"Олон нийтийн сүлжээнд хүний эрхийг хамгаалах хууль"-ийг Н.Учрал гишүүн өргөн барьж, чуулган хаах өдөр баталсан байдаг. Эл хуулийг Үндсэн хуульд заасан хүний эрх, эрх чөлөөг зөрчиж байна хэмээн иргэд, иргэний нийгмийн байгууллагууд эсэргүүцсэн бөгөөд Ерөнхийлөгч бүрэн эрхийнхээ хүрээнд бүхэлд нь хориг тавьсан юм.
Тухайн хуулийг батлахад 52 гишүүн байсан бөгөөд МАН-ын 40 нь дэмжсэн кноп дарсан.
Одоо хувиар ёсоор хаврын чуулган гуравдугаар сарын 15-нд эхэлнэ. Үүнээс хойших ажлын 15 хоногт УИХ-аар Ерөнхийлөгчийн хоригийг хэлэлцэх юм. Энэ үеэр тус хуулийг дэмжсэн кноп дарсан гишүүдийн хэд нь Ерөнхийлөгчийн хоригийг хүлээж авах нь сонин. Зарим нь дэмжиж баталчхаад, Ерөнхийлөгчийн хоригийг дэмжих магадлалтай.
Тэгвэл өнөөдөр ХЗДХ-ийн сайд Х.Нямбаатар Ерөнхийлөгчийн хоригийг дэмжихгүй гэдгээ илэрхийллээ.
Тэрбээр "Энэ бол Н.Учралын гэхээс илүү Засгийн газрын өргөн барьсан төсөл. УИХ-ын чуулганы хуралдаан дээр би энэ хуулийг дэмжиж кноп дарсан. Би бол Ерөнхийлөгчийн хоригийг хүлээж авахгүй байр сууринаас кноп дарна гэж бодож байгаа" хэмээв.
