Ш.Раднаасэд гишүүн өчигдөр бид таван гишүүнийг намаас зарлууллаа гэж мэдэгдсэн. Хариуд нь Хэрэг эрхлэхийн Д.Амарбаясгалан их гайхаж байна, нам нэр өгөөгүй гэлээ. Нэг нэгэндээ шууд хэлж байгаагаар ойлгогдож байгаа юм.
Ш.Раднаасэдийг Ардын нам элэгдээд удаж байгаа. Тэгээд “элэгдүүлж” ханасан юм байлгүй дээ, хөөрхий, Бүлэгтээ үгээ хэлээд намаасаа гардаг юм билүү дээ гэж сууна билээ. Ардын намын дарга Оюук, Генсек Амраак нар бол намаа ариун байлгахын тал дээр гайхамшигтай гэмээр уран гоё үгсийг олон хэлсэн. Авлига бол манай намаас алсын гариг, доод тив гэж хэлсэн дээ, ер нь л. Дөчин настай Оюук, төгөлдөр стратегич, Баярын араас орж байгаа баараггүй бодлоготон Амраак гээд бичигдэн мандаж ахуйдаа тийн хөхөөшсөн үгсийг уяруулж байлаа.
Гэтэл одоо яав, Ардын нам Их хурлын таван гишүүнээ авлигачинд нэрлүүллээ гэж Их хурлын гишүүн ярьж байна. Өчигдөр АТГ-ын үүдэнд ээлж дараалан мэдэгдэл хийгээд зогсож байгаа таван гишүүнийг харахад үнэхээр ч нүүрсэнд хутгалдаагүй байж мэдэхээр мэтгэж байна.
Ардын намын Бага хурал саяхан болох байтал нүүрсний жагсаалд “цохигдчихсон”. Генсекийн тайлан гэж тэр хурлын хөтөлбөрт буй харагдсан. Тэр тайлан хэрвээ тавигдсан бол намын санхүүжилт хэрхэн хийгдэж ирсэнийг нэгбүрчлэн тайлагнасан байсан байх. Нүүрснээс үүдэлтэй санхүү мэдээж байгаагүй байх.
Амарбаясгалан Генсек ер нь Ардын намынхаа хүмүүстээ авлигад идэгдчихвий гэж дэлхийн намынхны жишгээр сорил тавьж байсан юм болов уу. Ухаантай, стратегич нь үнэхээр үнэн бол эдгээр таван нөхөр, Раднаасэд, Анандбазар, Баттөмөр, Сэргэлэн, Наранбаатар нарын нөхөд сорилд нь сэжигтэй байсан уу, яасан бол гээд асуумаар юмнууд их л байх. Сэтгүүлчид асуухгүй юм. Асуухаараа "та нүүрсний хулгайд холбогдогдолтой юу" л гэх юм. Мэдээж, нөгөөдүүл нь би холбогдоогүй л гэнэ биз дээ. Бүгд л тэгэж байгаа. Гишүүдийн тэгэж хэлж байгаагаар маш гоё триллер хийчихмээр л харагдаад байгаа юм даа. Цочоод л, зугатаад л, хэнгэнэтэл санаа алдаад л, хэтрүү үнэнч болоод л. Холливууд цаашаа жүжиж байгаа даа, манай эрхэм гишүүд.
Одоо энэ таван гишүүн Д.Амарбаясгалантайгаа нийлээд ажлын хэсэг байгуулах хэрэгтэй. Нам дотроо. Тэр нь Анандбазарын хэлээд байгаа Нүүрсний хулгайг илрүүлэх ажлын хэсэг, бүлэг байх ёстой.
АТГ-ын үүднээс бус, ерөөсөө Ардын намынхаа цагаан байрны өмнө очоод гэр бариад суучихбал зохино. Аяндаа л намын дарга нар чинь санаа зовоод, хэн нь үнэхээр нүүрсний хулгайч вэ гэдгийг нийтэд нь харуулчихаж мэднэ шүү. Цагаан байр цав цагаан, ариун байх ёстой.
Цэдэвийн Сэргэлэн нэг юм хэлээд байна лээ. Нэг хүн бий. Нэрийг нь яваандаа, хэлэх цагт нь хэлнэ гээд. Тэрийг Сэргэлэнгээс тун сайн лавламаар байгаа юм даа, илжрэл ялзралыг илрүүлэгч, нийгмээ эдгээгч сэтгүүлчид ээ!
Б.Баяр
Амлалт.мн
