Өдгөөгийн УИХ-д ёс зүйн асуудлыг нэлээд давтамтгай гишүүн. Түүний ярьж, сануулснаар УИХ-ынхан оюун санаа, ёс суртахууны хувьд дэвждэг бол дэвжмээр. Гэвч эсрэгээрээ, ёс зүйн асуудлаар унагсад Их хурлаар дүүрэн.
Д.Өнөрболортой нэг тойрогт дэвшиж УИХ-д суугсад ч ёс зүйн асуудлаар нийгэмд нэлэнхүй агуулгаар унамал байгаа. Мөн дээрээс нь сонгуулийн хууль бус сурталчилгаа хийгээд байгааг Д.Өнөрболор өрсөлдөгчийн хувиар харж л байдаг биз.
Сэлэнгэ аймгаас сонгогдсоны хувьд хүлэмж, газар тариалангийн чиглэлээр энэ эмэгтэй ихээхэн шамдуу ажиллах шиг үзэгддэг. Нэг үгээр хэлбэл тойргоо сүрхий тордсон. Гэтэл одоо сонгууль бүсчилсэн тойргоор явагдах болчихлоо.
Д.Өнөрболорт дахин гишүүн байхын тулд Дарханд, Төв аймагт санал авах хэрэгтэй болж байх шиг байна.
Дархан, Төв аймагт энэ хүн хөрөнгө оруулалт, бусад тал тохой татах зүйл хийгээгүй нь ойлгомжтой.
Одоо тэр Ч. Ундрам нарынхаа ёс зүйг л их ярих хэрэг гарах байх даа. Б.Жавхлангаас илүү эдийн засгийн бодлого гаргаж, Ж.Батжаргал, Ц.Туваан нараас илүү сайн үгээр, илүү том агуулгаар ярьж хэлж, гүйцэтгэж байж л эдгээр эрсийн цаана гарах нь тодорхой.
Ийм боломж Д.Өнөрболорт байгаа юу. Гэхдээ мань гишүүнийг бэл сайтай гэж бичигдээд байх. Барилгатай, мөнгөтэй гээд л. Гэвч мөнгөөр, эдээр татаж сонгууль явуулж болохгүйн илэрхийлэл нь Д.Өнөрболорын яриад байдаг ёс зүй л дээ.
УИХ дээр хэлэх ярих үгээ бас ч гэж дорвитой хэлэх гээд байх шиг байдаг. Б.Чойжилсүрэн, Г.Тэмүүлэн нарыг шүүмжлээд, утаа угаарын эсрэг яриад байсан нь тод л байсан.
Зарчмын бодлого дээр зогсож чадахаар харагддаг. Гэхдээ заримдаа сэтгүүлчдэд ээрэгдэхээрээ таг болчих байдал харагдах.
УИХ-д дөрвөн жил суусан гишүүн чинь ямар ч асуудалд хэзээд хариулах сүйхээ самбаа баймаар. Н.Өнөрцэцэг цэргийн асуудлаар яриа авах гээд нэгэнтээ хоргооход, ер олигтой юм хэлэлгүй тойрч гараад, өнөө Н.Өнөрцэцэг нь ийм л гишүүн байна шүү дээ гээд л зогсож асан нь нийгмээр нэг яваад л байсан.
Энх цагт эр цэрэг эндэх ёсгүй ээ гэж хэлээд ярих юм зөндөө л байсан. Миеэгомбын Энхболд улс төрд өдлөхөд нь ихээхэн дэм болсноор ойлгогддог. Гишүүн болоогүй байхад нь Барилгын сайдаар тавина л гээд мэдээлэгдэж байв. Барилга гэснээс маш их барилгатай, Зайсангаар нэг л гэх.
Манай УИХ-ын бүх ихэнх гишүүд Богд уулаар нэг байшин барьсны нэг л дээ. Үгүй гэх боломжгүй юм. Сөүл рестораны хоолны нэвтрүүлэгт хүүхэд ахуйгаасаа орчуулагч хийгээд нийгэмд танигдсан. Одоо энэ ресторан түүний өмч. Солонгос хэл сайтай, орос хэл бүр сүрхийгээ Оросод болсон нэг хурлаар илэрхийлж байсан. Боловсрол мэдлэг нь боломжийн байх. Харин эл гишүүн өнгөрөгч дөрвөн жилд нийгмээ өөрчлөх тал дээр хууль тогтоогчийн хувиар үнэмлэхүй өөрчлөлт, манлайллыг бий болгож чадсан уу гэж нийгмээс асуувал, хэрхэн хариулахыг удахгүй болох сонгууль илэрхийлнэ байх аа.
Наана нь, нам нь нэр дэвшүүлэх эсэхийг нь шийднэ. Ж.Эрдэнэбат, Ч.Ундрам нараас түүнийг илүүд тавих уу, үгүй юу гэдгийг судалгаа, нам хоёр нь шийднэ биз ээ.
Б.ДОРНО
Amlalt.mn
