Хөгжлийн банктай холбоотой УИХ-ын гишүүдээс бүрдсэн Хянан шалгах түр хорооны нээлттэй сонсгол Төрийн ордонд болж байна. Олон ч баримттай, бас сонирхолтой мэдээллүүд тэнд яригдаж эхэлсэн. Ерөнхий сайд асан Н.Алтанхуягтай холбоотой Хөгжлийн банкны зээлтэй холбоотой асуулт хариултууд яригдсан нь сонирхол татаж байна. Түүнийг Ерөнхий сайд байхдаа гаргасан шийдвэр, захирамжтай нь холбогдуулан буруутгаж байгаа бололтой.
Н.Алтанхуягийг Ерөнхий сайдаар ажиллаж байхад Эдийн засгийн хөгжлийн сайдаар Фортуна Н.Батбаяр, Уул уурхайн сайдаар Д.Ганхуяг нар ажиллаж байсан. Тэд тухайн цаг үедаа барилгын салбарыг хөгжүүлэхийн тулд түүхий эд материалын үйлдвэрийг байгуулах зорилгоор Хөгжлийн банкнаас зээл гаргах шийдвэрийг боловсруулж, Засгийн газрын хуралдаанд оруулж, зарчмын дагуу танхмын олонхиороо шийдвэр гаргаж, түүнийг нь Ерөнхий сайд Н.Алтанхуяг баталгаажуулсан аж.
Товчхондоо Засгийн газрын хуралд сайдууд асуудлаа оруулдаг, бүх яамдаас санал авдаг, олхиороо шийддэг. Гэтэл эл сонсгол дээр Архангайн угшилтай, МҮДН-ээс гарвалтай Фортуна Н.Батбаяр, Бридж Д.Ганхуяг нар ирж оролцсонгүй.
Тэдний хийсэн ажлын нэрийн өмнөөс Н.Алтанхуяг сонсгол дээр асуултаар булуулж, буруутан мэт нүүрээ улалзуулж байгаа нь Фортуна Н.Батбаяр, Бриж Д.Ганхуяг нарын хүн чанаргүйг илтгэж байна. Төрийн бодлого залгамж чанартай байх ёстой. Зээл олгох эрх өгсөн хамтын шийдвэрийг гаргасан Засгийн газрыг буруутгах юм бол өнөөдөр хамтын шийдвэр гаргаж байгаа Л.Оюун-Эрдэнийн Засгийн газрын шийдвэр дараагийн удаад буруудах нөхцөл бүрдэнэ гэсэн үг. Шийдвэр гаргасан, зээлийн эрх нээсэн.
Харин хөгжлийн банкнаас энэ эрхийн дагуу зээл авсан Бэрэн группийн захирал Б.Мөнхтөр Хөгжлийн банкнаас авсан зээлийнхээ тодорхой хувийг Архангайн Т.Бадамжунай нарын улс төрчидөд гарган өгсөн, бас казинод тоглож үрсэн нь үнэн бололтой.
Тиймээс Хөгжлийн банктай холбоотой УИХ-ын гишүүдээс бүрдсэн Хянан шалгах түр хорооны нээлттэй сонсгол нэгэн цагт төрийн гаргасан шийдвэрийг буруутгахаасаа илүүтэй шаардлага хангасан ААН-д зээл олгосон эсэх, мөн улс төрчдийн нөлөөнд автаж зээл олгогдсон эсэх, авсан зээлээ зориулалтын дагуу зарцуулсан эсэх, зээлээ эргэн төлөлгүй төрд хохирол учруулсан эсэх зэрэг асуудал дээр илүү анхаарч, эдгээр асуудалд Хөгжлийн банкны ТУЗ, удирдлагууд хэрхэн хандаж, яаж шийдсэнийг тогтоох ёстой.
Дээр нь аж ахуйн нэгжүүдийг “яллахтай” зэрэгцүүлэн Хөгжлийн банкнаас зээл авсан УИХ-ын нэр бүхий гишүүдийн хамаарал бүхий этгээдүүдтэй холбоотой асуудлыг дээрх сонсголоор оруулан тухайн гишүүдийг байлцуулан тэднээс улалзтал асуух нь шударга ёсонд нийцнэ.
Ц.Мөнх
Амлалт.мн
