“Хэзээ ч” гэдэг үгийг хэзээ ч бүү хэл гэж үг байдаг. Энэ бол алив юм хэзээд болзошгүй гэдэг агуулгаар хэрэглэгдэж буй гэж ойлгогдох. Гэвч Ерөнхий сайд хэлж байна. Лувсаннамсрайн Оюун-Эрдэнэ авлигатай хийх тэмцлээсээ хэзээ ч ухрахгүй гэж хэллээ.
Бас авлига, хулгайг л цэгцэлчихвэл манай улс нэн даруйдаа, энэ жилдээ нэг хүнд ноогдох дотоодын нийт бүтээгдэхүүн таван мянган долларт хүрнээ гэж итгэл төгс хэллээ. Үүн шиг сайн мэдээ гэж юу байх билээ.
Цагаан сарын шинийн гурван өдөрт ард түмэн буузныхаа даруулга болгож энэ л үгийг хэлэлцсэн гэхэд огтын хилсгүй. Нэг шавилхан хөвүүний гэрээс арван хэдэн тэрбумаараа авлигын мөнгө гоожиж, ард түмний Таван толгойг хэдэн хулгайч дөчин их наядаар нь завшчихаад байгааг хамжааргалчихвал нээрээ ч ингэнэ шүү дээ л гэлцэх.
Авлигатай тэмцэх таван бодлогоо тодорхой хэлсэн дээ, Ерөнхий сайд. Ерөнхий сайд ирэх сарын дундуур Оюу толгойн далд уурхай нээгдэхийг дуулгалаа. Онц сайн мэдээ. Дагаад улсын эдийн засаг үлэмж бодьтой тэлэхийг мэдээллээ. Ардын намд ашиггүй ч сонгуулийн холимог тогтолцоог бүрдүүлнэ гэлээ.
Тэгэхээр үл барам жагсаалтаар нэр дэвших, тойрогт нэр дэвших эрхийн хувийг тавь тавин хувь байлгана аа гээд амлачихлаа. Эрх баригч намын дарга ингэж тодорхой хэлэв. Нийт сонгогчийн дөчин хувийн саналыг аваад зуун хувь засаглаж байгааг ч хэлэв. Тогтолцооны өөрчлөлтийн зорилтыг тодорхой ингэж оношилж байна. Үндсэн хуулийг өөрчлөх эрх гагцхүү ард түмэн, улс төрийн намуудад байгааг дуулгав.
Тоогоо олшруулж, сонгогчдын төлөөллийг тэгш болгох боломж бүрэн нээлттэйг ч хэлэв. Үндсэн хуулийн өөрчлөхдөө, шинэчлэн найруулах, огт өөрчлөхгүй байх гээд аль аль агуулгад өөрийн хувьд нээлттэй байгаагаа хэллээ. Мөн нүүрс, зэс, бусад баялагийг эзэмших замаар Засгийн газрын хувь заяаг атгадаг бүлэглэлүүдийн эсрэг хатуу тэмцэнэ гэдгээ хэллээ.
Тэдний тоглоомын дүрмийг өөрчилж, Монголын төрийн тогтвортой байдлын төлөөх дүрмийг тогтнуулна гэдгээ хэллээ. Монголын ард түмний дотор төрөөс хамгийн өндөр цалин авч байгаа шүүгчдийн шударга ёс сахиулах зарчмыг үргэлж нэхэхийг зарлалаа.
Нийгмийн шударга ёс тогтож, нийтийн баялаг ард түмний тэгш өмч болоход шүүх засаглалын утга учир ямар чухал болохыг нот хэллээ. Монголын хууль хяналтын байгууллагын удирдлагыг сонгуулийн дараа хэдэн банкны эзэд хуваан томилдогийг ч болиулах болно гэдгийг хатуу сануулсан.
Банкуудыг банкаараа ажилла аа гэж өндөр донгодсон. Энэ маш чухал. Монголын банкууд өнөөдөр зээлийн хүү өндөр, шулаачид. Тийм атлаа нэг ч хөгжлийн төсөл санхүүжүүлдэггүй. Эзэд нь өнөөдөр төмөр зам барьж байна, хонины толгой хуйхалж шарж зарж байна, газрын ховор элементийг ч эзэмшиж байна. Эх зах байхгүй. Банкныхаа хуулинд үл захирагдах. Бүх бизнесийн санааг зээлжигчийн мэдээллээс “тонодог” гэх. Бизнесийн соёлын наад захын зарчим байхгүй. Тэгсэн атлаа хуулийнханыг худалдаж авна, төрд томилгоо хийнэ, сонгууль санхүүжүүлнэ.
Монголын банкны эзэд үнэхээр даварсан. Гадны банкуудыг эрс хориглон, хууль тогтоогчдод лоббидон огт оруулж ирдэггүй. Энэ энэ завхарсан агуулгыг нь Ерөнхий сайд банк банкаараа л ажилла, бусдын жижиг бизнесийг булаахыг тэвчихгүй гэж зарлалаа.
Энэ бол бизнес эрхлэгчид, ядарсан ард түмэнд онцгой чухал мэдээлэл байлаа. Хорхойг нь гозолзуулсан хандлага байлаа. Хувийн өмчид халдахгүйгээр хулгайн өмчийг эргэн төлүүлнэ гэлээ. Эрдэнэс таван толгойг тоногчид дээр үлгэрлэн ийнхүү хэлж байна лээ. Намын эрх ашгаас төрийн эрх ашиг ашид том байх болно гэдгийг хэлсэн. Юутай үнэн.
Намын авлигачдыг хэнбугай байсан ч цээрлэл хүлээх ёстойг хэлсэн. Намыг цэвэрлэнэ гэдгээ хэлж байгаа юм. Үнэнийг хэлж, булхайг нээсэн хүн ганцаарддаг. Нийгмийн бохир ингэж хорлодог. Ерөнхий сайд ард түмнээс илүү хүч байхгүй гэж хэлсэн. Үнэн. Нам, улсын бохир булайтай тэмцэж байгаа Ерөнхий сайдад өнөөдөр ард түмнээс тулах хүч, хэвлэл мэдээллийн ил тод байдал, илчлэн мэдээлэх юу юунаас онцгой чухлыг Л.Оюун-Эрдэнэ машид тод томруунаар хэлсэн. Энэ үнэн.
Ард түмэн, хэвлэл мэдээллийнхээн, Ерөнхий сайдаа тул, түш. Хамтран ажилла. Нийгмээ цэвэрлэ,улс шиг улс болцгооё л доо. Улсын Ерөнхийлөгч, УИХ-ын дарга мэдээж дэмжих буй за.
Ерөнхий сайд эдүгээн Ерөнхийлөгчийн шударга ёсны үйл хэргийг залгамжлан ажиллаж байгаагаа хэлж байна лээ, Г.Занданшатар дарга ч эл үйл хэрэгт анхнаасаа мөн л зүтгэсэн тул эдүгээ ийнхүү Төрийн эрх барих дээд байгууллагын даргаар хоёр дахиа ажиллаж буй биз.
Эрх чөлөө, шударга ёсны нар илүү гэрэлтсэн он байг, энэ үзэсгэлэн болгогч туулай жил.
З.БАЯРАА
Амлалт.мн
