-Эс чадах нь иргэдийнхээ дунд орон чадахаа хийж, сонгох эрхээ эдлэн, нийтийн баялагийг бүтээлцэх учиртай-
Т.Аюурсайхан одоо Ж.Мөнхбатын араас чөлөөлөгдөх өргөдлөө өгөөд, уучлал эрээд, шалгуулах л ажилдаа орох хэрэгтэй Шударга тав гэж улс төрд мандсан. Одоо шударга хоёр нь шударга бусуудтайгаа тэмцэж байгаа.
Төмөрбаатарын Аюурсайхан Монголын улс төрд шударга имиж бүрдүүлэн орж ирээд, шударга бусын илэрхийлэл болж байгаагаараа тод дүр юм. Шударга хоёр нь бусадтайгаа тэмцэж байна гэж зүгээр ч хэлсэнгүй. Ус тосоороо ялгарч байна.
Шударгын нөмөргө дор шударга бус байсан нь Т.Аюурсайханы үйлдлээр нотлогдлоо, нүүрсний хэргээр найз нөхөд нь, эргэн тойрны нь туслах зөвлөхүүд бүгд хоригдсоноор, өөрөө яллагдаж эхэлснээр бүх зүйл нь нотолгоожиж байгаа болтой. Монголын нийгэм ойлголоо.
Парламентын дэд дарга, Хөдөлмөрийн сайд, УИХ-д хоёр удаа сонгосон гээд Монголын ард түмэн, төр, Чингэлтэйчүүд түүнийг хэрхэн өндөрт залав даа. Хариу нь нүүрсний хэрэг. Нөхдийн нь хэрэг. Туслах нь явсан атлаа Н.Багабанди руу, С.Баяр руу юу юу хэлж явлаа. Ямар жудгийг Т.Аюурсайхан гэж хүн харуулав аа. Улс төрд явсан эдүгээн хэдэн жилийн түүхээрээ.
Энэ хүн өнөөдөр шударга дүртэй шударга бус хүмүүсийн тод дүр болж нийгэмд “сайн” илэрц харагдууллаа. Энэ агуулгаараа эх орон, сонгогчдод тустай юм. Т.Аюурсайхан шударга үзэл санаатай байсныг үгүйсгэхгүй. Гэхдээ шунал нь энэ бүхнийгээ үгүйсгэж, эх орон, ард түмнээ хуурлаа. Энэ хүн яг энэ л утгаараа Монголын улс төрийн ариун байх он цагийг хороолоо. Ийм буруу зохисгүйн дээд үлгэрийг үзүүллээ. Шударга гэдэг дүр түүний улс төрийн овог байсан.
Харин энэ жилүүдэд Т.Аюурсайхан ийм зүйтэй хуулийг санаачлан батлуулж, ийм дэвшлийг бүтээв гэдгээр онцлон овоглогдсонгүй. Буруу ч бай, зөв ч бай хүнд овоглогдох үнэ цэн байдаг. Гадаадын хөрөнгө оруулалтын хэм хэмжээг зохицуулах хууль гээд л, жишээлбэл Н.Батбаяр болон намын чинь ах нарын хууль гээд ус тосоороо ялгараад, үйлдэл дагалдахуунаараа үлдчихдэг жамтай юм л даа.
Улс оронд хөрөнгө оруулалт зогсохын нэг цондон тэр хууль байсан. Г.Занданшатар сайн мэднэ. Ингээд овог үлддэг. Т.Аюурсайхан харин Монголын ард түмний шударга үнэнд оруулж байгаа хөрөнгө оруулалт гэж бодон, өөрийг нь сонгосон хөрөнгө оруулалтыг үрэн таран хийлээ.
Т.Аюурсайхан одоо Ж.Мөнхбатын араас чөлөөлөгдөх өргөдлөө өгөөд, уучлал эрээд, шалгуулах л ажилдаа орох хэрэгтэй. Юун сайд, юун гишүүн. Тийн чөлөөлөгдөж өргөдлөө өгөн “суллагдсанаараа” гэмээ үүрээд, нийтийн баялагийг бүтээлц. УИХ-ын гишүүн байж эс тэнцэв, өөрөө. Бүр огт зохисгүй байлаа.
З.БАЯРАА
Амлалт.мн
