“Лам олдохгүй бол буцахдаа зална” гэгчийн үлгэрээр ХНХ-ын сайдаар Н.Энхболдыг томилохоор болж УИХ-ын чуулганаар хэлэлцэж байна.
Н.Энхболд 2000 оноос хойш тасралтгүй 23 жил парламентад суусан, УИХ-ын Төрийн байгуулалтын байнгын хорооны дарга, УИХ-ын Дэд дарга, УИХ дах МАН-ын бүлгийн дарга, Гадаад хэргийн сайд, Монгол Улсын сайд бөгөөд ЗГХЭГ-ын дарга, Батлан хамгаалахын сайд зэрэг нам төрийн томоохон ажлыг эрхэлж, сайд даргын албан тушаалд олон жил хашсан түүнийг өдгөө ХНХ-ийн сайдаар томилж байгаа аж.
Түүнд албан тушаал багадаагүй л байлтай. Тэр хэд хэдэн салбарт сайдаар ажилласан ч тухайн салбарын ажил нүдэнд харагдаж, гарт баригдахаар хөгжөөгүй. Ерөөс нь хүн нь бөөрөнхий, аядуу, аргацаасан, аминчхан араншинтай.
Гэвч тэр дахин сайд болохоор “зүтгэж” байгааг харахад харамсам. Түүний оронд Б.Саранчимэг, Б.Баярсайхан нарын эрч хүчтэй эмэгтэй гишүүдээс сонгон сайд болгож, энэ салбарт олон жил дарагдсан, шийдлээ хүлээж байгаа асуудлыг шийдвэрлүүлээд явсан бол илүү зөв байх байсан болов уу.
Ямартай ч Нямаагийн Энхболдыг ХНХ-ын сайдаар томилуулахаар болсныг харахад нэг талаас МАН боловсон хүчний хомсдолд ороо юу гэмээр, нөгөө талаас улс төрийн тохироо, толхион Ерөнхий сайдын ийм сонголт гаргахаас өөр аргагүй байдалд хүргэж байна уу гэж харахад хүргэж байна.
А.Галт
Amlalt.мн
