УИХ-ын чуулганы өчигдрийн хуралдаанаар УИХ-ын гишүүн М.Оюунчимэг иргэдээ орон сууцжуулах асуудлаар Барилга, хот байгуулалтын сайдад асуулга тавилаа.
УИХ-ын гишүүн М.Оюунчимэг:Монгол Улсын Ерөнхий сайд Л.Оюун-Эрдэнэ Үндэсний орон сууцжуулалтын тухай хуулийн төслийг УИХ-ын даргад өнөөдөр өргөн барилаа.
Энэ хууль хэрэгжиж чадвал 30000 айлын орон сууцтай болох бүрэн боломж хангагдана гэж үзсэн байна. 30000 айлын орон сууцыг барих ажилд хэдий хэмжээний санхүүжилт, хугацаа шаарагдах юм бол? Барилга хот байгуулалтын сайд хуралдаанд сууж байна.
“Хуримтлалын сан”-ийн хүрээнд 1,2 их наяд төгрөг санхүүжилт суулгасан. Энэ хүрээнд ипотекийн зээлийг 3 хувь болгосон. 2025-2027 онд 30000 айл өрхөөс хэдэн нь орон сууцанд орох бололцоо бүрдэх вэ, энэ орон сууц яг хаана баригдах юм бэ, Улаанбаатар хотод хэдэн орон сууц, орон нутагт хэд байх тооцоо судалгаанууд энэ төлөвлөлтөнд яаж орсон бэ? гэх зэрэг асуултанд хариулт авч тодотгоё гэж бодож байна.
УИХ-ын гишүүн, Барилга, хот байгуулалтын сайд Ц.Даваасүрэн:Бид доод тал нь 7000, 15000 айлын орон сууцыг ипотекийн зээлээр жилдээ барьж ирсэн. Энэ жил ипотекийн зээлийн эх үүсвэр хоёр дахин өсч байгаа. Энэ жилийн санхүүгийн эх үүсвэрээр 10000-5000 айлын орон сууц барих бололцоо бүрдэнэ гэж тооцсон. “Хуримтлалын сан”-д төрийн өмчийн компаниудын ноогдол ашгаас 570 тэрбум төгрөг хуримтлагдахаар байна. Одоо банканд байгаа 500 тэрбумтай нийлээд нэг их наяд гаруй төгрөгний эх үүсвэр бүрдэж байгаа.
30000 айл өрхийн тал хувь нь энэ жил төлөвлөгдөөд зээлийн гэрээ нь хийгдэж, ипотекийн зээлээр эхэлнэ. Ирэх жил 10000 айлын орон сууцыг барина. 30000 айлын орон сууцыг хоёр жилийн хугацаанд барих санхүүгийн эх үүсвэр бий. Гол хүндрэл бол валютын нөөц байдаг. Барилгын салбарын импортын хэрэглээ нь 70 хувь байдаг. Одоо валютын ханш нэмэгдсэн учир дарамт гарахгүй байх гэж бодож байна. Тийм учраас одоогийн санхүүгийн болон компаниудын чадавхи 30000 айлын орон сууцуудыг хоёр жилийн дотор барих бүрэн бололцоотой.
Б.БАЯРМАА
