Социализмын хуучин цагт төрийн өндөр албан тушаалтнуудыг “нам төрийн удирдагч” хэмээн нэрлэн, тахин шүтдэг байсан.
Тэгвэл ардчилсан Монгол улс байгуулагдаад 32 жил болсон энэ цаг үед шинэ цагийн “нам төрийн удирдагч” гэмээр албан тушаалтан гэнэтхэн “төрөв”.
Ингэж хэлэхийн учир нь эрх баригч МАН-ын гал тогтоог барьж байсан, нам дотроо нэр нөлөөтэй хүмүүсийн нэг болох МАН-ын Ерөнхий нарийн бичгийн дарга Д.Амарбаясгалан гэдэг хүн намын дүрмэндээ заасан давхар ажил хийж болохгүй тухай заалтыг зөрчин Монгол Улсын Засгийн газрын хэрэг эрхлэх газрын даргаар ажиллаж, засаг төрийн гал тогоог давхар барьж байна.
Түүний эл үйлдэл нь нэг талаас МАН-ын дүрмийн “29.2-т заасан МАН-ын Ерөнхий нарийн бичгийн дарга орон тооны байх бөгөөд өөр ажил, албан тушаал эрхлэхийг хориглоно” гэсэн заалтыг зөрчиж байгаа бөгөөд өнгөрөгч 2022 оны 8 сараас хойш өнөөдрийг хүртэл ЗГХЭГ-ын даргаар ажиллаж байна.
Нөгөө талаас ЗГХЭГ-ын дарга Д.Амарбаясгалан гэдэг хүн МАН-ын ЕНБД-аар давхар ажиллаж байгаа нь мөн Монгол төрийн хуулийг зөрчиж байна.
Тухайлбал, Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн 18 дугаар зүйлд Нийтийн албан тушаалтан давхар ажил эрхлэж болох зөвшөөрөгдсөн ажил чиглэлийг дурьдсан бөгөөд үүнд Засгийн газрын гишүүн, ЗГХЭГ-ын даргын албан тушаалтан нь намын Ерөнхий нарийн бичгийн даргаар давхар ажиллахыг хуулиар зөвшөөрөөгүй байна.
Тиймээс ЗГХЭГ-ын дарга Д.Амарбаясгалан нэг бол МАН-ын Ерөнхий нарийн бичгийн даргаараа ажиллаж, ЗГХЭГ-ын даргаас чөлөөлөгдөх, нөгөө бол ЗГХЭГ-ын даргаараа ажиллаж, МАН-ын ЕНБД-ын үүрэгт ажлаас чөлөөлөгдөх ёстой болж байна. Ингэж хэмээнэ энэ хүнтэй холбоотой МАН-ын дүрмийн болон төрийн хуулийн зөрчил арилах юм.
Эл зөрчлийг арилгалгүйгээр эрх баригч МАН-ын гал тогоог болон Засгийн газрын гал тогоог нэг хүн үргэлжлүүлэн барих нь нийтлэлийн эхэнд дурьдсан НАМ ТӨРИЙН УДИРДАГЧ хэмээх “хязгааргүй” эрх мэдэлтэй албан тушаалтныг энэ цагт шинээр “төрүүлэх” магадлалтай гэж хэлж болохоор байгаа юм.
А.Галт
Amlalt.mn
