Ардчилсан намын дарга, УИХ дахь АН-ын бүлгийн дарга О.Цогтгэрэл, УИХ-ын гишүүн Д.Ганбат, А.Ганбаатар нар АНУ-ын Вашингтон хот орчимд ажиллаж амьдарч, суралцаж буй Монгол Улсын иргэдтэй Элчин сайдын яаманд /2025.11.30/ уулзалт хийлээ.
Ардчилсан намын дарга О.Цогтгэрэл "Монгол Улс улс төрийн ардчилсан тогтолцоотой, чөлөөт эдийн засгийн системтэй улс, АНУ ч мөн ардчилсан тогтолцоотой, дэлхийн хамгийн том, хамгийн технологижсон эдийн засагтай улс орон. Тиймээс Монгол Улсад АНУ-аас суралцах олон зүйлс, хамтран ажиллах өргөн боломж, шаардлага бий" гэдгийг онцлов.
Ялангуяа ардчиллыг бэхжүүлэх, эдийн засгаа хамтын ажиллагааг бодитоор хөгжүүлж, Монгол Улс ардчилсан тогтолцоотой улс орны эдийн засаг хэрхэн илүү хурдтай, чанартай хөгждөг вэ гэдгийг харуулах ёстой гэж үздэгээ илэрхийллээ. Түүнчлэн улс төрийн сонгуульд гадаадад амьдарч буй иргэдээ оролцуулахыг дэмжих, шийдвэр гаргах түвшинд оролцоог нь нэмэгдүүлэх чиглэлээр хийж байгаа ажлуудаа дурдаад АН-ын төлөөллийн төв байгууллагад гадаадад амьдарч байгаа иргэдийн төлөөллийг оролцуулах дүрмийн өөрчлөлт оруулсныг дуулгасан юм.
УИХ-ын гишүүн Д.Ганбат "АНУ бол Монгол Улсаас гадаадад хамгийн олон хүн амьдарч байгаа хоёр дахь орон. Монгол Улсын хүн амын бараг 10 хувь нь гадаадад суралцаж, ажиллаж, амьдарч байна. Улс орны хөгжилд эдгээр хүмүүсийн оролцоо чухал үүрэгтэй. Ялангуяа өндөр хөгжилтэй орнуудад мэргэжил, боловсрол эзэмшсэн иргэдээ сонсох нь чухал" гэж энэхүү уулзалтыг зохион байгуулж байгааг онцоллоо.
УИХ-ын гишүүн А.Ганбаатар Ардчилсан намын бүлгийн гишүүд хэвлэлийн эрх чөлөөг хамгаалах, иргэдийн жагсаал цуглаан зохион байгуулах, эвлэлдэх эрхийг баталгаажуулах чиглэлээр анхааран ажиллаж байна, мөн татварыг бууруулах замаар чөлөөт эдийн засгийн тогтолцоогоо дэмжих бодлогыг судалж байна, цаашид хөгжлийн бодлогоо оновчлоход гадаад ажил амьдралын туршлага, боловсрол эзэмшсэн иргэдийн санал зөвлөмж чухал болох талаар дурдлаа.
Вашингтон хот орчимд нийт 7000 гаруй Монгол иргэд оршин суудаг гэж бөгөөд тэдний төлөөлөл болох 30 гаруй иргэд уулзалтад оролцлоо.
Амарбаяр, Эрдэнэ-Оюун, Болдбаатар, Дэлгэрцогт, Бадарч, Уранчимэг, Гансүх, Мөнх-Очир тэргүүтэй иргэд Монгол Улсын боловсролын салбарыг АНУ-ын туршлагаар хөгжүүлж, хүүхдэд ёс зүйн боловсрол эзэмшүүлэх, нийгэмшүүлэх, сэтгэл зүйн зөвлөгөө өгдөг тогтолцоо бий болгох, үндэсний хэл, соёлоо хамгаалан дэлгэрүүлэх, монгол сургуулийн үйл ажиллагааг дэмжих, сонгуулийн тогтолцоог боловсронгуй болгох, төрийн албаны шинэчлэлд хувийн хэвшилд ажилласан туршлагатай иргэдийг татан оролцуулах, татварын тогтолцоог иргэдэд дарамтгүй болгох, эдийн засаг дахь төрийн оролцоог бууруулж хувийн хэвшлийг дэмжих замаар авлигыг бууруулах зэрэг олон асуудлаар санал бодлоо илэрхийлж Ардчилсан намын гишүүдээс асуулт асуув.
Amlalt.mn
