Засгийн газраас нийт 5.5 сая үхрийг 13 тэрбум төгрөгөөр ээмэгжүүлэхээр шийдвэрлэснийг ХХААХҮ-ийн сайд Х.Болорчулуун мэдээлсэн.
Уг ажлыг иргэд нийгмийн сүлжээнд эсэргүүцэж байгаа юм: Тухайлбал, үхрийг ээмэгжүүлэх нь зөв ч хүний хувийн өмч болох үхрийг төсвийн мөнгөөр ээмэгжүүлэх нь буруу гэж үзэж байна. Хоёрт, үхэр ээмэгжүүлэх ажил нь нийгэм, эдийн засгийн тулгамдсан асуудал биш гэж үзэж эсэргүүцэж байгаа юм.
Тэгвэл БХБ-ын сайд Ц.Даваасүрэн Х.Болорчулуун сайдыг өмөөрчээ.
Тэрээр "Малаа ээмэгжүүлэхийг шүүмжилж байгаа хүмүүс бол Монголын махыг экспортонд гаргахгүй гэсэн гадныхны явуулга байх өө. Ер нь үхэр, адууг дугаар код, QR-аар бүртгэж хэний үхрийн мах болох, дараа нь хэн хариуцлага хүлээхийг бичиж өгөхгүйгээр махыг нь экспортолж болдоггүй журам дэлхийд үйлчилдэг. Мах экспортонд гарвал манай ЭЗ, валютын нөөц нэмэгдэнэ, малчдын орлого нэмэгдэж, хот руу төвлөрөхгүй байх ач холбогдолтой. Зарим нь улс орныхоо хөгжлийн төлөө сэтгэл гаргасан хүн бүрийг хорлодог, харийнхны гар хөлд үйлчилдэг юм биш үү" гэсэн байна.
АМЛАЛТ.МН
