ёстойг, хэн нь байх ёсгүйг зүгээр л нэрлээд нэрлээд явчхаач дээ. Энэ тун чухал байна. Зургаахан сарын дараа зуун хорин зургаан Баагий УИХ-д тухлах гээд байна шүү дээ.
Б.БАЯР
Amlalt.mn
