Бүх ард түмнээрээ нэг зүйлийг маш тодорхой харлаа. Энэ бол Эрдэнэс таван толгой, Хөгжлийн банк дээр нүүрлэсэн байсан их хулгайг.
Улмаар үүнийг нь засаж, хулгайг илрүүлэн, далд эдийн засгийг ил болгоод ирэхээр эдийн засгийн ямар боломж бололцоотойг харлаа. Үгүй гэж хэлэх маанаг үгүй биз.
Дефольт зарлах нь гэж суусан улс арван хоёр жилийн үргэлжилсэн өрийн гинжийг таслаад, ирэх онуудад төлөх өргүй, суурь эдийн засгийн өсөлт бодитой биежиж, валютын нөөц арван тэрбум ам долларт хүрэх тухай оны шувтаргад ярилцаж суугааг таатай хэрэг гэхгүй бол юуг таатай гэх билээ.
Хөгжлийн банк, Эрдэнэс таван толгой хоёрт нүүрлэсэн хулгайн зуд төрийн өмчийн компаниудад яг адилхан байж л байгаа гэдгийг одоо бид улсаараа мэдэж байна.
Тийм учраас шууд л дараа дараагийнхад нь маш нухацтай шалгалт шүүлгийг оруулж, сонсголдоод байх хэрэгтэй байна.
"Эрдэнэс Монгол” гээд Монголын бүх баялгийн толгой компани байж байна. Захирлаар нь яам болгонд шахуу ажилласан, дэд сайд явсан, ерөөсөө албан тушаалын авиралт нь оргил болсон С.Наранцогт гэдэг хүн ажилладаг. Энэ одоо Дундговьд нэр дэвшиж Их хурлын гишүүн болохоор явах гэж байгаа гэх. Түүний эрхэлсэн ажлын хүрээнд, толгойлсон толгой компанийн нь дор байгаа “Эрдэнэс таван толгой” ямар байдалд байсныг бид харлаа.
Б.Ганхуяг гэдэг хүн сонсголд оролцож чадсангүй, тэр хүн бас УИХ-д санаа зүүсэн, гавьяат болон шагнагдаж явсан аа даа.
С.Наранцогт “Эрдэнэс Монгол”-д ажиллах хугацаандаа Б.Ганхуяг шиг эрсдэл, асуудал гаргаагүй гэх баталгаа байна уу. Үүнийг хаана, хэн сорилжуулж УИХ-д сойх гээд байгаа юм бэ. “Таван толгой түлш” гэдэг компани дээр ямар их завхрал, будилаан нь байгааг саяын сонсгол харууллаа биш үү. С.Наранцогтын асуудал мөн биз дээ, том агуулгаараа.
С.Наранцогт нар эрхэлсэн ажилдаа ямар ид шид үзүүлчхээд Их хурлын гишүүн болох гээд яваад байгааг урьдчилан судалж, сорилжуулах хэрэгтэй ээ.
Төрийн өмчийн компаниудын захирлууд л төрийг хохироосон идээчин уугаачингууд болчхоод удсан жишээг нүүрсний сонсголоор нэртэй, зүстэй нь харцгаалаа, бүгдээрээ. “Эрдэнэс Оюу толгой” компанийн захирал Н.Цэрэнбат гэгч дахиад л УИХ-д үзнэ гээд л мэдээлэгдээд байх. Энэ хүнийг Байгаль орчны сайд явахдаа ямархуу эрх ашгийн зөрчлүүдтэй явсныг олон нийт мартаагүй дээ. Эрдэнэс Оюу толгойд ихээхэн удаан ажиллалаа. Энэ хүн УИХ-д ахин суухаар тийм их чухал хүн үү. Эрдэнэс Оюу толгойд хэрхэн гийгүүлээд ахин УИХ-ын зүг шогшино вэ.
Саяхан Эрдэнэт үйлдвэрт баяр тэмдэглээд үе үеийн захирлууд нь гарч байна. Эгнэж зогсоод л.
Х.Наранхүүгээс бусад нь идсэн уусан нь л хэвлэлээр бичигдсэн, асуулга, шүүх гэж явсан, яваа улс харагдаж байгаа шүү дээ.
Ч.Ганзориг, Х.Бадамсүрэн, Д.Дорлигжав гэлдээд л. Одоогийн дарга Гэлэнгийн Ёндон ч ямархуу будилаан лоосуутай ажиллаж байгааг таах аргагүй.
УИХ, Засгийн газар аа, одоо он гаруут “Эрдэнэс Монгол”, Эрдэнэт, Таван толгой түлш компаниуддаа үргэлжлүүлэн өндөр шалгалт оруулж, сонсгол хийе.
Таван толгой түлшээс эхлэх хэрэгтэй. Ерөнхий сайд Л. Оюун-Эрдэнэ, Засгийн газар ч үүнийг хийхээ мэдэж буй байх!
Б.ДОРНО
Amlalt.mn
