УИХ-ын гишүүнээс “бууж” төрийн агентлагийн дарга болсон ч өөрийгөө УИХ-ын гишүүн “аятай төсөөлдөг”, ажилтнууддаа “арслан бар” шиг зан гаргадаг, төрийн ажлыг явуулахаас илүүтэй өөрийнхөө пиар, гоё аятайхан зураг мэдээ гаргахад анхаарлаа хандуулдаг гэх эмэгтэй байх.
Түүнийг Хүүхэд, гэр бүлийн хөгжил, хамгааллын ерөнхий газрын дарга Б.Баярсайхан гэдэг.
Б.Баярсайхан дарга 2020 онд БСШУСЯ-ны Төрийн нарийн бичгийн даргаар ажиллаж байхдаа олон нийтийн дунд эвгүй “хочтой” болчихсон гэдэг. Ямартай ч 2020-2024 онд УИХ-ын гишүүнээр ажилласан энэ хүнээс 4 жилд олигтой ажил, үйл хэрэг, дорвитой хууль “гараас нь гараагүй” гэж хэлж болно. Тиймдээ ч 2024 онд баруун бүст УИХ-д нэр дэвшсэн боловч ард олны дэмжлэгийг авч чадалгүй “өвдөг шороодсон”.
УИХ-ын сонгуульд ялагдсан хэдий мань хүн Хүүхэд, гэр бүлийн хөгжил, хамгааллын Ерөнхий газрын даргаар томилогдсон.
Монгол Улсад анхаарлаа хамгийн их хандуулах ёстой, төрийн бодлогод тусгах ёстой салбарын нэг бол Хүүхдийн эрх, хамгааллын асуудал, үүнийг дагалдан тогтвортой гэр бүлийг төлөвшүүлэх ажил. Энэ хүрээнд олон ажлыг хийж хэрэгжүүлэх шаардлага бий.
Ажлаа аваад 1 жил гаруй болж байгаа Б.Баярсайхан даргын хувийн болон Хүүхэд, гэр бүлийн хөгжил, хамгааллын ерөнхий газрын пэйж хуудсаар орж үзэхэд энд тэндэх хуралд өнөөх л Баяраа даргын гоё ганган, үйл хөдлөл, эрч хүчээр дүүрэн фото зураг мэдээ.
Тэр бүү хэл Б.Баярсайхан дарга өглөөний шуурхай хурлаар “өөрийнхөө аль зургийг мэдээнд оруулах тухай асуудал”-аар хэлэлцүүлэг шахуу яриа өрнүүлж, хамаг цаг заваа зарцуулдаг, зөвлөх нэртэй бүсгүйчүүдийнхээ үгээр төрийн ажлыг явуулдаг гэх зэрэг яриа байнга олны чих дэлсэх болжээ.
Магадгүй мань дарга даргын албан тушаал дээр дөрөөлж, дараагийн удаад томилогдох ажил албан тушаал, байр сууриа бодож пиараа чухалчилж байгаа биз.
Гэхдээ Хүүхэд, гэр бүлийн хөгжил, хамгааллын ажил бол элдэв пиар шаардлагагүй, эрх нь зөрчигдсөн хүүхэд бүрт хүрт ажиллахыг чухалчилдаг, мэргэжлийн төдийгүй сэтгэл зүрхтэй хүний хийдэг ажил.
Тиймээс Ерөнхий сайд Г.Занданшатар та өөрийнхөө пиарт анхаарлаа хандуулдаг, салбарын бодлогыг элдэв хурал форумаар төсөөлдөг, энэ салбарын ажиллыг дээшлүүлэх биш “унагаж” байж болзошгүй Хүүхэд, гэр бүлийн хөгжил, хамгааллын Ерөнхий газрын дарга Б.Баярсайханыг үүрэгт ажлаас нь чөлөөлж, түүний оронд “би би гэх эго” багатай, мэргэжлийн чадварлаг боловсон хүчнийг томилох нь энэ салбарын хөгжилд чухал хувь нэмэр болох болно.
А.Галт
amlalt.mn
