Нүүрсний дөчин их наядын хулгай, Тээвэр ложистикийн завхрал, Хөгжлийн банкны асуудлыг ярьж, их улс төр уугиж байх хооронд орон нутаг засаглалын зудад нэрвэгдээд удаж буй нь үнэн. Ховдын Засаг ноён Б. Дүгэржав гээд байсан. Б. Дүгэржав одоо Ерөнхий сайдын зөвлөх З.Мэндсайханы зөвлөх аятай л давхиж яваа харагдах. Э.Болормаа гэдэг хүүхэн оронд нь заларсан.

Боломжийн Засаг гэж нэг хэсэг нь ярих, аа мэдэхгүй гэж бас нэгэн хэсэг нь мэтгэх. Юутай ч энэ залуу эмэгтэй аймгийн хууль хүчний дарга нараа сэлгээд л байгаа юм билээ. Халзан Бүрэгтэй гэж хачин гоё ордын асуудал энэ Засаг даргад ихээхэн олон ужиг асуудлыг араасаа дагуулахаар харагдаж байгаа. Олон нийтийн санаа, нийгмийн хэв соёл, хэвлэл мэдээлэл гээд олон асуудал түүнийг хүлээж байна. Эрдэнэбүрэнгийн станц яг хэрхэх гээд байгаа тухай энэ дарга ярихгүй юм. Энэ улсын хөгжлийн түүчээ нь эрчим хүч. Энхбатын Болормаа дарга үүн дээр санаа чилээж суугаа биз.

Эрдэнэбүрэнг барих их цементийн үйлдвэр ч яахав баригдчихлаа. Хөгжлийн банкны, эрх мэдэлтэй хүмүүсийн буянд. Одоо Эрдэнэбүрэнээ л хөдөлгөх хэрэгтэй дээ, Э.Болормаа дарга. Чойжоо сайдтайгаа элбээд, Ерөнхий сайддаа түшиглээд. С.Бямбацогт сайдаа бараадаад.

Гэтэл Завхан аймаг гэж завхарсан газар байна. Аймгийн даргыг нь сольё гэж дөрвөнтөө асуудлыг тавьжээ. Иргэдийн хуралд нь Ардын болоод Ардчилсан намынхан тэнцүү шахуу сонгогдсон.

Д.Түвшинжаргал гэж Засаг дарга одоо больчих хэрэгтэй юм даа. Ингэж онигоо болж байхаар. Өөрийг нь ажлаа хийж чадахгүй байгааг нототгож огцруулах асуудлыг өргөн барьсан нөхдийг л ноцож суудаг хүн болсон байна, Түвшинжаргалтан. Идэрийн Мөнххүрэлийг зөв асуудал тавьж, зарчим ярьсаны төлөө сумын Засаг даргын нь ажлыг авна гэж дайрч байгаа гэнэ.

Мөнххүрэлийг өөрийн нь асуудлыг тавьж, орон нутгаа өөд нь татна гэсний нь төлөө харин ч талархаад тамгаа өгөх хэрэгтэй. Мөн асуудлыг нь тавьсан өөр хоёр төлөөлөгчийн нэгийг нь сургуулийн захирлаас халж, нөгөө нэгийн эхнэрийг төрийн албаны ажлаас мөн халуулж байгаа аж. Мөн жаахан эр ээ. Өчүүхэн. Ар халхын оюун санааны талбар болсон Завхан аймагт иймэрхүү засаглалын завхрал гаараад , ард түмэн залхаж, аймаг орон гудайгаад уджээ. Б.Баярсайхан гишүүн болбоос Д. Түвшинжаргалыг ажил хийдэггүй, олхиогүй гэж шүүмжилж халаад Г.Төмөрбаатар гэгчийг дэмжиж Засаг дарга болгох сонирхолтой гэх. Ц.Цэрэнпунцаг нь өөр намынхантай сүлбэлдээд одоо байгаа Засгийг хаацайлдаг, анхнаасаа дэмжсэн гэх. Завхан аймаг өрсөлдөх чадвараар сүүл мушгиад энэ нь дархлаажлаа.

Б.Баярсайхан, Ц.Цэрэнпунцаг, Д.Түвшинжаргал нар ингэж аймгаа сульдааж, эцэнхий болгоод, одоо “нугаслах” дутуу үлджээ. Ерөнхий сайд аливаа завхрал бүхнийг засах гээд зүтгэж байгаа харагддаг.

Албатууд нь харин иймэрхүү л байх шиг байна. Аймгуудын дарга нараас бэлээхэн үлгэр авах хүмүүс байна шүү дээ. Дарханы Б.Азжаргал ямар мэдрэмжтэй, авьяаслагаар аймгаа удирдаж байна. Харах хэрэгтэй. Ковидын үед ажилласан түүний эргэх холбоо, хариуцлага, хурд, мэдрэмж ямар атаархмаар байв.

Нийгмийн асуудлуудыг ямар цартай харж зохицуулж байгаагаас Д.Түвшинжаргал шиг улс суралцах нь хэтдээ хэрэг болно.

Говь-Алтайн Засаг даргаар хоёр дахиа ажиллаж байгаа О.Амгаланбаатарыг хар л даа. Ямар хурдтай мэдрэмжтэй байна.

Халуун зунаар Сэлэнгэд ирж харилцаа холбоог албажуулаад, хадлан аваад аймгаараа тараачихаж байна. Өвөлдөө зутрахааргүй орж байна. Хүмүүсийг ажиллуулж чадаж байна. Сумдаасаа хүмүүсийг ажиллуулаад, хот оронд байгаа Алтайчууддаа унаган нутгийн нь махыг дөхүүлээд өгч байна. Ямар аятай зохион байгуулалт, менежермен бэ. Залуусыг зуны цагт цуглуулж нийгмийн ахуй амьжиргаа, түүнд гаргах ахиц дэвшлийг яриулаад, хэлэлцүүлээд, эв зөвийн гарцыг авьяастайхан олж байна шүү дээ.

“Жангар”-ыг сая аймагтаа хайлууллаа. Өв соёл, түүний үнэт зүйлээр бэхлэж байна. Том ухаан даа. “Жангар” бол монголчуудын оюуны их өв, ханагар оршихын баталгаа. Энд хамаг бүхэн бий. Цараатай харж байна, О.Амгаланбаатар.

Ингээд ажиллаж чадаж байгаа дарга нар байна.Ажиллахгүй байгаа нь мөн их байна. Ерөнхий сайд тэдний хэнийг нь хэн вэ гэдгийг харж, дараа дараагийн арга хэмжээг авч хэрэгжүүлнэ биз ээ.

З.БАЯРАА

АМЛАЛТ.МН