Архангайчууд сүүлийн өдрүүдэд нэг зүйлийг маш их ярилцаж, таагүй байгаа юм байна. Энэ бол Хууль зүйн сайд Х.Нямбаатарын тус аймгаас сонгогдсон гишүүн Ганзоригийн Тэмүүлэнг Боловсролын зээлийн сангаас гаргуулсан мөнгөө эдүгээ хүртэл төлөөгүйг хэлсэнээс үүдэлтэй юм байна.
Хууль зүйн сайдад худлаа ярих үндэс алга. Архангайн ард түмэн ч гомдож, гонсойх нь зүйн хэрэг бололтой. Хоёр зуун мянга хол давсан дүнтэй ногоон мөнгө гэдэг чинь..., юу хэлэх вэ дээ, асар их мөнгө шүү дээ. Тэрбум шахуу.
Ганзоргийн Тэмүүлэн энэ олон жил төрийн өндөр албан тушаал хашиж, Ардын намдаа эрхлэхдээ энийгээ төлөөгүй ажээ. Ардын намыг гайхаж барахгүй. Хамгийн хогийн, шимэгч, нийтийн боломжийг хулгайлагчдыг л дэвшүүлээд, залаад байна. Ард түмнээ л баасамжлан дээрэлхэж байгаагийн илэрхийлэл байх даа. Эрхэм гишүүн Г. Тэмүүлэн гэдэг хүний төрсөн эцэг Ч.Ганзориг олон удаа сайд хийсэн. Ийст гэдэг төвөөс эхлээд шидээвэр хөрөнгө болгоны эзэмшилд оролцоо, хамаарал ямар нэг байсныг сонины хуудсууд илэрхийлнэ.
Эрдэнэт үйлдвэрийн захирал хийж, хурдан адуугаар өөрийгөө их чимсэн. Энэ албыг хашсаны үр нь арвын арван жил Эрдэнэт үйлдвэр “Стандарт” хэмээх Африкийн банкинд ээрэгдэж, улсын эдийн засгаар өрөө төлсөн. Ш.Батхүү гэдэг холионы эзэн Ч.Ганзориг нар ийм байдлыг бий болгосон. Саяхан л шүүх хурал нь болж, Ш.Батхүү олон жил хоригдохоор, Ч. Ганзориг торгуулаад салж байгаа юм.
Тэмүүлэнгийн эцэг ийм балагтай хүн. Гэтэл бас, Г.Тэмүүлэн ЖДҮ-гийн хэрэг гэгч дуулиантаж байхад, ээждээ мөн л долоон зуу гаруй сая төгрөг авч өгсөн нь тодорхой болсон.
Ч.Ганзоригийн олсон зөөсөн хоёр энэ айлд хүрэлцдэггүй байсан юм болов уу. Эдүгээ хүү нь сурсан төлбөрөө улсад төлөөгүйг Хишгээгийн Нямбаатар хэлж байна. Энэ ямар ёс зүй, нэр төр, ямар үлгэрлэл вэ. Ямартаа л өнөөдөр Архангайчууд Жамьянгийн Мөнхбатаас өмнө энэ хүн чинь явах ёстой юм байна шүү дээ гэж хэлэлцэж суух вэ дээ. Бүр Ё.Баатарбилэгээс ч өмнө гээд шүү.
Г.Тэмүүлэн Ардын намаасаа албан тушаалын шүр сувдыг түүжээ. Ашигт малтмалын газар, Эрдэнэс Монголын дэд, Уул уурхайн дэд сайд, Оюу толгойн Удирдах зөвлөлийн гишүүн, намын Удирдах зөвлөл, залуучуудын байгууллагын удирдлага гээд баахан исгэл алба, УИХ-ын гишүүн хоёронтоо, одоо Төсвийн байнгын хороон дарга. Зүгээр л мяндагтан. Ардын нам яагаад ийм сонин үлгэртэй, ийм хачин замтай хүнийг ингэж дэвшүүлэн байдаг байна аа.
Яг эндээс харахад Ардын нам “ардын” нам биш нь тодорхой харагдах. Төсвийн байнгын хороон дарга болгож, төр улсаасаа гэр бүлээрээ шамшигдуулал хийсний төлөө ингэж дээш залдаг болж таарах нь уу? Ардын намынхаан, Д.Амарбаясгалан генсек ээ, Ардын намын Г.Тэмүүлэнг дэвшүүлэн залсан дарга нар аа, та бүхэн үүнийгээ, Монголын ард түмэнд тайлбарлаж өгөөч. Үнэхээр ичмээр. Бүх ард түмний боломж хулгайлагчид энэ намын гэгээн гэрэл юм бол, энэ ард түмэнд юуг гэрэл гэж хэлэхээ та нар хэлж өгөөч.
Ганзоригийн Тэмүүлэн сургалтын зардлаа төлөх хэрэгтэй. Тэр төлөх бүрэн чадалтай хүн шүү дээ. УИХ-д байх наад захын ёс зүй алга. Үе тэнгийн чинь найз, Д.Өнөрболор гэдэг гишүүн ёс зүй яриад байна лээ, түүнээс асуу. Надад УИХ-д суух эрх байна уу гэж. Ганзоригийн Тэмүүлэнд Төсвийн байнгын хорооны дарга байх эрх байхгүй гэж жирийн иргэн хэлж байна.
Бидний татвар, төрийн мөнгийг гэр бүлээрээ шамшигдуулсан тул гэдэг үндэслэл хэлж байна. Үүнийг буруутгах боломжгүй. Ардчилсан нам мэдрэмжгүй нь дэндүү. Архангайд тус намаас Дондогдоржийн Золжаргал, Пүрэвбаатарын Мөнхтулга гэж хүмүүс дэвшсэн дээ.
Олхиотой байгаач та нар, тэр Батбаярын Жаргалангаа дагуулаад Архангайд шинээр нөхөн сонгууль явуулахыг зарлуулахын төлөө шахаж шаардаач.
Архангайчуудыг, Монголчуудыг басамжилсан эдгээр хүмүүс, Ардын намын гурван гишүүний ор гарах нөхцөл байна шүү дээ.
Тэд өөрсдөө л төрийн сэнтийгээс буух үйлдлүүдийг удаа дараа хийгээд байж байна шүү дээ.
Ардчилсан намын эдгээр залуус ингэж ажиллахгүй байвал Архангайчуудаас, үндэстний итгэл үнэмшлээс өөрөөр юмыг харж байна гэж ойлгогдоно.
Архангайчууд “сэртүгэй”. Та бүхэн цаашдаа Г.Тэмүүлэн гишүүндээ Говь саунаа, Ханбүрэгдэйгээ ажиллуулаад, Дархан явах зам дахь аавынхаа ханагар эдлэнд амрах боломжийг нь олгох хэрэгтэй болж байна даа.
Б.БАЯР
