Нам засгийн эрхийг барьж байгаа наяад оны Л.Оюун-Эрдэнэ, Д.Амарбаясгалан нарт ер бусын аз тохиож байна. Учир юун хэмээвээс ард түмэн жагсаж, нүүрсний дөчин их наядын хулгайг илрүүлэн, эздийг нь зарлаж, нүглийн нүдийг нүхтэй цаасаар хуурахгүй байж болох төгөлдөр боломжоор эрх баригчдыг хангаж байна.
Энэ гайхамшигтай ивээгч цаг хугацааг наяад оны дарга нарт алдах эрх байхгүй. Хулгайчдыг зарлаад өг, хамтран тэмцэе гэж ард түмэн жагсаж байна шүү дээ. Энэнээс илүү, үүнээс илүү яаж ард түмэн их удирдагчдаа ивээх вэ дээ. Иймийн тул цөс ихт шударга тавыг оройлогч Л.Оюун-Эрдэнэ, Т.Аюурсайхан, Х.Нямбаатар, мөн оргил шударгуу Д.Амарбаясгалан нар ямар эрх мэдэл дутахын гуцуу байх биш өнөөдөр нүүрсний их хулгайчдыг ард түмэндээ зарлан таниулж тэднийг жигшээн цээрлүүлж, ард түмнийхээ өмнө гавьяа байгуулах хэрэгтэй байна. Үндэстнээ аврах хэрэгтэй байна.
Эс тэгвэл тэдний шударга ариун, өндөр дээд хэргэм цол, эрх мэдэл албан тушаал эх орон, ард түмний төлөө бус зөвхөн өөрсдийн нь өчүүхэн хар толгойн төлөө зориулагдаж байсныг ард түмэн яс махандаа тултал ойлгож, маргааш гэхэд тэднийг зайгаа тавьж, чаддаг мэддэгт нь ажлаа шилжүүлэхийг нэн тодорхой шаардах нь дамжиггүй байна. Үнэхээр л эх орныхоо төлөө юм бол тэд өнөөдрийн дотор нүүрсний хулгайч, ард түмэн, эх орны эдийн засаг, эрх чөлөөний боломжийг хулгайлсан этгүүдийг нэн даруй ил болгон, эрх мэдлийнхээ үнэ цэн, эх орныхоо төлөөг илэрхийлэх хэрэгтэйг өнөөдөр илүү олон, маш олон хүн шахаж шаардана.
Хэрэв тэд үүнийг хийж чадахгүй бол хоёрдугаар гарц мөн тодорхой байна. Тэр нь юун хэмээвээс, ах нар хийгээд, олон жил төрд нүүрлэсэн хулгайг бид илрүүлж, ил гаргаж, зарлаж чадахгүйд хүрлээ, яагаад гэвэл ир, эр мөр, эн далайц дутлаа гэдгээ шулуухан хэлээд ажил албаа өгөх сайхан гарц байна.
Ард түмэн хэзээд үнэ цэнээ мэдэж, эх орныг тонон цөлмөгчдийг эгнэгт цээрлүүлж ирсэн. Тэд чадна. Ардчилсан нам гэж бас нэг нам байж байна. С.Ганбаатар, Х.Баттулга, С.Баярцогт тэргүүтэй эх орончид өнөөдрөөс дуугарч эхлэх биз.
Эрх баригчдад нэг тийм хөгийн юм байдаг, башир, муу санаа. Энийг жагсаалын үеэр их үзүүлдэг. Өмнө хаврын гоё жагсаалыг Ерөнхий сайд нь дотроос нь эмхлээд, ажлаа хий гэж хэлүүлээд гараад ирсэн. Аятайхан намжааж асуудлын ард үлдсэн. Энэ удаад ч тэр нь ханхалж байна. Нүүрсний хулгайг нам засаг л дарна бус уу, Хүрэлсүхийн хүмүүс энэ жагсаалд явж байна, харж байна уу гээд цулам троллуудаараа сэвүүлж байна. Хүрэлсүх зохион байгуулж байгаа юм байх. Ийм нохой зантай. Одоо үнэнтэй тулах хэрэгтэй. Ухрах зам байхгүй. Нэг муу гэр бүлээ огоорсон гишүүн хүүхнийг сэвээд ч огт тусгүй.
Нүүрсний хулгайчдаа зарлаж хариуцлага тооцох, эс бол Засгийн эрхээ чаддаг хүмүүст нь шилжүүлэх гарц үлджээ.
Б.Баяр
