Ерөнхий сайд Г.Занданшатар, Хууль зүй дотоод хэргийн сайд Б.Энхбаяр нар төрд бугшсан хулгайтай эвлэрэхгүй тэмцэхээ илэрхийлсэн. Ерөнхий сайд Г.Занданшатар үүрэгт ажлаа гүйцэтгээд хагас жил гаруй хугацаа, ХЗДХ-ийн сайд Б.Энхбаяр ажлаа аваад 3 сар орчим хугацаа өнгөрлөө.

Тэдний хулгайтай хийх “тэмцэл”-ийн нэг чухал хэлбэр бол төрд шургасан, авлигын сүлжээ бий болгосон байж болзошгүй төрийн байгууллагын удирдлагуудыг үүрэгт ажлаас нь чөлөөлж, шударга зарчимч, мерит зарчмын дагуу ажиллаж ирсэн хүмүүсийг тэдний оронд томилох явдал юм.

Төрийн байгууллага иргэдэд нээлттэй, ил тод, хүнд сурталгүй, шударга, түргэн шуурхай үйлчлэх эсэх нь түүнийг удирдаж байгаа удирдлага, түүний багаас ихээхэн хамааралтай.

Ерөнхий сайд асан Л.Оюун-Эрдэнэ улс орны хэмжээний зарим чухал салбарын удирдлагад хийсэн томилгоо нь алдаатай байсныг өнгөрсөн 2-3 жилийн нөхцөл байдал тодорхой харууллаа гэж хэлж болох.

Гааль, Шүүх шинжилгээний Ерөнхий газар, Дотоодын цэрэг салбаруудад бүгдэд нь Цагдаагийн байгууллагад ажиллаж байсан хүмүүсийг томилон ажиллуулсан. Ингэснээр тухайн салбарт ажиллаж байсан мэргэжлийн хүмүүсийг хавчин гадуурхах, тушаал бууруулах, ажлаас нь чөлөөлөх, тэдний оронд цагдаагийн байгууллагаас алба хаагчид шилжин ирж тушаал дэвшин ажиллах байдал үүссэн. Үүнээс болж дээрх байгууллагуудад албан тушаал, авлигын сүлжээ “бий болсон” байж болзошгүй нөхцөл байдал үүсжээ.

Тиймээс Ерөнхий сайд Г.Занданшатар, Хуульзүйн сайд Б.Энхбаяр та бүхэн өмнөх Ерөнхий сайд асан Л.Оюун-Эрдэнийн гаргасан алдааг бүү давтаасай гэж хэлэх байна.

Ганцхан жишээ хэлэхэд, Гаалийн Ерөнхий газрын даргаар Нийслэлийн цагдаагийн дарга байсан хүнийг томилоод, өнөөх нь гурван жил ажиллаад өнгөрөгч 12 сард чөлөөлөгдсөн.

Цагдаагийн дарга байсан хүн нь гаалийн ерөнхий газарт даргаар очсноор тухайн салбарт хүчний байгууллагын хандлага давамгайлах, салбарын мэргэжлийн чадварлаг боловсон хүчний цагдаагийн албан хаагчдаар сольж томилох, мэргэшсэн албан хаагчдыг тушаал бууруулах, чөлөөлөх, ажлаас шахах халах зэрэг нөхцөл байдлууд гаарсан. Тэдний оронд цагдаагийн байгууллагаас томилогдсон албан хаагчид даргын “тушаал биелүүлэх” нэрээр хууль бус ажиллагаанд гар бие оролцсон байж болзошгүй хандлага илэрсэн гэх юм билээ.

Түүгээр зогсохгүй шударга ажилласан гаалийн байцаагчидад цагдаагийн байгууллагаас дарамт шахалт үзүүлэх, шалгах хянах нэрээр мөрдөн шалгах нэрээр “дарамтлах” хандлага бий болсон гэх.

Ийм алдаа завхрал олонтой гарсан учир Ерөнхий сайд Г.Занданшатар өөрийн биеэр Хотын гааль дээр очиж, гаалийн байцаагч нар авлигын сүлжээ үүсгэж ажиллаж байсан тухай мэдэгдэж, гаалийн байгууллагад “Танилын бараа”, “Онцгой шугам” зэрэг авлигын суурьтай, арын хаалганы үйлдлийг таслан зогсоох үүрэг өгч, төд удалгүй Гаалийн ерөнхий газрын даргыг үүрэгт ажлаас нь чөлөөлсөн.

Тиймээс гаалийн байгууллагад гарсан шиг ийм алдаа завхралыг арилгахын тухайд Ерөнхий сайд Г.Занданшатар, Хууль зүйн сайд Б.Энхбаяр нар юуны өмнө тухайн салбарыг удирдуулахад мерит зарчмаар явж ирсэн тухайн салбарын мэргэжлийн хүмүүсийг томилох нь чухал. Энэ нь зөвхөн тухайн салбарын хөгжил төдийгүй улс орны хөгжилд чухал хувь нэмэртэй томилгоо болно.

Уг нь тухайн албанд түр орлон гүйцэтгэгчийг томилохдоо мэргэжлийн хүмүүсээр томилдог атлаа яг жинхэлж томилохдоо улс төрийн томилгоо нэрээр, элдэв сайд дарга нарын “шахааны хүн”, цагдаа хүчний байгууллагаас томилдог явдлыг таслан зогсоож, түр орлонгоор ажиллаж байгаа мэргэжлийн хүмүүсийг нь жинхлэх байдлаар томилох нь зүйтэй юм.

Тиймээс одоогоор түр орлон гүйцэтгэгч удирдан ажилалж байгаа Гааль, Шүүх шинжилгээний Ерөнхий Газар, Дотоодын цэргийн Газар зэрэг байгууллагуудад түр орлон томилгоог нь жинхэлж, эдгээр салбарыг мэргэжлийн, чадварлаг хүмүүсээр удирдуулах нь чухал байна.

Салбараа мэддэг, ажлаа ойлгодог, мэргэжлийн ур чадвар өндөртэй ийм хүмүүсийг тухайн багууллагын удирдлагаар томилох нь тухайн салбарын хөгжилд төдийгүй улс орны хөгжил дэвшилд бодит одоо хувь нэмэр болно гэж харж болно.

Түүнчлэн Хууль зүйн сайд Б.Энхбаяр та эдгээр зөв томилгоог улс төрөөс ангид, зөв, оновчтой хийж чадах юм бол дээрх салбарт ажиллагсдын талархалыг хүлээн болно.

Ц.Мөнх

Аmlalt.mn