Улсын Их Хурлын гишүүн Ж.Мөнхбат зөв үйлдэл хийлээ. Хоёр үндэслэлээр УИХ-ын гишүүнээс бүрэн чөлөөлөгдөх үндэслэл дурджээ. Хүсэлт өргөдөлдөө. Одоо манай улс төрд байгаа алив гэмт хэрэгт нэр холбогдсон хэн боловч Ж.Мөнхбат шиг өргөдөл хүсэлтээ бичээд шууд чөлөөлөгддөг болох хэрэгтэй.

Дэлхийн улс төрд энэ нэгэнт төлөвшин бий болсон, тогтсон соёл. Төсвийн мөнгөөр шоколад аваад огцордог дэлхийн улс төрийн соёл хүн төрөлхтөнд үйлчилж байна. Гэтэл манай улс төрийнхөн уулыг мөргөцөгөөр нь, улсын хөрөнгийг дөчин их наядаар нь идчихээд сэнтийдээ шигдээд суугаад л байна. Ингэж болохгүй. Хүн төрөлхтнөөс зөрж болохгүй.

Ж.Мөнхбатын чөлөөлөгдөх эхний үндэслэл тээр жилийн У.Хүрэлсүхийнхтэй адил. Ээжийгээ асарч эмчлүүлнэ гэж. У.Хүрэлсүх эхнэрээ гэж байсан. Зүйтэй ээ. Эцсийн дүндээ хүнд эцэг эх, гэр бүлээс үнэтэй нь үгүй. Ж.Мөнхбатын чөлөөлөгдөх хоёрдугаар үндэслэл олон бусармаг хэрэгт холбогдсонтой холбоотой.

Нүүрс, концесс, казино зэрэг олон асуудалд холбогдон, эдүгээ яллагдагчаар татагдсан тул огцорч, үнэ мөнөө олъё гэжээ. Ж.Мөнхбатын энэ үндэслэл туйлын зөв. Бас буруу. Зөв нь ийм асуудалд орсон олон гишүүн түүн шиг хүсэлтээ өгч чөлөөлөгдөх ариун үйлсийн замыг нээж байгаагаараа зөв. Учир нь төр ариун байх хэрэгтэй. Ариун төрд хэрэгтэн, хиртэй нэртэнүүд байх учиргүй.

Буруу нь нэгэнт Архангайн ард түмнээс мандат аван төрийн эрх барих дээд байгууллагад орж ирсэн атлаа ийн замын дундаас нь орхиж байгаагаараа буруу юм. Ард түмэн үүгээр хохирч байна. Ер нь Архангайн гурван гишүүн гурвуулаа ийм замд орсоноороо нутгийн олныхоо итгэлийг хөсөрдүүлж байна. Ё.Баатарбилэг мөн яллагдагчаар татагдсан.

Г.Тэмүүлэн нь эцгийнхээ төрөөс зувчуулсан хөрөнгөөр төрд орсон логиктой явж байгаа. Ёс суртахууны эрхгүй байгаа. Үеийн нь залуу Н.Номтойбаяр үлгэр үзүүлээд эдүгээ нийтийн баялаг бүтээж явна. Хэрэг хийгээгүй ч хэлмэгдсэн л дээ тэр. Залуус, идэр эрс ухаантай байх хэрэгтэй л дээ. Ж.Мөнхбат нэг зүйлийг дутуу хийсэн, тэр нь ард түмнээс, Монголын төрөөс уучлал гуйгаагүй. Одоо түүнийгээ хийх хэрэгтэй.

Тэр нь бусармаг асуудалд нэр холбогдон ийнхүү чөлөөлөгдөхөөр хүсэлт илэрхийлж байгаагаараа Төрөө эзэнгүйдүүлж, сонгосон зоныхоо итгэлийг хөсөрдүүллээ, уучлаарай гэж хэлэх юм. УИХ-ын танхимд тангараг өргөсөн шигээ л уучлал гуйх хэрэгтэй. Ингэж гэмээнэ төр цэвэршинэ.

Их хурлын танхим ариусна. Ж.Мөнхбатын энэ замаар, ёс зүй, нэр төрөө аварч мэхийх олон гишүүн парламентад байна. Бүгд, тэд ийн “ариусацгаа”! Аюур, “Ажнай”, Ананд гээд бүгдээрээ.

З.БАЯРАА

Амлалт.мн