Номтыг улс төрд урья. Номтой улс төрд урья. Номт өөрөө ном үзэж яваагаа хэлсэн байна билээ. Номт ном үзэх хэрэгтэй. Шударга байсаны төлөө, шударга ганцаардсаны төлөө, шударга байгаад шооёонд суусаны төлөө, цаашид сууж болохгүйн төлөө, шударга бусууд төрд үүрлэснийг илүү оношилохыг мэдэхийн төлөө, шударга улс төрийг эхлүүлэхийн тулд номоо үзэх хэрэгтэй. Яриангүй зөв өө. Яагаад ингэж байна гэхээр, ийм юм аа.
Өнөөдөр манай төрийн ордонд хулгайчид сууж байна. Ихэрхлээр “бааж”, эрх дархаар “хялайж” байна. Ийм учраас ном уншсан Номт улс төрд ирмээр байна. Урьж байна. Номт хулгайн ихэрхэлгүй. Эрх дархын хялайлтгүйг сурсан байх. Өнөөдөр манай төрийн ордонд нэгнийхээ хулгайчийг хэлж чадахгүй байна. Бүгдээрээ хулгайч байгаа учраас.
Ийм учраас Номтыг улс төрд урьж байна. Номт бол шууд хэлдэг, шууд ярьдаг. Хулчийдаггүй, айдаггүй. Үнэнд дуртай. Өнөөдөр манай төрийн ордонд өлсгөлөн хүмүүс сууж байна. Концесс бол концесс, нүүрс бол нүүрс, Хөгжлийн банк бол Хөгжлийн банк, юу ч тааралдсан залгичихаад сууж байдаг өлсгөлөн гүлдиймэрүүд дүүрсэн байна. Ийм учраас Номтыг улс төрд урьж байна. Номт бол эрт цадсан, эцгийн буянд.
Хулгай хийж бус, эцэг эхийн, бас өөрийнхөө ч бүтээсэн уураг сүүлээр бойжиж,идэхийн хэнээ донг тусаагүй. Эрт цадсан, хүн ёсны ходоодтой. Ийм учраас цаддаггүй ходоодтой номгүй нөхдийг зайлуулахын тулд Номтыг урьж байна. Өнөөдөр манай төрийн ордонд зөвхөн дархан эрх нэрийн дор амиа нуугсад сууж байна. Дархан эрх үгүй бол дамжилагдаад явахад бэлэн хүмүүс бүгсэн байна. Тэднээс юу ч горьдох боломжгүй боллоо. Тэднээс горьдох зүйл бол тэднийг өөрсдийг нь явуулах, халах.
Ийм учраас Номтыг улс төрд урьж байна. Дархан эрхийн номтой хүмүүсээс, дээр номын эрдэмтэй хүмүүс Монголд хэрэгтэй байна. Тийм ном Номтод байгаа. Яагаад гэхээр тэр дархан эрхийн номыг тусгүй ном гэдгийг эрт мэдсэн. Дархан эрхийн номоос татгалзаад, дархан эрхтнүүдээр дарамтуулан шооёонд яллуулсан учраас дархан эрх хэрэггүйг ойлгочихсон. Дархан эрхийн номоос эрх чөлөөний ном, эдийн засгийн ном чухал аа гэдгийг дориун сайн ойлгосон.
Өнөөдөр манай төрийн ордонд үнэнд огт харъяалалгүй хүмүүс бөөгнөрсөн байна. Нүүрсний хулгайгаа шийдэлгүй он гарч байна. Дөчин их наядаар хулгайлсанаа илрүүлж чадахгүй байна. Дөчин их наядаар улс ямар их баялагтай ном-улсыг бүтээж болохыг Номт яримаар байна. Ийм учраас Номтыг номтой нь улс төрд урья. Өнөөдөр манай төрийн ордонд өр нинжин огт үгүй хүмүүс сууж байна. Ардын хүүхдүүд захын хорооллын сургуулиудаар дүүрэн зээглээд сууж байна.
Зутраад сууж байна. Ном үзэхэд хүнд сууж байна. Зайгүй, хүйтэн. Номт, Номтын аав өөрсдийнхөө хөрөнгөөр Сэлэнгэд сургууль барьж бэлэглэж байна лээ. Номоо үзэг ээ, хүүхдүүд гээд. Ном үзүүлэхийг ингэж бодьтой хийдэг байна. Номгүй гишүүдэд ийм юм алга. Өр Нинж алга. Зүгээр л идэхийн дондоо ногоорцгоож байна. Ийм учраас Номтыг улт төрд урья. Өнөөдөр манай төрийн ордонд эдийн засгийн төсөл босгоод, эрх орныг үүрсэн нэг ч УИХ, Засгийн гишүүн алга. Номыг нь мэддэггүй, ноольтсон нөхөд одоо бол болих хэрэгтэй.
Түргэн сандлаасаа бууж, салхинд явж сэвэр ээ, өөрсдийгөө, ном үзэцгээ. Ийм учраас Номтыг улс төрд урья. Эдийн засгийг, төслийг хэрхэн гүйцэлдүүлдгийг, төр барихыг улс төрд үлгэрлэхийг нь, номлохыг нь хармаар тул улс төрд урья.
Урвагчдыг, эх орноо цөмөгчдийг эгнэгт халуулж Номтыг урья.
Эх орныг өөд татах номтой улс төрчдийг дагуулан Их улс төрд ирэхийг Номтоос хүсье. Эх орноо өөд нь татаач ээ, ард түмнээ амар амьдруулаач ээ, Номт ба номтууд аа.
З.БАЯРАА
Амлалт.мн
